Ke Fakatāua te ‵Tou Galuega Talai
1. E pefea te kilokiloga a tino e tokouke i te lalolagi ki te ‵tou galuega talai?
1 E mafau‵fau a tino e tokouke i te lalolagi a Satani me i te ‵tou galuega talai se “mea valea” fua. (1 Koli. 1:18-21) Kafai e se fakaeteete tatou, e mafai eiloa o fakaloto vāivāi kae fakaseaoga ne te vaegā kilokiloga ‵se tenei a te ‵tou loto finafinau. (Faata. 24:10; Isa. 5:20) Ne a pogai e ‵tau ei o fakatāua ne tatou te ‵tou tauliaga ke fai mo fai ne Molimau a Ieova?—Isa. 43:10.
2. Kaia e mafai ei o taku a te galuega talai me se galuega tapu?
2 Se Galuega Tapu: Ne fakamatala mai ne te apositolo ko Paulo me i te galuega talai se galuega tapu mai i te fakasino atu ki ei e pelā me se galuega fakafaifeau, telā e fakasino atu ei ki mea e fai ne tatou mō te Atua. (Loma 15:15, 16) E fai pefea a te galuega talai e pelā me se galuega tapu? A te kau atu ki ei e fai ei tatou mo fai ne “tino faigaluega e ga‵lue fakatasi” mo “te Tino Tapu,” ko Ieova, kae e fesoasoani atu tatou ki te faka‵maluga o tena igoa. (1 Koli. 3:9; 1 Pe. 1:15) E kilo mai a Ieova ki te ‵tou galuega talai e pelā me ‘se taulaga o vikiga,’ telā e fai ei a te galuega talai mo fai se vaega tāua o ‵tou tapuakiga.—Epe. 13:15.
3. Se a te mea e fai ei a te galuega talai e pelā me se tauliaga tafasili i te gali?
3 A te talaiatuga o te tala ‵lei se matugā tauliaga lasi eiloa telā e maua fua ne nai tino. Ne mafai eiloa o fai ne agelu a te galuega tenei mo te fiafia kae e iloa foki ne tatou me ka ma‵goi ‵ki eiloa latou. (1 Pe. 1:12) Kae ko oti eiloa ne filifili aka ne Ieova a tatou, tino sē ‵lei katoatoa, kolā “e ‵pau . . . mo fagu kele i te ma‵fa gofie,” mō te tauliaga tafasili i te gali tenei!—2 Koli. 4:7.
4. E mafai pefea o fakaasi atu ne tatou me e fakatāua ne tatou a te galuega talai?
4 Ko te ‵Toe Mea Tāua: Ona ko te mea e fakatāua tonu ne tatou a te ‵tou tauliaga, e ‵kilo atu tatou ki te galuega talai e pelā me se mea e tasi i mea kolā e “sili atu i te ‵lei” i ‵tou olaga. (Fili. 1:10) Tela la, e fakatoka ne tatou a taimi i vaiaso takitasi ke ‵kau atu ki ei. A te tino saka telā e fakatāua ne ia tena tauliaga ke saka i mua o tino e tokouke ka fakatokatoka faka‵lei ki taimi takitasi konā kae galue malosi ke momea aka tena apo. E penā foki loa, a te fakatoka faka‵lei o tatou mai mua o olo atu i te galuega talai ko te mea ke mafai ne tatou o “akoako tonu eiloa . . . a te munatonu a te Atua,” kae ka ga‵lue malosi tatou i te faiga ke momea aka te ‵lei o ‵tou “akoako atu.”—2 Timo. 2:15; 4:2.
5. Ko oi e fakatāua malosi ne ia ‵tou galuega talai?
5 Ke mo a ma talia ne koe a te kilokiloga a te tokoukega o tino ke fakavāivāi atu ki a koe. Masaua me koi tokouke a tino i ‵tou koga talai kolā e fakatāua ne latou ‵tou āsiga. Kae e se taumafai tatou o ‵sala atu ki te taliaga mai i tino. E sili atu i te tāua a lagonaga o Ieova, kae e fakatāua malosi eiloa ne Ia a ‵tou taumafaiga mo te loto fiafia.—Isa. 52:7.