Te Toetuga​—Ne Mafai o Fai Ona ko te Togiola

E tuku mai ne te Fakamanatuga se avanoaga ‵lei ke mafau‵fau ki fakamanuiaga i aso mai mua kolā ne mafai o maua ona ko te togiola, e pelā mo te toetuga. Ne seki manako lele eiloa a Ieova ke ‵mate a tino. Tenā loa te pogai e fai a te loto mafatia i te mate o se tino pele mo fai te ‵toe lagonaga fakalogo‵mae e fe‵paki mo tatou. (1Ko 15:26) Ne logo‵mae a Iesu i te laveaga ne ia o te tagi fanoa‵noa o ana soko i te mate o Lasalo. (Ioa 11:33-35) Ona ko Iesu se fakaasiga ‵lei katoatoa o tena Tamana, e mafai o tali‵tonu tatou me e logo‵mae foki a Ieova i te ‵mate o ‵tou tino pele. (Ioa  14:7) E olioli eiloa a Ieova mo te loto finafinau ki te taimi telā ka toe faka‵tu aka ei ana tavini mai te mate, kae e ‵tau foki o fai tatou penā.—Iop 14:14, 15.

Ona ko Ieova se Atua o te tokagamalie, se mea ‵lei ke tali‵tonu me ka fai eiloa a te toetuga i se auala tokagamalie. (1Ko 14:33, 40) I lō te faiga o mate, ka fai ne tatou a maopoopoga mō te fakafetaui atu ki tino kolā ka toe‵tu mai. E mata, e mafaufau ‵loto koe ki te toetuga, maise eiloa i taimi loto mafatia? (2Ko 4:17, 18) E mata, e fakafetai atu koe ki a Ieova mō te tukumaiga ne ia o te togiola mo te fakaasimaiga i te Tusi Tapu me ka toe ola mai a tino ‵mate?—Ko 3:15.

• Ko oi ou taugasoa mo kāiga e olioli eiloa koe ke toe fetaui koutou?

• Ko oi te tino i te Tusi Tapu e manako malosi koe ke fetaui kae sau‵tala koulua?