Te Auala e Takitaki ei ne Ieova a Tatou
“Akoako mai ki a au mea kola e loto koe ki ei ke fai ne au.”—SALAMO 27:11.
1, 2. (a) E takitaki pefea ne Ieova ana tino i aso nei? (e) E mafai pefea o maua ne tatou a mea aogā katoa mai i fakatasiga?
A IEOVA ko te Pogai o te mainaga mo te munatonu, e pelā mo mea kolā ne tau‵loto tatou ki ei i te suā mataupu. E takitaki ne tena Muna a ‵tou auala, a koi faima‵laga atu tatou i te auala amiotonu. E takitaki ne Ieova a tatou mai i te akoako mai e uiga ki ana auala. (Salamo 119:105) E pelā mo te tino faisalamo i aso mua, e talia ne tatou mo te fiafia a takitakiga mai te Atua kae e ‵talo atu tatou penei: “Te Aliki [ko Ieova], akoako mai ki a au mea kola e loto koe ki ei ke fai ne au.”—Salamo 27:11.
2 E tasi te auala e akoako mai ei a Ieova i aso nei ko fakatasiga faka-Kelisiano. E mata, e fakaaogā katoatoa ne tatou te fakatokaga alofa tenei mai i te (1) ‵kau atu faeloa ki ei, (2) te fakalogo‵logo faka‵lei ki te polokalame, mo te (3) faiga o tali i vaega kolā e aofia i ei te kau fakalogo‵logo? Kae e se gata fua i konā, e mata, e talia ne tatou a manatu fesoasoani kolā ka fesoasoani mai ki a tatou ke tumau i te auala amiotonu?
E Pefea Tou Kau Atu ki Fakatasiga?
3. Ne a mea ne fai ne se tavini telā e galue tumau ke kau atu faeloa a ia ki fakatasiga?
3 Ne ‵kau sāle atu a nisi tino talai o te Malo ki fakatasiga talu mai te lotou fo‵likiga. Ne fai mai se Molimau a Ieova telā e galue tumau pelā me se faifeau, penei: “A koi ‵tupu aka matou mo oku taina i tausaga i tafa o te 1930, ne seki fesili sāle atu matou ki omotou mātua me olo atu matou ki fakatasiga. Ne iloa ‵lei ne matou me ka olo atu matou seiloga ko ma‵saki matou. Ne seki ‵galo sāle te motou kāiga i fakatasiga.” E pelā mo te pelofeta fafine ko Ana, ne “seki tiaki” ne te tuagane tenā te fale tapuaki o Ieova.—Luka 2:36, 37.
4-6. (a) Kaia e ‵galo ei a nisi tino talai o te Malo i fakatasiga? (e) Kaia e tāua ei ke ‵kau sāle atu ki fakatasiga?
4 E mata, e aofia koe i tino kolā e ‵kau atu faeloa ki fakatasiga faka-Kelisiano, io me seāseā ko kau atu koe ki ei? A nisi Kelisiano kolā ne ma‵natu aka me e ‵lei faeloa latou i te feitu tenā, ne fakaiku aka ke na fakamautinoa aka te mea tenā. I ne nāi vaiaso ne tusi ki lalo ne latou a fakatasiga katoa kolā ne ‵kau atu latou ki ei. I te taimi ne toe onoono ei latou i te fakaotiga o te vaitaimi telā ne fakaiku aka ne latou, ne ofo malosi latou i te uke o fakatasiga kolā ne ‵galo latou i ei.
5 Kāti ko fai mai se tino: ‘E se tioa eiloa o fai penā me e uke a mea e taotaomaki mai ki tino i aso nei, kae e se faigofie te ‵kau atu faeloa o latou ki fakatasiga.’ E tonu te manatu me ko ‵nofo atu nei tatou i aso faiga‵ta. Kae ka momea aka foki te faigata fakamuli. (2 Timoteo 3:13) Kae ona ko te mea tenā ko sili atu nei te tāua ke ‵kau atu faeloa ki fakatasiga, i ne? Kafai e se maua faeloa ne tatou a meakai ‵lei i te feitu faka-te-agaga ke fakamalosi mai ki a tatou, e se mafai lele eiloa o fa‵ki tatou i fakalavelave faiga‵ta kolā e fakaoko mai ne te fakanofonofoga tenei. Ia, kafai e se ‵kau sāle atu ki fakatasiga, kāti ka tiakina katoatoa eiloa ne tatou “te auala telā e sasale i ei a tino amiotonu”! (Faataoto 4:18) E tonu, kafai ko ‵foki atu tatou ki ‵tou fale i te fakaotiga o se aso faigata, kāti e se fia olo atu faeloa tatou ki fakatasiga. Kae kafai e ‵kau atu tatou ki ei, faitalia ‵tou fi‵ta, e maua ne tatou a mea aogā i ei, kae e fakamalosi atu foki tatou ki ‵tou taina Kelisiano i te Kingdom Hall.
6 E taku mai foki ne te Epelu 10:25 a te suā pogai tāua ke ‵kau atu faeloa tatou ki fakatasiga. I konā loa ne fakamalosi atu te apositolo ko Paulo ki ana taina Kelisiano ke maopoopo fakatasi sāle ‘i te mea ko iloa ne latou i te Aso o te Aliki ko pili mai.’ E tonu, e se ‵tau lele eiloa o puli i a tatou me ko pili mai ‘te aso o Ieova.’ (2 Petelu 3:12) Kafai ko fakaiku aka ne tatou me koi ‵mao eiloa te gataga o te fakanofonofoga tenei, kāti ka talia ne tatou ke fakalavelave mai a nisi mea totino ki faifaiga faka-te-agaga, e pelā mo te kau atu ki fakatasiga. Kafai e fai penā, ne fakailoa mai ne Iesu me ‘ka fakapoi mai te aso tena ki a tatou.’—Luka 21:34.
Ke Fakalogologo Faka‵lei
7. Kaia e tāua ei ke ‵saga tonu atu a tama‵liki i fakatasiga?
7 E se lava fua i te kau sāle atu ki fakatasiga. E ‵tau o fakalogo‵logo faka‵lei tatou, kae ‵saga tonu atu ki pati kolā e fai mai i ei. (Faataoto 7:24) E aofia foki i ei ‵tou tama‵liki. Kafai e fanatu se tamaliki ki te akoga, e ‵tau o saga tonu atu a ia ki te faiakoga, faitalia me e se gali ki a ia se mataupu e tasi io me e fui maina a ia i ei. E iloa ne te faiakoga me kafai e taumafai te tamaliki ke saga tonu atu, ka maua ne ia a nisi mea aogā i ei. E ‵lei ke na ‵saga tonu atu a tama‵liki akoga ki akoakoga kolā e tuku mai i fakatasiga a te fakapotopotoga, i lō te tuku fua ke ‵to olotou moe māfai ko fatoā kamata te fakatasiga, i ne? E tonu, e aofia i nisi munatonu tāua mai te Tusi Tapu ko “mea faigata” kolā e faigata ke maina i ei. (2 Petelu 3:16) Kae e se ‵tau o manatu māmā tatou ki te malosi o se tamaliki ke tauloto ki mea. E se manatu māmā te Atua ki ei. I aso o te Tusi Tapu, ne fakatonu atu a ia ki ana tavini fo‵liki ‘ke lagona kae ke iloa foki ne latou o fakaaloalo ki a Ieova kae ke fakalogo mo te fakamaoni ki ana akoakoga.’ Kae kāti ne faigata ke maina a tama‵liki i nisi mea konā. (Teutelonome 31:12; fakatusa ki te Levitiko 18:1-30.) E mata, e ‵kese a mea kolā e manako a Ieova ki ei ke fai ne tama‵liki i aso nei?
8. Ne a mea e fai ne nisi mātua ko te mea ke na ‵saga tonu atu olotou tama‵liki i fakatasiga?
8 E iloa ne mātua Kelisiano me e fakama‵lie aka a nisi manakoga faka-te-agaga o olotou tama‵liki i mea kolā e tau‵loto latou ki ei i fakatasiga. Tela la, e fakatoka ne nisi mātua ke na ‵moe olotou tama‵liki a koi tuai o olo atu latou ki fakatasiga ko te mea ke se mata fia ‵moe latou māfai ko oko atu ki te Kingdom Hall kae ko toka ‵lei latou ke tau‵loto ki mea i ei. E taofi aka io me e fai ne nisi mātua se tapulā ki te ‵kilo atu o tama‵liki ki te TV i po e fai ei a fakatasiga. (Efeso 5:15, 16) A vaegā mātua penā e taumafai o taofi aka a mea kolā e fakalavelave mai, kae e fakamalosi atu latou ki olotou tama‵liki ke na fakalogo‵logo faka‵lei kae ke tauloto faka‵lei, e tusa loa mo mea kolā e mafai ne latou o fai mo olotou tausaga.—Faataoto 8:32.
9. Ne a mea kāti ka fesoasoani mai ki a tatou ke na fakalogo‵logo faka‵lei?
9 Ne fai atu penei a Iesu ki tino mā‵tua: “Ke fakaeteete koutou, kae fakalogo faka‵lei.” (Luka 8:18) I aso nei, kāti e faigata ke fai penā. E tonu, se mea faigata ke saga atu kae fakalogologo faka‵lei, kae e mafai o fakamasani faka‵lei se tino ki ei. Kafai e fakalogologo koe ki se lauga faka-te-Tusi Tapu io me se vaega o te fakatasiga, taumafai ke na mate mai a manatu fakavae i ei. Fai se fakatautauga e uiga ki nisi pati a te failauga. Ke sala aka ne koe a manatu kolā e mafai ne koe o fakaaogā i te galuega talai io me e mafai o fakagalue aka i tou olaga. Ke iloilo faeloa a manatu kolā e taku mai i ei. Ke tusi ki lalo a nāi manatu.
10, 11. Ne fesoasoani atu pefea a nisi mātua ki olotou tama‵liki ke fakalogo‵logo faka‵lei, kae ne a auala ne aogā ki a koe i te feitu tenā?
10 E ‵lei atu ke fakamasani ki te fakalogologo faka‵lei a koi foliki se tino. A koi tuai o iloa ne latou o faitau kae tusitusi, e fakamalosi sāle atu a mātua ki nisi tamaliki kolā e seki olo atu ki se akoga ke tusi ki lalo olotou “manatu.” E tusi ne latou i se laupepa i taimi takitasi e taku mai ei a vaegā pati masani pelā mo “Ieova,” “Iesu,” mo “te Malo.” E fakamasani aka penā a tama‵liki ki te fakalogo‵logo faka‵lei ki mea kolā e taku mai i te tulaga.
11 E ‵tau o maua foki ne nisi tama‵liki mā‵tua a fakamalosiga ke ‵saga faka‵lei atu ki ei. Ne matea atu ne te ulu o se kāiga, me ne mata lagia tena tama telā ko 11 ana tausaga i te fono faka-Kelisiano, telā ne tuku atu ei ne ia se Tusi Tapu ki a ia kae fakamolemole atu ke ‵suke ki tusi siki kolā ne taku mai ne failauga. Ne tusi ki lalo ne te tamana a nisi manatu tāua i ei, kae ne onoono a ia ki te Tusi Tapu telā ne taofi ne tena tama. Kae mai i konā loa, ne saga faka‵lei atu tena tama mo te fiafia ki te polokalame.
Ke Lagona ne Tino Tou Leo
12, 13. Kaia e tāua ei ke usu atu a pese i te fakapotopotoga?
12 Ne usu atu penei te tupu ko Tavita: “Te Aliki, . . . e tapuaki fakatamilo au i tou fatafaitaulaga.” (Salamo 26:6, 7) E maua a avanoaga ‵gali ‵ki i fakatasiga a Molimau a Ieova ke taku atu i mua o nisi tino te ‵tou fakatuanaki. E tasi te auala e mafai ei ne tatou o fai penā, ko te usuatuga o pese fakatasi mo te fakapotopotoga. A te mea tenei se vaega tāua o te ‵tou tapuakiga, kae se mea faigofie ke fakatamala ki ei.
13 Ko oti ne tauloto ne nisi tama‵liki kolā e se iloa ne latou o fai‵tau a pati i pese o te Malo o te Atua kolā e fakaaogā ne tatou i fakatasiga i vaiaso katoa. E fia‵fia malosi latou ke mafai o usu pese fakatasi mo tino mā‵tua. Kafai ko ‵tupu aka o mā‵tua a tamaliki, kāti ka se ‵pau te lotou fia‵fia ke usu a pese o te Malo o te Atua. E mā foki a nisi tino mā‵tua ke usu a pese i fakatasiga. Kae ko te usuga o pese se vaega o te ‵tou tapuakiga, e pelā eiloa mo te galuega talai se vaega o te ‵tou tapuakiga. (Efeso 5:19) E fakaoti ne tatou ‵tou mafi ke tavae atu ki a Ieova i te galuega talai. E mata, e mafai foki ne tatou o ‵viki atu ki a ia i te usu malosi atu mo te loto kātoa a pese o ‵vikiga faka‵malu—faitalia me e gali ‵tou leo me ikai?—Epelu 13:15.
14. Kaia e ‵tau ei o fakatoka faka‵lei ne tatou a mataupu kolā ka suke‵suke tatou ki ei i fakatasiga a te fakapotopotoga?
14 E tavae atu foki tatou ki te Atua māfai e fai ne tatou ‵tou tusaga fakamalosi loto i vaega o te fakatasiga kolā e fai ei a fesili ki te kau fakalogo‵logo. E manakogina i ei te fakatoka faka‵lei. E ‵tau o fakamāumāu se taimi ke mafaufau ‵mafa ki nisi fakamatalaga ‵loto i te Muna a te Atua. Ne maina ‵lei te apositolo ko Paulo i te mea tenā, me i a ia se tino telā ne sukesuke malosi ki te Tusi Tapu. Ne tusi mai a ia: “Tapa! Ko oko eiloa i te ‵poko o te maukoloa, mo te poto mo te malamalama o te Atua!” (Loma 11:33) Koutou, e ulu o kāiga, se mea tāua ‵ki ke fesoasoani atu koutou ki tino taki tokotasi i te kāiga ke sukesuke ki te poto o te Atua, e pelā mo mea kolā e fakaasi mai i te Tusi Tapu. Ke fakaavanoa se taimi i te akoga faka-te-kāiga ki te Tusi Tapu ke fakamatala atu a nisi manatu faiga‵ta, kae ke fesoasoani atu ki otou kāiga ke fakatoka faka‵lei ki fakatasiga.
15. Ne a manatu kāti ka fesoasoani atu ki se tino ke fai ana tali i fakatasiga?
15 Kafai e manako koe ke uke atu au tali e fai i fakatasiga, kaia e se fakatoka faka‵lei ei ne koe au tali a koi tuai o fanatu koe ki ei? E se fai pelā me e ‵tau o fakagali‵gali au pati i ei. E mafai ne koe o fakatāua se tusi siki kae faitau faka‵lei ki ei mo te loto talitonu io me ne nāi pati e filifili faka‵lei ne koe kae e taku atu mai i tou loto. E fakamolemole atu a nisi tino talai ke fakaavanoa a tali muamua i nisi palakalafa mautinoa ke tali ne latou, ko te mea ke se galo i a latou te avanoaga ke taku atu ne latou te lotou fakatuanaki.
Ko Poto te Tino sē Masani
16, 17. Ne a pati fakatonutonu ne avatu ne se toeaina e tokotasi ki se tavini fakafaifeau, kae kaia ne aogā ei a pati konā?
16 I fakatasiga a Molimau a Ieova, e fakamasaua sāle mai ki a tatou ke fai‵tau ki te Muna a te Atua i aso katoa. E maua a fakamalosiga i ei. E fesoasoani mai foki i ei ki a tatou ke na fai ne fakaikuga ‵poto, ke faka‵tonu aka a uiga ‵se, ke ‵teke atu ki fakaosoosoga, kae ke toe maua mai te malosi faka-te-agaga māfai ne ‵laka atu ‵tou vae i se auala ‵se.—Salamo 19:7.
17 E toka a toeaina masani i fakapotopotoga o tuku mai ne latou a pati fakatonutonu mai te Tusi Tapu kolā e fetaui tonu mo ‵tou manakoga. E mafai fua o fakamolemole atu ke “aumai ki tua” a pati fakatonutonu konā e fakavae ki te Tusi Tapu. (Faataoto 20:5) E tasi te aso ne fakamolemole atu ei se tavini fakafaifeau loto toaga ki se toeaina ke maua ne manatu fesoasoani ki te auala e mafai ei o momea aka tena aogā i te fakapotopotoga. Ne masani ‵lei laua mo te toeaina tenā. Telā ne ‵suke atu fua ei te toeaina ki tena Tusi Tapu ki te 1 Timoteo 3:3, telā e fai mai me e ‵tau mo tāgata tofia o uiga “filemu.” Ne fakasino atu a ia mo te alofa ki auala kese‵kese e mafai ei ne te tamataene tenā o fakaasi atu te uiga “filemu” i ana fesokotakiga mo nisi tino. E mata, ne ita te tamataene tenā i pati ‵tonu konā? Ikai! Ne fakamatala mai ne ia: “Ne fakaaogā ne te toeaina te Tusi Tapu. Telā ne iloa ei ne au me i pati fakatonutonu konā e maua eiloa mai i a Ieova.” Ne loto fakafetai te tavini fakafaifeau tenā kae ne fakagalue aka ne ia a pati konā kae ko gasolo faka‵lei atu a ia ki mua.
18. (a) Ne a mea ne fesoasoani atu ki se talavou Kelisiano e tokotasi i te akoga? (e) Ne a tusi siki e masaua sāle ne koe māfai e fepaki koe mo fakaosoosoga?
18 E mafai foki ne te Muna a te Atua o fesoasoani mai ki talavou ke ‵kalo keatea mai “manakoga fakatamatane.” (2 Timoteo 2:22) Ne mafai ne te talavou Molimau a Ieova telā ne fatoā pāsi i te akoga lasaga lua o ‵teke atu ki fakaosoosoga i te taimi ne akoga ei a ia mai i te mafaufau ‵mafa mo te fakagalue aka ne ia o nisi tusi siki mai te Tusi Tapu. Ne mafaufau sāle a ia ki pati kolā ne tusi ki lalo i te Faataoto 13:20: “Kauga ki tino poto kae ka poto foki koe.” Tela la, ne fakaeteete tou fafine kae ne fai taugasoa fua a ia ki tino kolā e āva malosi ki fakatakitakiga i te Tusi Tapu. Konei ana manatu: “E se ‵lei atu au i nisi tino. Kafai e kau atu au ki tino ma‵sei, ka manako au o fakafiafia oku taugasoa, kae ka iku atu i ei ki fakalavelave.” Ne fesoasoani atu foki ki a ia a pati a Paulo kolā ne tusi ki lalo i te 2 Timoteo 1:8. Ne tusi mai a ia penei: “Sa ma o takutaku atu te tou Aliki, . . . kae ke talia ne koe ou puapuaga mō te tala ‵lei i te mana o te Atua.” E tusa loa mo pati konā, ne loto toa tou fafine kae ne talai atu ne ia ana talitonuga kolā e fakavae ki te Tusi Tapu ki tama‵liki i tena vasega i so se avanoaga ‵lei. I so se taimi ne tofi aka ei a ia ke taku atu se lipoti ki tena vasega, ne filifili aka ne ia se mataupu telā ka mafai ei ne ia o avatu se molimau ‵lei e uiga ki te Malo o te Atua.
19. Kaia ne seki mafai ei ne se tamataene e tokotasi o ‵teke atu ki fakaosoosoga o te lalolagi nei, kae ne a mea ne tuku atu ei ki a ia te malosi faka-te-agaga?
19 Kafai e takase‵se malie aka tatou mai i ‘te auala telā e sasale i ei a tino amiotonu,’ ka fesoasoani mai foki te Muna a te Atua ki a tatou ke na faka‵tonu aka ‵tou amioga. (Faataoto 4:18) Ko iloa ‵lei ne se tamataene i Afelika me e tonu te mea tenā. I te taimi ne āsi atu ei se Molimau a Ieova ki a ia, ne talia ne ia se akoga faka-te-Tusi Tapu. Ne fiafia malosi a ia ki mea ne tauloto a ia ki ei, kae seki leva, ne kau atu tou tagata ki taugasoa ma‵sei i tena akoga. Fakamuli loa, ne kamata o amio masei foki a ia. Ne taku tonu mai a ia penei: “Ne logo‵mae faeloa toku loto lagona i ei, tenā la, seki fano i ei au ki fakatasiga.” Kae ne toe kamata fakamuli tou tagata o kau sāle atu ki fakatasiga. Ne fai mai ne te tamataene tenā a te manatu tāua tenei: “Ne iloa ne au i ei me i te pogai tonu o mea katoa konā ko toku sōgea i te feitu faka-te-agaga. Ne seki fai ne au a sukesukega totino. Tenā loa te pogai ne seki mafai ei ne au o ‵teke atu ki fakaosoosoga. I konā loa, ne kamata o faitau sāle au ki Te Faleleoleo Maluga mo te Ala Mai! Ne gasolo o toe maua ne au toku malosi faka-te-agaga, kae ne fai ne au ke ‵mā toku olaga. Ne fai i ei se molimau ‵lei ki tino kolā ne matea atu ne latou a ‵fuliga kolā ne ‵tau o fai ne au. Ne papatiso au, kae nei la ko oko eiloa toku fiafia.” Ne a mea ne avatu ei te malosi ki te tamataene tenā ke manumalo a ia i vāivāiga faka-te-foitino? Ne toe maua ne ia tena malosi faka-te-agaga mai i te sukesuke sāle ki te Tusi Tapu.
20. E mafai pefea ne se talavou o ‵teke atu ki osomaiga a Satani?
20 E isi ne mea kolā e oso atu ki a koutou, e talavou Kelisiano, i aso nei! Kafai e fia ‵teke atu koutou ki osomaiga a Satani, e ‵tau eiloa o ‵kai faeloa koutou ki meakai faka-te-agaga. Ne maina ‵lei te faisalamo i te mea tenā, me kāti a ia se tamataene foki. Ne fakafetai atu a ia ki a Ieova me ne maua ne ia Tena Muna, ko te mea ke “tausi tena olaga ke ‵ma.”—Salamo 119:9.
Ka Tau‵tali Atu Faeloa Tatou ki Takitakiga a te Atua
21, 22. Kaia e se ‵tau ei o fakaiku aka ne tatou me ko tō faigata te auala o te munatonu?
21 Ne takitaki atu ne Ieova a te fenua o Isalaelu mai Aikupito ki te Fenua o te Folafolaga. Kāti ne foliga mai ki a latou me e sōna faigata ‵ki te auala telā ne filifili aka ne ia. Ne seki takitaki atu ne Ieova latou i te auala faigofie telā ne fanatu tonu i tafa o te Tai Metitilani, kae ne takitaki atu ne ia ana tino i te auala faigata i te koga lavaki. Kae ne fai penā ona ko te alofa o te Atua. Me e tiga eiloa ne toetoe te auala i te tafātai, ne ‵tau o ui atu i ei i te fenua o tino Filisitia kolā ne fai fili ki a latou. Me ne filifili aka ne Ieova te suā auala, ne seki fe‵paki fakavave ana tino mo te kau Filisitia.
22 Kāti e foliga mai foki me e faigata te auala telā e takitaki atu ei ne Ieova tatou i aso nei. I vaiaso katoa, e uke ‵tou mea e ‵tau o fai i galuega faka-Kelisiano, e aofia i ei a fakatasiga a te fakapotopotoga, sukesukega totino, mo te galuega talai. Kāti ne foliga mai pelā me e ‵lei atu a nisi auala. Kae e fatoā oko atu tatou ki te koga telā e kausaki malosi tatou ke na oko atu ki ei māfai e tau‵tali atu tatou ki te takitakiga a te Atua. Tela la, ke na talia faeloa ne tatou a akoakoga tāua mai i a Ieova kae tumau i “te auala telā e sasale i ei a tino amiotonu” ke oko eiloa ki te se-gata-mai!—Salamo 27:11.
E Mafai ne Koe o Fakamatala Mai?
• Kaia e ‵tau ei o ‵kau atu faeloa tatou ki fakatasiga faka-Kelisiano?
• Ne a mea e mafai ne mātua o fai ke fesoasoani atu ei ki olotou tama‵liki ke ‵saga tonu atu i fakatasiga?
• Ne a mea e aofia i te fakalogologo faka‵lei?
• Ne a mea e mafai o fesoasoani mai ki a tatou ke tali a fesili i fakatasiga?
[Ata i te itulau e 18]
Kafai e ‵kau sāle atu tatou ki fakatasiga faka-Kelisiano ka fesoasoani mai i ei ke masaua ne tatou te aso o Ieova
[Ata i te itulau e 20]
E kese‵kese a auala e mafai ei o ‵viki atu tatou ki a Ieova i fakatasiga faka-Kelisiano