“Ke Fakatau Atafai” Koutou

1. Se a te mea ko ma‵nako malosi ki ei a tino i aso nei?

¹ Ko sili atu eiloa nei a te tokouke o tino kolā e ma‵nako malosi ki se fesoasoani mo te atafai i lō aso mua. Ona ko te momea aka o ma‵sei a fakanofonofoga i te lalolagi, ne iku atu i ei ki te tokouke o tino ko se fia‵fia, māfatia, kae ko seai foki ne olotou fakamoemoega ‵lei. E ma‵nako a te fia miliona o tino ki se fesoasoani, kae ko tatou, e pelā me ne Kelisiano, e mafai ne tatou o fakaasi atu a te amanaia tonu ki ‵tou tuakoi. (Mata. 22:39; Kala. 6:10) E mafai pefea o fakaasi atu a te amanaia tonu penā?

2. Se a te ‵toe auala ‵lei ke fakaasi atu ei ne tatou a te atafai?

² Se Galuega Atafai: Ko te Atua fua e mafai o tuku mai ne ia se fakamafanafanaga tonu kae tumau. (2 Koli. 1:3, 4) E fakamalosi mai a Ieova ke fakaakoako atu tatou ki a ia mai i te “fakatau atafai” kae ko oti ne tuku mai ne ia a te fakatonuga ke āsi atu ki ‵tou tuakoi mo te tala ‵lei o te Malo. (1 Pe. 3:8) A te galue malosi i te galuega tenei ko te ‵toe auala ‵lei ke fakamafanafana atu ei a “loto o tino fanoa‵noa,” me i te Malo o te Atua ko te fakamoemoega tonu fua e tasi mō tino katoa kolā e puapuagatia. (Isa. 61:1) Ona ko tena atafai ki ana tino, ko pili eiloa o gasuesue a Ieova ke fakaseai atu ei a mea ma‵sei kae toe fakatu aka foki se lalolagi fou kae amiotonu.—2 Pe. 3:13.

3. E mafai pefea o ‵pau ‵tou kilokiloga mo te kilokiloga a Iesu ki tino?

³ Ke ‵Pau Tau Kilokiloga mo te Kilokiloga a Iesu ki Tino: Ke oko foki eiloa ki taimi ne talai atu ei a ia ki tino e tokouke, ne seki kilo atu fua a Iesu ki ei e pelā me se potukau o tino. Ne kilo atu eiloa a ia ki tino taki tokotasi kolā e ma‵nako ki se fesoasoani i te atiakaga o se fesokotakiga ‵lei mo te Atua. Ne fai latou e pelā me ne mamoe e aunoa mo se tausi mamoe ke takitaki latou. Ne otia te loto o Iesu i te mea ne lavea ne ia, kae ne fakamalosi aka ei a ia ke akoako atu ki a latou mo te onosai. (Male. 6:34) A te ‵pau o ‵tou kilokiloga mo te kilokiloga a Iesu ki tino ka fakamalosi aka ei tatou ke fakaasi atu a te atafai tonu ki a latou taki tokotasi. Ka lavea atu eiloa a te mea tenei i te auala e fai‵pati atu ei tatou mo foliga foki o ‵tou mata. Ka fai a te galuega talai mo fai te mea muamua e fakatāua ne tatou, kae ka fulifuli foki ‵tou pati ke fetaui mo mea e manava‵se ki ei a tino taki tokotasi.—1 Koli. 9:19-23.

4. Kaia e ‵tau ei o fakaasi atu faeloa ne tatou a te atafai?

⁴ Ko ‵saga mai eiloa mo te fia‵fia se vaitino tokouke o tino mai fenua katoa ki te fekau o te Malo ona ko te uiga atafai kae fakamalosi loto telā ne fakaasi atu ki a latou. I te ‵tou tumau i te fakaasi atu o te uiga atafai, ka fakaaloalo kae fakafiafia atu eiloa tatou ki te ‵tou Atua atafai, ko Ieova.—Kol. 3:12.