Ke Fakaeteete Māfai ko Olo Atu i te Galuega Talai
1. Kaia e manakogina ei ke fakaeteete tatou māfai ko olo atu i te galuega talai?
1 “E pelā me ne mamoe i va o luko,” e talai atu eiloa a tavini a te Atua “i loto i te kautama fai mea piko‵piko kae ‵numi valevale.” (Mata. 10:16; Fili. 2:15) E fakaasi mai ne lipoti me i amioga fai valevale, potukau fakasaua, mo te puke fakamaseiga o tino ko fai nei mo fai ne mea masani, telā e fakamaoni mai i ei me i tāgata ma‵sei ko gasolo aka eiloa “mai te masei o na ma‵sei atu.” (2 Timo. 3:13) Ne a akoakoga fakavae i te Tusi Tapu ka fesoasoani mai ‘ke fakaeteete tatou’ i te taimi e olo atu ei tatou i te galuega talai?—Mata. 10:16.
2. Ne a tulaga e sili atu i te ‵lei ke tiaki fakavave te koga talai kae talai atu i te suā koga?
2 Gasuesue mo te Poto: E faka‵mafa mai i te Faataoto 22:3 a te poto ke ‘faka‵mao keatea tatou’ mai fakalavelave. Ke tumau i te matapula‵pula! A tulaga i kogā koga o ou tuakoi e mafai o ‵fuli fakavave. E mafai o lavea ne koe a te momea aka o te aofaki o pulisimani io me ko vaitino e oloolo atu i auala. I nisi taimi, e mafai eiloa o fakailoa mai ne se tino atafai i te fale ke fakaeteete tatou. I lō te nofo atu ona ko te fia logo, se mea poto ke tiaki fakavave a te koga tenā kae talai atu i se isi koga.—Faata. 17:14; Ioa. 8:59; 1 Tesa. 4:11.
3. E aoga pefea a te akoakoga fakavae i te Failauga 4:9 ki te ‵tou galuega talai?
3 Ga‵lue Fakatasi: “A te tokolua e ‵lei atu i te tokotasi,” ko pati i te Failauga 4:9. E tiga eiloa ko masani koe ki te galue tokotasi i te galuega talai, e mata, koi ‵lei eiloa nei ke fai penā? I nisi koga, e ‵lei. Kae i nisi koga, ko se ‵lei ke galue tokotasi se tuagane io me se talavou, maise eiloa māfai ko tō te mata o te la. Ko oti ne fakamaoni mai ne mea ‵tupu me se mea tāua ‵ki ke isi se tino e ga‵lue fakatasi mo koe. (Fai. 4:10, 12) Ke tumau i te matapulapula ki nisi tino i tau potukau. Ke fakailoa atu faeloa ne koe ki nisi tino māfai ko ‵tau o tiaki ne koe a te koga talai.
4. E mafai pefea ne tatou o ga‵lue ki te puipuiga o tino katoa i te fakapotopotoga?
4 E pelā me ko tino kolā e ‘puipui ne latou ‵tou ola,’ e panaki eiloa mo toeaina a te tiute ke tuku mai a takitakiga aoga e ‵tusa mo fakanofonofoga i te koga talai. (Epe. 13:17) E mautinoa eiloa me ka maua ne tatou a te fakamanuiaga a Ieova māfai e fakaasi atu ne tatou a te agamalu faka-Kelisiano kae ‵lago katoatoa atu ki a latou. (Mika 6:8; 1 Koli. 10:12) Ke na fesoasoani atu a tatou katoa, tavini a te Atua, ki te tukuatuga o se molimau magoi i te ‵tou koga talai, kae ke fakaeteete faeloa.