Faiga o A‵koga Faka-te-Tusi Tapu Ma‵goi
1. Se a te tiute e maua ne tino talai kolā e fai ne latou a a‵koga faka-te-Tusi Tapu?
1 E seai se tino e mafai o tavini atu ki te Atua vaganā ke “talia a ia” ne Ieova. (Ioa. 6:44) Tela la, a tino talai kolā e fai ne latou a a‵koga faka-te-Tusi Tapu, e ‵tau o fai olotou tusaga i te fesoasoani atu ki tino ke fakapili‵pili atu ki te lotou Tamana faka-te-lagi. (Iako. 4:8) E manakogina i konei a fakatokaga. A te faitau atu fua o palakalafa takitasi kae ‵sili atu a fesili e se lava i ei a te malamalama o te tino akoga ke maua ne ia te fekau kae fai ei ke gasolo a ia ki mua.
2. Se a te ikuga e mafai o maua mai i se akoga faka-te-Tusi Tapu magoi?
2 Ke magoi te faiga o akoga, e ‵tau o fesoasoani atu a tino talai ki olotou tino a‵koga ke (1) malamalama i mea kolā e akoako mai i te Tusi Tapu, (2) ke talia a mea e akoako mai i ei, kae (3) ke fakagalue aka a akoakoga mai te Tusi Tapu. (Ioa. 3:16; 17:3; Iako. 2:26) E mafai o lau i ne masina ke akoako ei se tino ki auala konei. Masaua, me i te fakagaluegaga o auala konā, ko te atiakaga foki tenā o tena fesokotakiga mo Ieova kae fai i ei sena fakaikuga ke tuku atu ki a ia.
3. Kaia e ‵tau ei mo faiakoga apo o ‵sili atu a fesili mo te atamai?
3 Ne a Mafaufauga o se Tino Akoga ki te Tusi Tapu?: Ke iloa ne tatou me e mata e malamalama io me talia ne te tino akoga ki te Tusi Tapu a mea e tauloto ne ia, ke fakatuai koe o faipati kae ke fakamalosi atu ki te tino akoga ke fakaasi mai ana manatu. (Iako. 1:19) E mata, e malamalama a ia i pati a te Tusi Tapu e uiga ki te mataupu e suke‵suke ki ei? E mafai ne ia o fakamatala mai te manatu tenā i ana pati eiloa? E pefea ana lagonaga e uiga ki mea ne tauloto ne ia? E mata, e talitonu a ia me e ‵tonu a mea e akoako mai i te Tusi Tapu? (1 Tesa. 2:13) E mata, e malamalama a ia me i mea kolā e tauloto ne ia e ‵tau fakagalue ne ia i tena olaga? (Ko. 3:10) Ko te mea ke maua a tali ki vaegā fesili penā, e ‵tau o ‵sili ne ia a fesili mo te atamai, kae ke toka o fakalogologo.—Mata. 16:13-16.
4. Ne a mea e ‵tau o fai ne tatou māfai e faigata ki te tino akoga ke malamalama io me ke fakagalue ne ia a mea kolā ne akoako atu ki a ia mai te Tusi Tapu?
4 A uiga mo mafaufauga masani ne mea kolā ne ‵tupu aka mo tatou kae e faigata faeloa o tiaki ne tatou. (2 Koli. 10:5) E a māfai e se talia io me sē fakagalue ne te tino akoga a mea kolā ne tauloto ne ia? E manakogina eiloa te kufaki ke mafai o fakaavanoa atu se taimi ke galue te Muna a te Atua mo te agaga tapu i te loto o te tino akoga. (1 Koli. 3:6, 7; Epe. 4:12) I lō te faimālō ne tatou a ia, se mea ‵lei ke olo atu ki te suā mataupu māfai e faigata ki te tino akoga ke malamalama io me ke fakagalue se akoakoga mai te Tusi Tapu. Kafai e tumau i te akoako atu ne tatou a ia ki te Tusi Tapu i se auala kufaki kae alofa, ka gasuesue eiloa a ia i te taimi tonu o fai a fakamafuli‵fuliga.