Te Auala ke Fai se Akoga Faka-te-Tusi Tapu Telā ka Iku Atu ki te Papatisoga—Vaega Muamua

1. E fesoasoani mai pefea te 2 Kolinito 3:1-3 ke loto fakafetai tatou ki te tauliaga ke fai a akoga faka-te-Tusi Tapu kolā ka iku atu ki te papatisoga? (Onoono ki te ata i te ‵kava)

NE A ou lagonaga ma kilo atu koe ki se tino akoga faka-te-Tusi Tapu i tau fakapotopotoga, ko papatiso? E mautinoa me ne fiafia ‵ki eiloa koe. (Mata. 28:19) Kae kafai ne fai ne koe te akoga a te soko fou tenā, se mea fakafiafia ke kilo atu koe ki a ia ko papatiso! (1 Tesa. 2:19, 20) A soko ‵fou kolā ne papatiso e fai pelā me ne “pepa fakatalitonu” ‵lei ki te fakapotopotoga kātoa kae e se ki a latou fua kolā ne fai ne latou olotou akoga.—Faitau te 2 Kolinito 3:1-3.

2. (a) Se a te fesili tāua e ‵tau o mafau‵fau tatou ki ei kae kaia? (e) Se a te akoga faka-te-Tusi Tapu? (Onoono ki te fakamatalaga mai lalo.)

² Se mea gali ‵ki ke lavea atu me i te fa tausaga ko ‵teka, ne masani o lipoti mai me nofo ki se 10,000,000 akoga faka-te-Tusi Tapub e fai i masina katoa i te lalolagi kātoa. Kae i tausaga foki loa konā, e masani o silia atu mo te 280,000 a tino e papatiso i tausaga katoa ke fai pelā me ne Molimau a Ieova mo soko ‵fou o Iesu Keliso. E fesoasoani atu pefea tatou ki te fia miliona o akoga faka-te-Tusi Tapu ke papatiso latou? I te taimi tenei koi tuku atu ne Ieova te avanoaga ki tino ke fai mo fai ne soko o Keliso, e ma‵nako tatou o fai te ‵toe mea e mafai ne tatou o fai ke fesoasoani atu ki a latou ke ga‵solo ki mua kae ke papatiso. Ko toetoe ‵ki te taimi!—1 Koli. 7:29a, 1 Pe. 4:7.

3. Ne a mea ka sau‵tala tatou ki ei i te mataupu tenei e uiga ki te faiga o akoga faka-te-Tusi Tapu?

³ Ona ko te manakogina malosi ke fai a soko, ne fai se savea ki ofisa lagolago ke iloa aka a te auala e mafai ei o fesoasoani tatou ki ‵tou tino a‵koga faka-te-Tusi Tapu ke ga‵solo ki mua ki te papatisoga. I te mataupu tenei mo te suā mataupu, ka onoono tatou ki mea e mafai o tauloto ne tatou mai paenia apo, misionale, mo ovasia o te seketi.c (Faata. 11:14; 15:22) E fakamatala mai ne latou a mea kolā e mafai o fai ne faiakoga mo olotou tino a‵koga ko te mea ke mafai o aoga te lotou akoga faka-te-Tusi Tapu. I te mataupu tenei ka sau‵tala tatou ki mea e lima e ‵tau o fai ne tino a‵koga ko te mea ke ga‵solo faeloa latou ki mua ki te papatisoga.

FAI TE AKOGA I VAIASO KATOA

4. Se a te mea e ‵tau o iloa ne tatou e uiga ki te faiga o akoga faka-te-Tusi Tapu i se taimi toetoe?

⁴ E tokouke a taina mo tuagane e fai ne latou olotou akoga faka-te-Tusi Tapu i se taimi toetoe fua, i nisi taimi i te mataloa eiloa o te tino akoga. E tiga loa e gali te faifaiga tenei ke ati aka te fiafia o te tino ki te Tusi Tapu, e masani fua o toe‵toe a sau‵talaga konei kae mafai o se fai i vaiaso katoa. Ke ati aka te fiafia o te tino, e fakamolemole atu a nisi taina mo tuagane ki te napa telefoni o te tino fiafia tenā, tenā ko telefoni io me lafo ei ne latou se fekau ki te tino tenā ke fakaasi atu ki a latou se manatu gali mai te Tusi Tapu. A vaegā sau‵talaga penei e mafai o fai i loto i se fia masina e aunoa mo se faiga o se akoga faka-te-Tusi Tapu magoi. E mata, e mafai o gasolo ki mua te tino akoga ki te Tusi Tapu ke fai tena tukuatuga kae papatiso māfai e fai faeloa penā a te lua akoga? Ailoga.

5. E ‵tusa mo te Luka 14:27-33, se a te mea ne faka‵mafa mai ne Iesu telā e mafai o fesoasoani ki a tatou i ‵tou galuega ko te faiga o soko?

⁵ I se taimi e tasi ne fakamatala mai ne Iesu a mea e manakogina ke fai ne se tino māfai e manako a ia o fai pelā me se soko. Ne faipati a ia e uiga ki se tino telā e manako o faite ne ia se taoa mo se tupu telā e manako o fano ki te taua. Muna a Iesu me ‵tau mo te tino tenā o “nofo muamua ki lalo o galue tena ‵togi” me mata e mafai o fakaoti ne ia te taoa, kae ‵tau mo te tupu o “sagasaga muamua ki lalo o mafaufau” me mata e mafai ne tena kautau o fakataunu te mea e ma‵nako latou ki ei. (Faitau te Luka 14:27-33.) Tela la, ne iloa ne Iesu me i te tino telā e manako o fai mo fai sena soko, e ‵tau o iloilo faka‵lei muamua ne ia a mea kolā e manakogina ke fai ne ia ke tautali atu i a ia. Ona ko te mea tenā, e ‵tau o fakamalosi ne tatou a ‵tou a‵koga faka-te-Tusi Tapu ke fai olotou akoga i vaiaso katoa. E fai pefea ne tatou a te mea tenā?

6. Ne a mea e mafai ne tatou o fai ke ga‵solo ki mua ‵tou akoga faka-te-Tusi-Tapu?

⁶ Ke kamata mai te faiga ke tai ‵loa atu a akoga kolā ne fai i se taimi toetoe. Kāti e mafai o fakaopoopo ne koe se suā tusi faitau ke sau‵tala koulua ki ei i so se taimi e āsi atu ei koe. Kafai ko masani te tino i te fale ki sau‵talaga ‵loa, fesili atu ki ei me mafai o fakaavanoa mai ne ia se taimi tai leva ke sau‵tala koulua ki se mataupu mai te Tusi Tapu. E mafai o lavea ne koe i te tali a te tino i te fale me mata e fakatāua ne ia tena akoga faka-te-Tusi Tapu io me ikai. Fakamuli loa, ko te mea ke gasolo ki mua tena akoga, e mafai o fesili atu koe ki a ia me fiafia a ia ke fai tena akoga fakalua taimi i te vaiaso. Kae koi isi ne mea e ‵tau o fai i tafa o te faiga o te akoga fakatasi io me fakalua i te vaiaso.

FAKATOKA MŌ AKOGA TAKITASI

7. E fakatoka faka‵lei pefea se faiakoga ki akoga faka-te-Tusi Tapu takitasi?

⁷ E pelā me ko te faiakoga, e ‵tau mo koe o fakatoka faka‵lei mō akoga faka-te-Tusi Tapu takitasi. Kamata mai te faitau ki te mataupu kae onoono foki ki tusi fai‵tau. Fai ke maina faka‵lei koe i manatu tāua. Mafaufau ki te matua o te mataupu, ulutala fo‵liki, fesili i pokisi, tusi “fai‵tau” kolā e ‵tau o faitau, ata, mo so se vitio telā e mafai o aoga ki te mataupu. Ka oti ko mafaufau ei koe ki tau tino akoga, mo te auala ke fakamatala atu ei ne koe a manatu i se auala faigofie ko te mea ke mafai o malamalama kae fakagalue ne tau tino akoga.—Nee. 8:8; Faata. 15:28a.

8. Se a te mea e akoako mai ne pati a Paulo i te Kolose 1:9, 10 e uiga ki te faiga o ‵talo mō ‵tou akoga faka-te-Tusi Tapu?

⁸ I te taimi e fai ei au fakatokaga, ‵talo ki a Ieova e uiga mō tau tino akoga pelā foki mo ana manakoga. Fakamolemole atu ki a Ieova ke fesoasoani ki a koe ke fai ke ‵goto a akoakoga mai te Tusi Tapu ki te loto o te tino. (Faitau te Kolose 1:9, 10.) Taumafai o mafaufau māfai e isi se mea telā e faigata ke malamalama ei tau tino akoga io me talia ne ia. Ke masaua me taumafai koe o fesoasoani atu ke papatiso a ia.

9. E fesoasoani atu pefea te faiakoga ki tena tino akoga ke fakatoka ki tena akoga? Fakamatala mai.

⁹ E fakamoe‵moe tatou me auala i se akoga telā e fai faeloa, ka fesoasoani atu te mea tenā ki te tino akoga ke loto fakafetai a ia ki mea ko oti ne fai ne Ieova mo Iesu, kae ke manako foki a ia o tauloto ki mea e uke atu. (Mata. 5:3, 6) E ‵tau mo te tino akoga o saga tonu ki ana mea e tauloto ko te mea ke aoga ki a ia tena akoga. Ke iloa ne ia o fai te mea tenā, fakamatala atu ki a ia te tāua ke fakatoka a ia mō akoga takitasi mai te faitau ki te mataupu koi tuai o fai te akoga, kae ke mafaufau ‵loto ki te aoga o te mataupu tenā ki a ia. E fesoasoani atu pefea te faiakoga ki a ia? Ke fakatoka fakatasi ne koulua se mataupu ke fakaasi atu ki te tino akoga te auala e fakatoka ei.d Fakaasi atu ki ei te auala ke maua a tali ‵tonu ki fesili kae fakaasi atu foki me kafai e māka ne ia a pati mo fuaiupu tāua, ka fesoasoani atu te mea tenā ke masaua ne ia a tali. Ko fai atu ei ke fai mai ne ia te tali i ana pati eiloa. Kafai e fai a ia penā ka iloa ne koe me malamalama ‵lei a ia i te mataupu. Kae isi foki se suā mea telā e mafai o fakamalosi ne koe ke fai ne tau tino akoga.

AKOAKO A IA KE FESOKOTAKI KI A IEOVA I ASO KATOA

10. Kaia e tāua ei ke faitau ki te Tusi Tapu i aso katoa, kae ne a mea e ‵tau o fai ke aoga te faitauga ki te Tusi Tapu?

¹⁰ I tafa o tena akoga telā e fai faeloa mo tena faiakoga i vaiaso takitasi, ka maua foki ne te tino akoga a mea aoga māfai e fai ne ia ne mea i a ia eiloa. E ‵tau mo ia o fesokotaki ki a Ieova. Pefea la? Mai te fakalogologo ki a Ieova kae faipati atu ki a ia. E mafai o fakalogo a ia ki te Atua mai te faitau ki te Tusi Tapu i aso takitasi. (Iosu. 1:8; Sala. 1:1-3) Fakaasi ki a ia te auala ke fakaaoga te fakasologa ki te faitauga o te Tusi Tapu telā e maua i te jw.org.e E tonu, ko te mea ke aoga ki a ia tena faitauga ki te Tusi Tapu, fakamalosi atu ki a ia ke mafaufau ‵loto ki mea kolā e akoako mai ne te Tusi Tapu e uiga ki a Ieova mo te auala e mafai o fakagalue ne ia ana mea ne tauloto i tena olaga totino.—Galu. 17:11; Iako. 1:25.

11. E tauloto pefea se tino akoga ke iloa ne ia o fai ana ‵talo, kae kaia e tāua ei ki a ia ke ‵talo faeloa ki a Ieova?

¹¹ Fakamalosi tau tino akoga ke faipati ki a Ieova e auala i te ‵talo i aso takitasi. Ke ‵talo mai tou loto māfai ko kamata io me fakaoti tau lua akoga kae ke ‵talo fakatasi mo tau tino akoga kae aofia foki a ia i tau ‵talo. Kafai e fakalogologo a ia ki au ‵talo, ka tauloto ne ia te auala ke ‵talo a ia mai tena loto kae ke ‵talo foki a ia mo te loto fakamaoni ki a Ieova te Atua i te igoa o Iesu Keliso. (Mata. 6:9; Ioa. 15:16) Mafaufau la ki te aoga o te faitau faeloa ki te Tusi Tapu i aso takitasi (ko te fakalogologo ki a Ieova) mo te faiga o ‵talo (ko te faipati ki a Ieova) ki tau tino akoga ke fakapilipili atu ki te Atua! (Iako. 4:8) Ka fesoasoani atu eiloa a faifaiga masani konei ki tau tino akoga ke gasolo ki mua kae ke fai tena tukuatuga kae papatiso.

FESOASOANI ATU KE ATI AKA NE IA SE VA FAKATAUGASOA MO IEOVA

12. E fesoasoani atu pefea te faiakoga ki te tino akoga ke ati aka ne ia se va fakataugasoa mo Ieova?

¹² A mea kolā e tauloto ne se tino akoga i tena akoga faka-te-Tusi Tapu e ‵tau o ‵goto tonu ifo ki tena loto kae e se ki tena mafaufau fua. Kaia? Me i ‵tou loto—telā e aofia i ei ‵tou manakoga mo ‵tou lagonaga—e fakamalosi aka i ei tatou ke ga‵sue o fai se mea. Ne fakaaoga ne Iesu a fakamatalaga manino kolā ne fia‵fia ki ei a tino. Kae ne tau‵tali a tino i a ia me ne ‵goto foki ana akoakoga ki olotou loto. (Luka 24:15, 27, 32) E ‵tau mo tau tino akoga o kilo atu ki a Ieova e pelā me se Tino tonu, se tino telā e mafai o ati aka ne ia se va fakataugasoa mo ia, kae ke kilo atu foki ki a Ia e pelā me ko tena Tamana, tena Atua, mo tena Taugasoa. (Sala. 25:4, 5) I te taimi e fai ei te akoga faka-te-Tusi Tapu, fai ke lavea ne tau tino akoga a te ‵gali o uiga o te Atua. (Eso. 34:5, 6; 1 Pe. 5:6, 7) I tafa o te mataupu e sau‵tala koulua ki ei, ke saga tonu o faka‵mafa atu me ko Ieova se vaegā Tino pefea. Fesoasoani ki tau tino akoga ke malamalama i uiga ‵gali o Ieova—tena alofa, tena atafai mo tena alofa atafai. Muna a Iesu me i te “‵toe fakatonuga sili kae tū muamua” ko te “alofa ki a Ieova tou Atua.” (Mata. 22:37, 38) Fesoasoani ki tau tino akoga ke alofa ki te Atua mai tena loto.

13. Taku mai se fakaakoakoga ki te auala e mafai o fesoasoani koe ki se tino akoga ke iloa ne ia a uiga o Ieova.

¹³ I taimi e sau‵tala ei koe mo tau tino akoga, fakaasi atu ki a ia te pogai e alofa ei koe ki a Ieova. E mafai o fesoasoani atu te mea tenei ki tau tino akoga ke iloa ne ia me ‵tau o ati aka ne ia se va fakataugasoa ‵pili mo te Atua. (Sala. 73:28) E pelā me se fakaakoakoga, e mata e isi se fuaiupu i te tusi telā e fai ei tau lua akoga io me se tusi faitau telā e fakaasi mai ei se mea e uiga ki a Ieova—tena alofa, tena poto, tena fai mea tonu, io me ko tena malosi—telā ne otia malosi ei tou loto? Taku atu te mea tenā ki tau tino akoga, kae fai ke iloa ne ia me i te mea tenā se pogai e tasi mai pogai e uke e alofa i ei koe ki te ‵tou Tamana faka-te-lagi. E isi foki se suā mea telā e ‵tau o fai ne tino a‵koga katoa ki te Tusi Tapu ko te mea ke mafai o gasolo a ia ki mua ki te papatisoga.

FAKAMALOSI ATU KE KAU KI FAKATASIGA A TE FAKAPOTOPOTOGA

14. Se a te mea e fakaasi mai i te Epelu 10:24, 25 ki a tatou e uiga ki fakatasiga a te fakapotopotoga kolā e mafai o fesoasoani ki tau tino akoga ke gasolo ki mua?

¹⁴ A tatou katoa e ma‵nako ko ‵tou tino a‵koga ke ga‵solo ki mua ki te papatisoga. Tasi te auala tāua e mafai o fesoasoani tatou ki a latou ko te fakamalosi atu ke ‵kau mai ki fakatasiga a te fakapotopotoga. E fai mai a faiakoga apo me i tino a‵koga kolā e ‵kau vave mai ki fakatasiga e ga‵solo vave foki ki mua. (Sala. 111:1) E fakamatala atu ne nisi faiakoga ki olotou tino a‵koga me i te āfa o olotou mea e tauloto mai te Tusi Tapu e maua mai te lotou akoga faka-te-Tusi Tapu kae ko te suā āfa e maua mai i fakatasiga. Faitau te Epelu 10:24, 25 fakatasi mo tau tino akoga kae fakamatala atu ki a ia a mea aoga ka maua ne ia māfai e vau ki fakatasiga. Pei te vitio ko te Ne a Mea e Fai i se Kingdom Hall?f ke onoono a ia ki ei. Fesoasoani ki tau tino akoga ke fakatāua ne ia te kau mai faeloa ki fakatasiga i vaiaso takitasi pelā me se mea tāua i tena olaga.

15. Ne a ‵tou mea e mafai o fai ke fakamalosi atu ki se tino akoga ke kau mai faeloa ki fakatasiga?

¹⁵ Ne a mea e mafai o fai ne koe māfai a tau tino akoga e seki kau eiloa ki se fakatasiga io me e se ti kau faeloa ki ei? Ke fakaasi atu ki a ia mo te fiafia se mea telā ne gali ki a koe mai te fakatasiga fakamuli nei. E sili atu te fakamalosi loto te mea tenā i lō te ‵kami fua ne koe te tino ke kau mai. Tuku atu ki ei Te Faleleoleo Maluga io me ko te tusi ko te ‵Tou Olaga Kelisiano mo te Galuega Talai telā e sukesuke nei ki ei i te fakatasiga. Fakaasi atu a mea kolā ka sau‵tala ki ei i te suā fakatasiga kae fesili atu me se a te vaega e gali malosi ki a ia. A te mea telā ka lavea ne tau tino akoga i te fakatasiga muamua e kau a ia ki ei, ka sili fakafia atu i te gali i lō so se maopoopoga fakalotu ne kau a ia ki ei. (1 Koli. 14:24, 25) Ka fetaui a ia mo nisi tino kolā e mafai o fakaakoako a ia ki te lotou fakaakoakoga ‵lei kae ka fesoasoani foki ki a ia ke gasolo ki mua ki te papatisoga.

16. E fai pefea ne tatou a akoga faka-te-Tusi Tapu ke iku atu ki te papatisoga, kae ne a mea ka tauloto ne tatou i te suā mataupu?

¹⁶ E fai pefea ne tatou a akoga faka-te-Tusi Tapu kolā ka mafai o iku atu ki te papatisoga? Fesoasoani atu ki tino a‵koga takitasi ke lavea ne ia te tāua o tena akoga kae fakamalosi atu ki a ia ke fai tena akoga i vaiaso katoa kae ke fakatoka mō akoga takitasi. E ma‵nako foki tatou o fakamalosi a ia ke fesokotaki ki a Ieova i aso katoa kae ke ati aka se va fakataugasoa ‵pili mo Ia. E ma‵nako foki tatou o fakamalosi atu ki te tino akoga ke kau mai faeloa ki fakatasiga a te fakapotopotoga. (Onoono ki te pokisi “Mea e ‵Tau o Fai ne Tino A‵koga ke Ga‵solo ki Mua Kae Papatiso.”) Kae pelā mo te mea ka fakamatala mai i te suā mataupu, e isi ne nisi mea e lima kolā e manakogina ke fai ne se faiakoga ki te Tusi Tapu ke takitaki ei tena tino akoga ki te papatisoga.