Fesoasoani Atu ke “‵Mautakitaki i te Fakatuanaki”

Se mea gali ke lavea atu a te auala e fakamanuia ei ne Ieova a te fakamaopoopomaiga o tino, telā ko silia atu i te kuata miliona o tino e papatiso i tausaga takitasi. (Teu. 28:2) Kafai ko oti ne fesoasoani atu se tino talai ki se tino akoga ke papatiso, e mafai eiloa o manako te tino talai ke fakagata tena akoga kae saga tonu ki te fesoasoani atu ki nisi tino. Kati e manako foki te tino akoga ke fakagata tena akoga ko te mea ke uke atu ana taimi e fakamāumāu ki te galuega talai. Kae se mea tāua ‵ki ke maua ne te akoga faka-te-Tusi Tapu se fakavae ‵lei i te munatonu. E ‵tau o ‘‵mau olotou aka’ i a Keliso kae ‘‵mautakitaki i te fakatuanaki.’ (Kol. 2:​6, 7; 2 Timo. 3:12) Tela la, kafai ko oti ne papatiso se tino akoga, e ‵tau o faka‵soko tena akoga faka-te-Tusi Tapu ke oko eiloa ki te taimi e palele i ei i a ia a tusi ko te Akoakoga a te Tusi Tapu mo te “Alofa o te Atua.”​—Ke onoono ki Te ‵Tou Galuega Talai i a Apelila 2011, te itulau e 2.