E Mafai ne Koe o ‘Fanatu ki Maketonia’?
1. Se a te mea ne fai ei ke olo atu a Paulo mo ana taugasoa ki Maketonia?
1 Kāti ko te 49 T.A., ne tiakina ei ne te apositolo ko Paulo a Sulia Anitioka i te lua o ana malaga fakamisionale. Ne manako a ia ke āsi atu ki Efeso mo nisi fa‵kai i Asia Foliki. Kae ne maua ne ia se ‵kamiga e auala i te agaga tapu ke ‘fanatu ki Maketonia’ i lō te fano ki nisi fa‵kai. Ne talia mo te fia‵fia ne latou mo ana taugasoa a te ‵kamiga tenā, kae ne taulia eiloa latou ke fakatu aka ne latou a te fakapotopotoga muamua eiloa i te koga tenā. (Galu. 16:9, 10; 17:1, 2, 4) I aso nei, e manakogina malosi eiloa i nisi koga talai i te lalolagi kātoa a tino faigaluega e tokouke i te ‵katiga o saito. (Mata. 9:37, 38) E mata, e mafai ne koe o fesoasoani atu?
2. Kaia ne seki mafau‵fau ei a nisi tino ke olo atu latou ki se fenua fakaatea?
2 Kāti e maua ne koe a te loto finafinau e pelā mo te apositolo ko Paulo kae ne seki mafaufau ‵mafa koe ki te fanatu ki se fenua fakaatea. Kāti e se mafai ne koe o fanatu ki te akoga fakamasani ko Kiliata ona ko tou matua io me ko koe se tuagane taka io me e isi ne au tama‵liki fo‵liki. Kāti e seki mafaufau aka eiloa koe ke fanatu ki se fenua fakaatea me e se lava tou loto talitonu me e mafai ne koe o tauloto ki se isi ‵gana. Io me kāti e nofo atu koe i se isi fenua ona ko mea tau tupe kae ona ko te pogai tenā ko faigata ei ke toe fanatu koe ki se isi koga. Kae i te otiga ne mafaufau faka‵lei ki ei fakatasi mo te faiga o ‵talo, ko iloa aka ei ne koe me e mafai eiloa o fanatu koe ki se fenua telā e manakogina malosi se fesoasoani i ei.
3. Kaia e se fai ei a te akoga fakamisionale mo fai se mea e manakogina ke talai atu ei koe mo te manuia i se fenua fakaatea?
3 E Mata, e ‵Tau o Fanatu Koe ki te Akoga Fakamasani mō Misionale? Se a te mea ne iku manuia ei a Paulo mo ana taugasoa? Ne fakalagolago malosi latou ki a Ieova mo tena agaga tapu. (2 Koli. 3:1-5) Tela la, kafai foki eiloa e se talia ne ou fakanofonofoga ke maua ne koe se akoakoga fakapito, koi mafai eiloa o talai atu koe mo te manuia i se fenua fakaatea. Ke masaua foki me e maua faeloa ne koe a akoakoga e auala i te Akoga mō Tino Talai mo Te Fakatasiga mō te Galuega Talai. Kae kafai e fakamoemoe koe ke kau atu ki Kiliata io me se akoga tai ‵pau penā, a tou fanatu ki te suā fenua ke tofotofo aka koe ki te galuega fakamisionale ka maua i ei ne koe a atamai tāua kolā e mafai o fakaaoga fakamuli ne koe māfai ko taliagina ke kau atu koe ki nisi akoakoga fakaopoopo.
4. Kaia e se ‵tau ei o mafau‵fau a tino ma‵tua me ko se mafai ne latou o olo atu o talai i se fenua fakaatea?
4 Tino Ma‵tua: A tino ma‵tua kolā ko ma‵tua ‵lei i te feitu faka-te-agaga kae koi ma‵losi eiloa i te feitu faka-te-foitino e mafai o lasi ‵ki te lotou fesoasoani ki fenua kolā e manakogina i ei a tino talai. E mata, ko oti koe ne litaea mai tau galuega ‵togi? A latou kolā e isi ne olotou tupe litaea e mafai eiloa o ola i fenua kolā koi ati ake ona ko te ‵togi māmā atu o mea i ei, e aofia i ei te ‵togi o vailakau mai te fakaimasaki, māfai e faka‵pau ki olotou fenua ‵tonu.
5. Fakamatala mai se tala o se taina ko litaea telā ne fanatu ki se fenua fakaatea?
5 Ne fanatu se taina paenia telā se toeaina kae ko oti foki ne litaea, mai se fenua telā e fai‵pati ki te ‵gana palagi ki se koga lauiloa mō tualisi i Asia ki Saute-Saegala ke fesoasoani atu ki se potukau o tino talai e toko iva kolā e fai‵pati ki te ‵gana palagi. Ne talai atu a te potukau tenā ki tino mai fenua fakaa‵tea e toko 30,000 kolā ne ‵nofo atu i konā. I loto i se lua tausaga, ne ‵kau atu ei a tino e toko 50 ki fakatasiga a latou. Ne tusi mai a te taina: “A toku vau ki konei ne maua ei ne au a toe fakamanuiaga tafasili i te ‵gali kolā e seki maua eiloa ne au muamua. E se lava foki eiloa a te taimi ke fakamatala atu a nai fakamanuiaga konei!”
6. Fakamatala mai se tala o se tuagane taka telā ne fanatu ki se fenua telā e manakogina malosi i ei se fesoasoani.
6 Tuagane Taka: Ko oti eiloa ne fakaaoga ne Ieova a tuagane i se auala lasi ke fakasalalau atu a te tala ‵lei i fenua kolā e manakogina malosi i ei a te fesoasoani. (Sala. 68:11) Ne maua ne se tuagane talavou telā e seki avaga a te fakamoemoega ke fakalauefa atu tena galuega talai i se fenua fakaatea, kae ne manava‵se eiloa ana mātua i se auala ‵lei mō tena puipuiga. Tela la, ne filifili aka ne tou fafine se fenua telā e tai ‵lei eiloa i mea tau politiki mo mea tau tupe, ne tusi atu ki te ofisa lagolago kae ne maua ne ia a manatu fesoasoani. I te ono tausaga ne nofo atu ei a ia i te fenua tenā, ne maua ne ia a fakamanuiaga e uke ‵ki. E fai mai tou fafine: “I toku fenua, ne mu‵tana fua a avanoaga ne maua ne au ke fai a a‵koga faka-te-Tusi Tapu. Kae ko te tavini atu i se koga e manakogina malosi ei se fesoasoani e mafai o fai ne au a a‵koga e uke kae ne momea aka ei toku atamai i te akoako atu.”
7. Fakamatala mai se tala o se kāiga telā ne olo atu ki se fenua fakaatea?
7 Kāiga: Kafai e isi ne au tama‵liki, e mata, e ‵tau eiloa o fai a te mea tenei mo fai se mea e taofi aka ei tou fanatu ki se fenua fakaatea ke fakalauefa atu te tala ‵lei? E tasi te kāiga mo tamaliki e tokolua i ei, kolā ko valu tausaga o te suā tino kae sefulu tausaga o te suā tino, ne fakaiku aka ke tofotofo aka ne latou te faiga tenā. E tusi mai penei te mātua e uiga ki te lotou tala: “Ko oko eiloa i te fia‵fia o māua ke puti aka mā tama‵liki i konei, me ne mafai faeloa o fesokotaki atu lāua ki paenia fakapito mo misionale. Ko oti ne fakamanuiagina te motou olaga ona ko te tavini atu i se koga telā e manakogina malosi i ei se fesoasoani.”
8. E mata, e mafai o tavini atu i se fenua fakaatea e aunoa mo te tauloto ki se isi ‵gana? Fakamatala mai.
8 Te Manavase Ona ko te ‵Gana: E mata, a te tauloto ki se ‵gana fakaatea e taofi aka ei koe mai i te fanatu ki te suā fenua? Kāti e fakaaoga foki tau ‵gana i nisi fenua kolā e manakogina malosi i ei a tino talai o te Malo. E isi se tauavaga kolā e fai‵pati ki te ‵gana palagi ne olo atu ki se fenua telā e fakaaoga i ei a te ‵gana Sepania kae e tokouke foki a tino e fai‵pati ki te ‵gana palagi ne olo atu ki konā. Mai tua o te mauaga o fakamatalaga mai i te ofisa lagolago e uiga ki fakapotopotoga palagi kolā e ma‵nako ki se fesoasoani, ne filifili aka ne latou se fakapotopotoga e tasi kae ne āsi fakalua atu ki ei. Ne ‵foki atu latou ki te lotou fenua, fakamu‵tana ifo olotou tupe fakamāumāu, kae ne taumafai o ‵teu olotou tupe mō se tausaga. I te taimi ne toka ei latou o olo atu, ne fesoasoani atu a taina i te koga tenā i te ‵salaga o se fale ‵togi māmā.
9, 10. Ne a nisi mea e mafai o mafau‵fau ki ei a tino kolā ne tiakina ne latou olotou fenua, kae kaia?
9 Tino Kolā e Olo Atu ki Nisi Fenua: Kai fanatu aka eiloa koe ki se isi fenua, kāti mai mua o tauloto koe ki te munatonu? Kāti e isi se manakoga lasi mō tino ‵kati saito i tou fenua tonu. Kai mafaufau aka eiloa koe o ‵toe foki atu ko te mea ke fesoasoani koe i konā? Kāti e tai faigofie atu ki a koe ke maua se galuega mo se fale i lō se tino mai i se isi fenua. Kāti e iloa ‵lei eiloa ne koe a te ‵gana. E se gata i ei, kāti e sili atu i te fia fakalogo‵logo o tino ki te fekau o te Malo telā e avatu ne koe i lō se tino telā e ‵kilo atu ki ei e pelā me se tino fakaatea.
10 E tokotasi te tagata ne fanatu mai i Alapania ki Italia e pelā me se tino fakaalofa, ne maua ne ia se galuega ‵lei, kae ne avatu sāle ne ia a tupe ki tena kāiga i Alapania. Mai tua o tena vauga ki loto i te munatonu, ne kamata o akoako ne ia a te ‵gana Alapania ki se potukau o paenia fakapito i Italia kolā ka olo atu ki konā o ga‵lue i se koga telā e manakogina malosi ei a tino talai. Ne tusi mai a te taina: “Ko olo atu latou ki te koga ne tiakina ne au. E se iloa ne latou a te ‵gana kae ne fia‵fia eiloa latou ke olo atu ki ei. Alapania ko taku ‵gana mo toku fenua tonu. Ne a nei aku mea e fai i Italia?” Ne fakaiku aka ne te taina ke toe foki atu a ia ki Alapania ke fesoasoani atu i te fakasalalauatuga o te tala ‵lei. E fai mai a ia: “E mata, ne salamo au i te tiakinaga o taku galuega mo tupe i Italia? Ikai, e se tāitāi eiloa! Ne maua eiloa ne au a te galuega tonu i Alapania. I taku faka‵tau eiloa, a te galuega telā e tāua atu kae e aumai i ei a te fiafia tumau ko te tavini atu ki a Ieova mo te loto kātoa!”
11, 12. Ne a mea e ‵tau o fai ne tino kolā e mafau‵fau o olo atu ki se fenua fakaatea?
11 Te Auala ke Fai ei: A koi tuai o fanatu ki Maketonia, ne ma‵nako a Paulo mo ana taugasoa o olo atu ki te feitu ki te togala, kae “ne seki talia ne te agaga tapu,” telā ne olo atu ei latou ki te feitu ki mātū. (Galu. 16:6) I te taimi ko pilipili atu ei latou ki Pitunia, ne toe taofi latou ne Iesu. (Galu. 16:7) E tumau eiloa a Ieova e auala i a Iesu, o tausi atu ki te galuega talai. (Mata. 28:20) Tela la, kafai e mafaufau koe o fanatu ki se fenua fakaatea, ke ‵sala atu ki te takitakiga a Ieova fakatasi mo te faiga o ‵talo.—Luka 14:28-30; Iako. 1:5; ke onoono ki te pokisi “Te Auala e Iloa ei ne Koe me e Manakogina te Fesoasoani i se Fenua Telā e Mafaufau Koe ki ei.”
12 Ke fesili atu ki ne fakamatalaga ‵tonu mai toeaina mo nisi Kelisiano ma‵tua. (Faata. 11:14; 15:22) Ke fai‵tau ki mataupu ne ‵lomi ne matou e uiga ki te tavini atu i se fenua fakaatea, kae ke fai foki a nisi sukesukega ki so se fenua telā e mafaufau koe ki ei. E mata, e mafai o āsi atu koe ki te fenua telā e fia fano koe ki ei, kāti mō se taimi tai leva? Kafai ko mafaufau tonu eiloa koe ke fanatu ki se isi fenua, e mafai o tusi atu koe ki te ofisa lagolago i te fenua tenā mō nisi fakamatalaga, mai i te fakaaogaga o se fakatuatusi i te Yearbook fou. Kae i lō te avatu ‵tonu o tau tusi ki te ofisa lagolago, ke tuku atu ki toeaina o tau fakapotopotoga, kolā ka fakaopoopo atu ne latou a nisi fakamatalaga a koi tuai o lafo atu.—Ke onoono ki te tusi ko te Ne Fakatoka ke Fai te Loto o Ieova, te itulau e 111-112 , te itulau e 7-8.
13. Ka fesoasoani atu pefea a te ofisa lagolago ki a koe, kae ne a mea e panaki eiloa mo koe?
13 Ka lafo atu ne te ofisa lagolago a fakamatalaga fesoasoani e uiga ki te fenua ke fesoasoani atu i te faiga o au fakaikuga, kae e se mafai o fesoasoani atu latou i te faiga o tusi ke maua te nofo tumau, visa, io me ko nisi pepa kolā e manakogina io me ke ‵sala atu ki se fale mō koe. A mea konei ne mea totino eiloa kolā e manakogina ke mafaufau faka‵lei ki ei a koi tuai o fanatu koe. E se gata i ei, ka panaki eiloa mo koe a te fesokotaki atu ki ofisa fesoasoani o fenua konā io me ke maua a nisi fakamatalaga e uiga ki mea e manakogina i mea tau visa mo pepa ga‵lue. A tino kolā e olo atu ki nisi fenua e ‵tau eiloa o tausi ne latou a latou eiloa mo nisi mea kolā e manakogina i mea tau tulafono.—Kala. 6:5.
14. Ne a mea e ‵tau o fakaeteete i ei i te taimi e āsi io me e fanatu ei koe ki se fenua telā e fakatapu i ei a te galuega talai?
14 Fenua Kolā e Fakatapu i ei a te Galuega: I nisi fenua, e ‵tau eiloa o fakaeteete malosi a taina mo tuagane i te faiga o te lotou tapuakiga. (Mata. 10:16) A tino talai kolā e āsi io me e olo atu ki fenua penā e mafai eiloa o fai ne latou i se auala telā e seki fakamoemoegina ke ‵kilo atu a tino ki te ‵tou galuega i se auala sē ‵lei kae e fai ei ke fakamataku a te saogalēmū o ‵tou taina i konā. Kafai e mafaufau koe o fanatu ki se vaegā fenua penā, fakamolemole, ke tusi atu ki te ofisa lagolago o tou fenua e auala i te kau toeaina a koi tuai o fanatu koe.
15. E mafai pefea o momea aka ne nisi tino, kolā e se mafai o olo atu keatea, olotou mea e fai i te galuega talai i olotou fakapotopotoga?
15 Kafai ko se Mafai o Fanatu Koe: Kafai e se mafai ne koe o fanatu ki te suā fenua, ke mo a ma loto vāivāi. Kāti e “uke avanoaga konei mō te galuega” e mafai o ‵tala atu ki a koe. (1 Koli. 16:8, 9) E mafai o iloa ne te otou ovasia o te fenua a koga e manakogina i ei a te fesoasoani kolā e se ‵mao mai i tou fale. Kāti e mafai o fesoasoani atu koe ki se fakapotopotoga io me se potukau i se ‵gana fakaatea. Io me e mafai o momea aka au mea e fai i te galuega talai i tau fakapotopotoga eiloa. Faitalia me ne a ou fakanofonofoga, a te mea tāua ko tou kau atu ki te tapuakiga mo te loto kātoa.—Ko. 3:23.
16. E ‵tau o pefea ‵tou kilokiloga ki tino kolā e mafau‵fau o olo atu ki se fenua fakaatea?
16 E mata, e iloa ne koe se Kelisiano matua ‵lei i te feitu faka-te-agaga telā e fakamoemoe ke tavini atu i se fenua fakaatea? E mafai foki o ‵lago kae fakamalosi atu koe ki a ia! I te taimi ne tiakina ei ne Paulo a Sulia Anitioka, kae ko fai eiloa a te fenua tenā mo fai te tolu o fa‵kai ‵lasi i te Emupaea o Loma (mai tua o Loma mo Alesania). Ona ko te lasi o te koga talai, ne manakogina i ei ne te fakapotopotoga i Anitioka a te fesoasoani o Paulo kae ne misi malosi ne latou a ia i te taimi ne ‵tau ei o tiakina ne ia a te koga tenā. Kae e se fakaasi mai i te Tusi Tapu me ne faka‵tuka atu a taina i konā ki te fano keatea o Paulo. E foliga mai me i lō te mafau‵fau fua ki a latou eiloa, ne masaua ne latou me i te “laukele ko te lalolagi.”—Mata. 13:38.
17. Ne a pogai e ‵tau ei o mafaufau ki te ‘fanatu ki Maketonia’?
17 Ne fakamanuiagina a Paulo mo ana taugasoa i se auala lasi ‵ki mō te taliaga o te ‵kamiga ke olo atu ki Maketonia. A koi ‵nofo atu latou i te fa‵kai o Maketonia ko Filipi, ne maua atu ne latou a Litia, kae “ne ‵tala ne te Aliki tona mafaufau ko te mea ke fakalogologo ki te faipatiga a Paulo.” (Galu. 16:14) Mafaufau ki te fia‵fia o Paulo mo ana taugasoa fakamisionale i te taimi ne papatiso ei a Litia mo tena kāiga kātoa! I fenua e uke, e isi eiloa ne tino loto fakamaoni e pelā mo Litia kolā e seki lagona aka eiloa ne latou a te fekau o te Malo. Kafai e ‘fanatu koe ki Maketonia,’ e mafai eiloa o maua ne koe a te fiafia i te mauaga mo te fesoasoani atu ki a latou.
[Ata i te itulau e 5]
Te Auala e Iloa ei ne Koe me e Manakogina te Fesoasoani i se Fenua Telā e Mafaufau Koe ki ei
• Ke onoono ki te Yearbook fou. Ke onoono malosi loa ki te aofaki masani o tino talai ki te aofaki o tino i ei.
• Ke fakaaoga a te Index ke sukesuke ki mataupu mo tala mai i te fenua tenā.
• Ke faipati atu ki tino talai kolā ko oti ne āsi io me ne ‵nofo atu i te fenua tenā.
• Kafai e mafaufau koe ki se fenua telā e mafai o talai atu ei koe i tau ‵gana eiloa, ke onoono ki nisi fakamatalaga, e pelā mo te Itaneti, ke iloa aka me e tokofia a tino i ei e fai‵pati ki tau ‵gana.