Te Auala ke Maua ei a Mea Aoga Mai i te Fakatasiga mō te Galuega Talai a Tau Potukau
1 E mata, e misi ne koe a nisi vaega o te Sukesukega a te Fakapotopotoga ki Tusi? E mu‵tana a tino e ‵kau ki ei kae e sili atu te faigofie ke fai a tali. E fai ne te mea tenei ke faigofie o ati aka a va fakataugasoa kolā e māfua mai ei te malosi i te feitu faka-te-agaga. (Faata. 18:24) Ne mafai o iloa ne te ovasia o te potukau sukesuke ki tusi a ‵tou fakanofonofoga tu ‵kese kae ne mafai ei o tuku mai ne ia a fakamalosiga totino. (Faata. 27:23; 1 Pe. 5:2, 3) Koi maua eiloa a mea aoga konei e auala i ‵tou fakatasiga mō te galuega talai i potukau.
2 Ke Gasuesue Muamua Koe: E tai ‵pau eiloa te aofaki o tino e ‵kau ki potukau talai mo te aofaki o tino ne ‵kau sāle ki potukau sukesuke ki tusi. Mai i te “ga‵lue fakatasi” mo nisi tino, e mafai eiloa o iku atu ki te mauaga o se fesokotakiga pili. (Fili. 1:27) Ko tokofia a tino i tau potukau ko oti ne ga‵lue tasi koulua? E mata, e mafai ne koe “o ‵tala aka” tou loto i te feitu tenei? (2 Koli. 6:13) E se gata i ei, e mafai ne tatou o ‵kami se tino i nisi taimi mai i ‵tou potukau ke kau mai ki ‵tou Tapuakiga a Kāiga i afiafi io me ke ‵kai fakatasi tatou. I nisi fakapotopotoga, e fakasolosolo a potukau talai ke talimālō ne latou a te failauga mai te suā fakapotopotoga. I te vaiaso o latou, e tuku fakatasi ne te potukau olotou meakai kae maopoopo fakatasi latou mō fakamalosiga faitalia me e mafai o kau atu te failauga io me ikai.
3 E tiga eiloa ko maopoopo fakalua nei a fakapotopotoga i te vaiaso, e se fakauiga i ei me ko ‵tau o mu‵tana a taimi e ‵tau ei o fai a asiga e pelā me ne tausi mamoe ki tino talai. E ‵tofi aka a ovasia o potukau ke tuku atu a fakamalosiga totino kae fakamasani foki a tino i te galuega talai. Kafai e seki ai se fakatokaga a te ovasia o tau potukau ne fai ke ga‵lue fakatasi koulua i te galuega talai, kaia e se fakamolemole atu ei koe ke ga‵lue fakatasi koulua? E se gata i ei, e ga‵lue fakatasi a te ovasia o te galuega talai mo potukau kese‵kese i fakaotiga o vaiaso, fakatasi i te masina. I fakapotopotoga tai fo‵liki kolā e mu‵tana fua a potukau talai i ei, e mafai o fakatoka ne ia ke āsi atu ki potukau takitasi konā fakalua taimi i te tausaga. E mata, e fakatoka koe ke fanatu i te galuega talai i te taimi e galue ei a ia i tau potukau?
4 E masani o ‵lei atu ke maopoopo sāle a potukau takitasi mō te galuega talai i koga kese‵kese i fakaotiga o te vaiaso. A te fakatokaga o koga e uke ke maopoopo ki ei mō te galuega talai i te taimi eiloa e tasi e mafai o faigofie atu ki tino talai ke faima‵laga atu ki fakatasiga mō te galuega talai kae kāti ki te koga talai foki. E mafai o fakatoka fakavave a tino talai kae kamata o olo atu ki te koga talai e aunoa mo te fakatalave. E faigofie atu foki mō te ovasia o te potukau ke saga tonu atu ki tino mai lalo i tena tausiga. I nisi taimi, kāti e ‵lei atu ke tapani fakatasi se avā potukau. Kafai e maopoopo fakatasi a te fakapotopotoga kātoa mō te galuega talai i te Aso Ono muamua o masina katoa io me mai tua o te Sukesukega ki te Faleleoleo Maluga, e masani eiloa o aoga ki potukau takitasi ke saga‵saga fakatasi mo te ovasia o te lotou potukau ko te mea ke fakaaoga a nai minute ki te fakatokaga o tena potukau a koi tuai o fakaoti a te fakatasiga mō te galuega talai ki se ‵talo.—Ke onoono ki te pokisi “E Mata, e Mafai o Fakaaoga Tou Fale?”
5 E tiga eiloa ko oti ne fakagata a te fakatokaga o Sukesukega a te Fakapotopotoga ki Tusi, e tumau eiloa a Ieova i te fakatokaga o mea katoa e manakogina ne tatou ke fai tena loto. (Epe. 13:20, 21) Mai lalo i te tausiga a Ieova, e seai se mea e ma‵tiva ei tatou. (Sala. 23:1) E uke ‵ki a fakamanuiaga e maua mai e auala i ‵tou potukau talai. Kafai e gasue‵sue muamua tatou kae ‘‵toki a fuaga e uke,’ ka uke ‵tou “mea e tau.”— 2 Koli. 9:6.
[Fesili mo te Sukesukega]
1. Ne a mea aoga mai i te Sukesukega a te Fakapotopotoga ki Tusi koi maua eiloa e auala i ‵tou fakatasiga mō te galuega talai i potukau?
2. E mafai pefea o gasue‵sue muamua tatou ke ati aka a va fakataugasoa i te ‵tou potukau talai kolā e māfua mai ei a fakamalosiga faka-te-agaga?
3. Ne a nisi avanoaga e mafai ei o maua ne tatou a asiga a tausi mamoe i te ‵tou potukau talai?
4. (a) E fakatoka pefea a fakatasiga mō te galuega talai? (e) Kaia e ‵tau ei o mafau‵fau tatou ki te fakaaogaga o ‵tou fale mō te galuega talai?
5. E tiga eiloa ko oti ne fakagata a Sukesukega a te Fakapotopotoga ki Tusi, se a te mea telā e tali‵tonu tatou ki ei?
[Pokisi i te itulau e 6]
E Mata, e Mafai o Fakaaoga Tou Fale?
I nisi fakapotopotoga, e tapani fakatasi a potukau mō te galuega talai i te fakaotiga o te vaiaso ona ko te mea e se lava a fale ke maopoopo ki ei. A fakatasiga mō te galuega talai se fakatokaga fakaopoopo a te fakapotopotoga, tela la, a te fakaaogaga o tou fale se tauliaga tonu eiloa. E mata, e mafai o fakaaoga ‵tou fale? Ke mo a ma fakatalave koe ona ko te mea e se ‵lei tou fale. Ka mafau‵fau faka‵lei a toeaina ki te koga e tu ei tou fale mo nisi mea aka penā i te taimi e filifili aka ei a koga ke maopoopo mō potukau suke‵suke. Kafai e fia fakaaoga tou fale, ke na fakailoa atu ki te ovasia o te otou potukau.