SE TUSI MAI I TE Potukau Pule
Ki Taina Molimau a Ieova:
Ko oko eiloa i te taulia o tatou ke tauave a te igoa o te Pule Tafasili i te Maluga i te Lagi mo te Lalolagi, ko Ieova! A te igoa tenā e tumau, e se mafai o fakamaseigina, kae e tu ‵kese foki. Ko Ieova eiloa ne tuku mai ne ia a tena igoa ke tauave ne tatou, kae maise eiloa talu mai te tausaga ko te 1931, ne fakamailoga ei tatou ki te igoa tu ‵kese tenā. (Isa. 43:10) Ko oko eiloa i te ‵tou fakamata‵mata ke fai tatou e pelā me ne Molimau a Ieova.
E taumafai faeloa a te Tiapolo ke fakaseai atu a te igoa o te Atua. Mai i lalo i tena pulega, ne ‵teke atu ei a atufenua ki te igoa o Ieova. E takalialia a Papelonia te Sili, te emupaea o lotu ‵se i te lalolagi kātoa ki te igoa tenā, kae ko oti ne ave keatea ne latou mai i ‵fuliga e uke o Tusi Tapu. E ‵kese mai i ei, ne fakamaluga aka eiloa ne Iesu a te igoa o tena Tamana, mai i te fakatulaga muamua ne ia i te ‵talo fakaakoako telā ne akoako ne ia ki ana soko. Ana muna: “Te motou Tamana telā i te lagi: ke tapu tou igoa.” (Mata. 6:9) Fakamuli ifo, i tena ‵talo mo te loto kātoa ki tena Tamana, ne fai atu a ia: “Ko oti ne fakaasi atu ne au a tou igoa ki a latou kolā ne tuku mai ne koe ki a au mai i te lalolagi.” (Ioane 17:6) A te tautali atu ki te fakaakoakoga ‵lei a Iesu, e momea aka ei te ‵tou loto finafinau ke fakamaluga aka a te igoa o Ieova i te lalolagi kātoa.
A te tusi siki mō te 2009, “Fakailoa atu ki tino katoa a te tala ‵lei,” ne fakamalosi aka ei tatou ke fakataunu katoatoa a te ‵tou galuega talai. (Galu. 20:24) E seai eiloa se fakalotolotolua me ne fakamanuia malosi ne Ieova a ‵tou taumafaiga i te tausaga faka-te-taviniga tenei ko teka. Ne tuku atu i ei se matugā molimau lasi ki te lalolagi kātoa e uiga ki te ‵malu mo te fakaaloalogina o te igoa o Ieova. Ne ‵kau atu se aofaki fou o tino talai e toko 7,313,173 i te talaiatuga ki tino katoa, e pelā foki mo te akoako atu o tino loto fakamaoni kolā e ‵sala ki ne faka‵leiga ki fakalavelave e uke kolā e fe‵paki mo latou i aso takitasi. Ne ‵kau atu a tino e toko 18,168,323 ki te Fakamanatuga o te mate o Keliso telā e fakaasi mai i ei me kāti koi lau eiloa i miliona a tino koi mafai o ka‵laga atu ki te igoa o Ieova a koi tuai o oko mai te gataga o te olaga masei tenei.
E ‵tusa eiloa mo te mea e talia ne Ieova, ka tumau eiloa tatou i te talai atu o te tala ‵lei o te Malo mo te loto finafinau, mai i te fakaaogaga o so se auala ke oko atu ki tino i ‵tou koga talai. (Mata. 24:14; Male. 13:10) Faitalia me e olo atu tatou mai fale ki fale, i auala, i tusi mo te talai i telefoni, io me ko taimi seki fuafuagina, ke na taumafai eiloa tatou ke fakailoa atu a te igoa o Ieova mo tena fuafuaga ki tino e tokouke e mafai o oko atu tatou ki ei.
E maua ne tatou a pogai katoa ke tali‵tonu me ko pili o gasuesue a Ieova ke faka‵malu ei tena igoa. (Eseki. 36:23) Ko pili ‵ki mai eiloa te taimi ka fakafilemu aka ei a tino katoa kolā e fakamasei ne latou a te igoa tenā. Ko tafaga la te ‵malu o te aso tenā mō tavini a‵lofa fakamaoni katoa a Ieova, kolā ko oti ne fakailoa atu ne latou a te igoa o Ieova kae fakamaluga faeloa ne latou tena pulega sili i te lagi mo te lalolagi!
Ne lavea faka‵lei atu eiloa a te alofa atafai o Ieova ki ana tino i Fono i te Atufenua mo Fono i Atufenua ko te “Ke Matapula‵pula!” kolā ne fai i te ukega o koga o te lalolagi i te 2009. Ne fai eiloa a fono konā mo fai se mea fakaofoofogia i ‵tou tala fakasolopito katoa, telā e fakamalosi mai ke momea aka te ‵tou matapula‵pula ki te manakoga ke matapula‵pula mō te aso o Ieova.—Male. 13:37; 1 Tesa. 5:1, 2, 4.
E tonu, a Ieova e ‵lei mai ki a tatou; e faka‵fonu ne ia ‵tou loto ki te fiafia. E fai ne ia tatou ke ta‵kato i vao mouku lauusiusi kae takitaki ne ia tatou ki tafatafa o vai e tafetafe malie.—Sala. 23:1, 2; 100:2, 5.
Ke na talitonu eiloa ki fakamanuiaga tumau a Ieova ki luga i a koe i te taimi e tumau ei koe i te fakalavelave i te taviniga ki te Malo i masina konei mai mua nei!
Ko ‵moli atu eiloa omotou alofaga faka-Kelisiano ki te ‵tou kautaina i te lalolagi kātoa,
Ko otou taina,
Potukau Pule o Molimau a Ieova