Se Fesili Ke Mafaufau ‵Loto Ki Ei
◼ E mafai pefea o fesoasoani atu tatou katoa ki te fakatumauga o se lagonaga fiafia ke tauloto i taimi o fakatasiga a te fakapotopotoga? (Teu. 31:12)
Ona ko te lasi o te ‵tou āva ki a Ieova mo ana fakatokaga e auala i fakatasiga a te fakapotopotoga, e fakamalosi mai ki a tatou katoa ke oko fakavave atu kae ke toka foki ke akoako tatou ne ia. Se mea ‵lei ke faka‵fonu ne tatou a nofoga kolā e ‵tafa ki mua o te hall, kae ke tuku a nofoga kolā e ‵tafa ki tua ki tino kolā e isi ne olotou tama‵liki fo‵liki mo latou kolā e talimuli atu. A koi tuai o kamata te fakatasiga, e ‵tau o fakatoka faka‵lei ne tino a vaegā telefoni mo nisi mea aka ko te mea ke mo a ma fakalavelave atu ki tino fakalogo‵logo. Ka fakafeoloolo aka a te logoa māfai e fakatumau ne tino kolā e ‵kau atu a te uiga tenei ko te āva i taimi o fakatasiga.—Fai. 5:1; Fili. 2:4.
Kafai ko ‵kau atu a tino ‵fou ki fakatasiga, e mafai ne se tino i te fakapotopotoga telā e masani ‵lei mo latou o fanatu o saga‵saga fakatasi mo latou. E fesoasoani malosi atu a te mea tenei māfai e isi ne tama‵liki fo‵liki e ‵tau o fakamasani atu ki ei. A te ‵kau atu ki fakatasiga e mafai o fai pelā me se faiga fou ki te kāiga. I te faiga tenā, e gali māfai e saga‵saga atu latou i nofoga kolā e ‵tafa ki tua ko te mea ke se fakalavelave malosi atu ki nisi tino, io me e mafai foki ne mātua o tiaki a te hall kae olo atu o fai te mea telā e manako ki ei te tamaliki. (Faata. 22:6, 15) E se ‵tau mo kāiga kolā e isi ne olotou tama‵liki o saga‵saga i se potu fakaa‵tea telā e mafai ei ne te tamaliki o fakalogoa. Se mea tāua ‵ki eiloa ke ‵saga faka‵lei atu a mātua o tuku atu a polopolokiga io me ko manakoga totino a olotou tama‵liki i tua o te koga telā e fai ei te lotu, ka oti ko toe ‵foki fakatasi mai ei a ia mo tena tama ki loto.
Ne filifili aka a taina ke fakatumau ne latou se ata gali i loto i fale tapuaki. E fesoasoani atu latou ki kāiga mo nisi tino kolā e talimuli ko te mea ke maua ne olotou nofoga ‵lei. E ‵tau o atamai kae ‵poto a taina konei i te fesoasoani atu ki nisi tino ko te mea ke saga‵saga i nofoga kolā e seai ne mea e mafai o fakalavelave atu ki ei. E fai ne latou a fakaikuga ‵lei māfai ko fakafesagai atu latou ki fakalavelave. Kafai e isi se tamaliki ko kamata o fakalavelave atu ki nisi tino, e mafai ne taina konei o fesoasoani atu ki ei i se auala atafai.
E mafai ne tino katoa kolā e ‵kau atu ki te tapuakiga o ati aka se manakoga ke tauloto ki mea e uiga ki a Ieova mo ana folafolaga e uiga ki te lalolagi fou telā e filemu kae amiotonu.—Epe. 10:24, 25.