Ke Fusu Atu mo te Poto
1. E aoga pefea a te 1 Kolinito 9:26 ki te galuega talai?
1 Ne tusi mai a te apositolo ko Paulo: “A te auala telā e tele ei au e se tele valevale fua au i ei; e penā foki māfai ko fusu au, e se fusu atu fua au ki te matagi.” (1 Koli. 9:26) Ne fakasino atu a Paulo ki tena saga tonu atu fua ki se mea e tasi mo te taumafai malosi eiloa ki ana fakamoemoega faka-te-agaga. Kae e pelā me se akoakoga fakavae, e mafai foki o fakaaoga a pati konei ki te galuega talai. E ma‵nako tatou ke “fusu” ‵tonu atu, io me ke ‵poto tatou i ‵tou taumafaiga ko te mea ke fakataunu mai i ei a toe mea ‵lei. E pefea la?
2. E mafai pefea o fakaakoako atu tatou ki a Paulo mo nisi tino talai i te senitenali muamua i te filifiliga o taimi mo koga ke talai atu ei?
2 Olo Atu ki Koga e Isi ne Tino i ei: Ne talai atu a Paulo mo nisi tino talai i te senitenali muamua i koga kolā e isi ne tino i ei. (Galu. 5:42; 16:13; 17:17) Tela la, kafai e tokouke a tino i te ‵tou koga talai e ‵nofo atu i olotou fale i te fakaafiafi, kāti tenei eiloa te ‵toe taimi ‵lei ke olo atu mai fale ki fale. E mata, e tokouke a tino i koga e ‵tu ei a pasi i tafataeao io me ko fakaafiafi i te taimi e olo atu ki galuega io me e toe ‵foki atu ki fale? Ne a taimi e ‵fonu ei a sitoa i tino i tou koga talai? Kāti e fai eiloa a taimi konei mo toe taimi ‵lei ke talai atu i auala.
3. E mafai pefea o faka‵tonu faka‵lei atu ‵tou fusu i te taimi e ga‵lue ei tatou i ‵tou koga talai?
3 Ke Galue i te Koga Talai mo te Poto: E ‵tau o faka‵tonu faka‵lei atu ‵tou fusu i se auala fakatusa i te taimi e ga‵lue ei tatou i ‵tou koga talai. E pelā mo te mea tenei, i lō te olo atu o se potukau lasi ki te koga e tasi, telā e uke a taimi mo taumafaiga e manakogina i ei kāti se mea ‵lei ke vaevae aka te potukau. E penā foki loa māfai ko ga‵lue i te vao, ka fakaoti fakavave ne tatou a te koga talai kae e uke atu foki a taimi e fai‵pati ei māfai e mu‵tana fua a tino e olo atu i loto i se motoka. E mata, e mafai o maua ne tatou se koga talai totino i tafa o ‵tou fale, telā e mafai o fakamu‵tana a taimi e faima‵laga atu ei?
4. Ne a mea ka fesoasoani mai ke fai tatou mo fai ne tino apo i te “faiika ki tino”?
4 Ne faka‵pau ne Iesu a tino talai ki “tino faiika ki tino.” (Male. 1:17) A te fakamoemoega o se tautai, e se ko te faiika fua kae ke maua ne ika. Tela la, a tautai apo e olo atu i te koga mo te taimi e fakamoe‵moe ei latou ke maua a ika, kae kamata fakavave eiloa latou o faiika. E tonu, e faka‵tonu faka‵lei eiloa olotou taumafaiga mo te poto. Ke na fakaasi atu foki ne tatou a te vaegā galue malosi penā i te ‵tou galuega talai.—Epe. 6:11.