Te Fakamoemoega ko te Toetu​—Se a Tena Uiga mō Koe?

“E tuku ne koe ki ei a mea e lava mō latou, kae fakamalie ne koe olotou manako.”​—Salamo 145:16.

1-3. Se a te fakamoemoega ne maua ne nisi tino mō aso mai mua? Fakamatala mai.

NE ‵KAU atu a Christopher, telā ko iva ana tausaga mo tena taina matua ki te lā fakatamana, te lā fakamātua mo lā fakataina e tokolua i te tafataeao e tasi i te faiga o te galuega faka-Kelisiano mai fale ki fale i Manchester, Egelani. E fakamatala mai i te ‵tou mekesini ko te Awake!, a te mea telā ne tupu. “I te fakaafiafi, ne ma‵laga atu latou o maimoa i nisi koga lauiloa ke oko ki Blackpool, se koga i te tafatai telā e ‵tu ei a fale talimālō kae telā e se na ko ‵mao. Ne aofia te toko 6 konei i tino e toko 12 kolā ne ‵mate i te taimi ne fe‵paki ei a motoka i te auala lasi, telā ne fakamatala mai ne pulisimani me se ‘fakalavelave tafasili i te masei.’”

² I te po mai mua o te fakalavelave tenā, ne ‵kau atu te kāiga tenei ki te Akoga a te Fakapotopotoga ki Tusi, telā ne sautala i ei ki te mataupu e uiga ki te mate. “A Christopher se tamaliki telā e ‵gali ana uiga,” ko pati a tena tamana. “I te po tenā, ne manino ‵lei tena faipatiga e uiga ki te lalolagi fou mo tena fakamoemoega mō aso mai mua. Kae ne faipati fakapoi mai a Christopher i ana pati: ‘A te mea e gali ei ke fai pelā me se Molimau a Ieova me e tiga eiloa e logo‵mae tatou i te mate o se tino, e iloa ne tatou me ka toe fetaui tatou katoa i se aso e tasi i te lalolagi nei.’ E seai eiloa se tino i a matou i te po tenā ne iloa ne ia me ka masaua faeloa ne matou a pati konā.”a

³ I te fia o tausaga mai mua atu, i te 1940, ne iloa ne Franz, se Molimau mai Austria, me ka tamate a ia ona ko tena ita fitifiti ma fakagata tena fakamaoni ki a Ieova. Ne tusi atu a Franz ki tena mātua mai te falepuipui i Berlin: “E ‵tusa mo mea ko iloa ne au, moi fai ne talia ne au ke fai saku tautoga [ fakakautau], ko fai eiloa ne au se agasala telā e ‵tau ei o fakasala au ki te mate. Se mea sē fakamaoni eiloa te mea tenā ki a au. Ka se maua ne au i ei te toetu. . . . Kae nei la, e toku Mātua pele mo oku taina mo tuagane katoa, i te aso nei ko oti ne maua toku ikuga, kae ke se ma‵taku koutou, e ‵tau au o tamate, kae ka tamate au i te tafataeao ma taeao. E maua ne au te malosi mai te Atua, e pelā eiloa mo te malosi telā ne maua ne Kelisiano ‵tonu katoa i aso mua. . . . Kafai e tu ‵mautakitaki koutou ke oko ki te mate, ka toe fetaui eiloa tatou e auala i te toetu. . . . Toe fetaui fakamuli.”b

4. Ne a ou lagonaga e uiga ki tala konei, kae ne a mea ka sau‵tala tatou ki ei?

⁴ Ne lasi ‵ki te aogā o te fakamoemoega e uiga ki te toetu ki a Christopher mo Franz. Ne fai eiloa mo fai se mea tonu ki a laua. E mautinoa eiloa me ne otia malosi ‵tou loto i tala konei! Ko te mea ke faka‵loto aka a ‵tou loto fakafetai ki a Ieova kae fakamalosi aka te ‵tou fakamoemoega ki te toetu, ke na sau‵tala tatou ki te pogai e fai ei te toetuga mo te auala ka pokotia ei tatou taki tokotasi i ei.

Fakaasiga o te Toetuga ki te Lalolagi

5, 6. Se a te mea e fakaasi mai i te fakaasiga telā ne tusi ne te apositolo ko Ioane i te Fakaasiga 20:​12, 13?

⁵ I se fakaasiga e uiga ki mea ka ‵tupu i te Pulega a Keliso Iesu i te Afe Tausaga, ne lavea ne te apositolo ko Ioane i ei te ‵toe faka‵tumaiga o tino ki te lalolagi. “Ne matea ne au a tino ‵mate, tino ma‵luga io me ko tino ma‵lalo ko ‵pau eiloa,” ko tena lipoti. “Ne tuku ake foki ne te tai ona tino ‵mate. A te mate mo Seoli ne tuku ake foki ne laua a lā tino ‵mate.” (Fakaasiga 20:​12, 13) Faitalia te tulaga o te tino​—me “ma‵luga” io me “ma‵lalo”​—ka toe fakasaoloto mai a tino katoa kolā ne falepuipui i Heitisi (Seoli), ko te tānuga masani o tino. A tino foki kolā ne ‵mate i te tai ka toe fakaola mai katoa i te taimi tenā. A te faifaiga gali tenei se vaega eiloa e tasi o fuafuaga a Ieova.

⁶ E kamata eiloa te pulega a Keliso i te afe tausaga ki te ‵saiga o Satani. Ka seai se tino i a latou kolā ka toe faka‵tu aka io me ko tino kolā e ‵sao atu i te fakalavelave lasi ka toe takitaki ‵se ne Satani mai lalo i te pulega tenā, me ka se toe gasuesue a ia i te taimi tenā. (Fakaasiga 20:​1-3) Kāti e mafaufau koe me i te afe tausaga se taimi leva ‵ki, kae e kilo atu a Ieova ki ei e pelā fua me se “aso e tasi.”​—2 Petelu 3:8.

7. Se a te mea ka fakavae ki ei te fakamasinoga i te Pulega a Keliso i te Afe Tausaga?

⁷ E ‵tusa mo te fakaasiga tenā, a te Pulega a Keliso i te Afe Tausaga e fai pelā me se taimi o te fakamasinoga. Ne tusi mai te apositolo ko Ioane: “Ne matea ne au a tino ‵mate, tino ma‵luga io me ko tino ma‵lalo ko pau eiloa, e ‵tu i mua o te nofogaaliki. Ne ‵tala a tusi, ne toe ‵tala foki te suā tusi, ko te tusi o te ola. Ne fakamasino a tino ‵mate e ‵tusa mo olotou mea ne fai, kolā e tusi i loto i tusi. . . . Kae ne fakamasino katoa e ‵tusa mo olotou mea ne fai.” (Fakaasiga 20:​12, 13) Ke masaua me i te faiga o te fakamasinoga tenei e se fakavae ki mea ne fai io me ko mea ne seki fai ne te tino mai mua o tena mate. (Loma 6:7) Kae e fakamasino a ia e ‵tusa mo mea i loto i pelugā “tusi” kolā ka ‵tala i aso mai mua. A faifaiga a te tino kolā e fai mai tua o tena iloa e uiga ki mea e tusi i pelugā tusi konā ka fakavae ki ei te ikuga me e fakamau tena igoa i “te tusi o te ola” io me ikai.

Te “Toe‵tu i te Ola” io me ko te ‘Toe‵tu ki te Fakamasinoga’

8. Ne a fakamoemoega e lua ka mafai o maua ne tino kolā ka toe faka‵tu aka?

⁸ Mai mua atu i te fakaasiga tenā a Ioane, ne fakamatala mai e uiga ki a Iesu e pelā me “e pule i te mate pelā foki mo Seoli.” (Fakaasiga 1:18) E fai a ia mo fai “te Aliki o te ola” a Ieova, telā ne tuku atu ki a ia a te malosi ke fakamasino ne ia a “tino ola mo tino ‵mate.” (Galuega 3:15; 2 Timoteo 4:1) E fai pefea ne ia te mea tenei? Mai te fakaolamaiga o tino kolā e ‵moe atu nei i te mate. “Sa ofo koutou i te mea tenei,” ko pati a Iesu ki tino e tokouke kolā ne talai a ia ki ei, “me ko oko mai eiloa te taimi e lagona ei a tena leo ne latou katoa kolā e i loto i tānuga, kae ka ulu mai ei latou ki tua.” Ne toe fai mai a ia: “Ko latou kolā ne amio ‵lei, e toe‵tu i te ola; ka ko latou kolā ne amio ma‵sei, e toe‵tu i te fakasalaga io me ki te fakamasinoga.” (Ioane 5:​28-30) Tela la, se a la te fakamoemoega o tāgata mo fāfine fakamaoni i aso mua mō aso mai mua?

9. (a) Kafai e toe faka‵tu aka a tino ‵mate, ne a mea mautinoa ka tauloto ne tino e tokouke? (e) Se a te galuega lasi o akoakoga telā ka fai?

⁹ Kafai ko toe‵tu aka a tino fakamaoni konei, ka iloa ei ne latou me i folafolaga kolā ne tali‵tonu latou ki ei ko fakataunu eiloa. Ka pefea la te lotou fia‵fia ke iloa ne latou te Fanau a te fafine a te Atua, telā e fakaasi mai i te valoaga muamua eiloa i te Tusi Tapu, i te Kenese 3:15! Ka pefea te lotou fia‵fia ke iloa ne latou i te Mesia telā ne folafola mai, ko Iesu, ne tumau eiloa i te fakamaoni ke oko ki te mate, tuku atu i ei tena ola mo fai te taulaga togiola! (Mataio 20:28) Ka lasi foki te fia‵fia o tino kolā ka fakafetaui atu ki a latou o fesoasoani atu ke malamalama latou me i te fakatokaga e uiga ki te taulaga togiola tenei, ko te fakaasiga tenā o te alofa faivasaga mo te alofa fakamagalo o Ieova. Kafai ko iloa ne tino kolā e toe‵tu aka a fuafuaga a Ieova mō te lalolagi kolā ko fakataunu ne te Malo o te Atua, e mautinoa eiloa me ka ‵fonu olotou loto i te fia‵fia kae ‵viki atu ei ki a Ieova. Ka maua ei ne latou avanoaga e uke ke fakaasi atu te lotou a‵lofa fakamaoni ki te lotou Tamana faka-te-lagi mo tena Tama. Ka fia‵fia eiloa a tino ola katoa ke ‵kau atu latou ki te galuega lasi ko te faiga o akoakoga mō te fia piliona o tino kolā e toe‵tu aka mai tānuga, kolā ka ma‵nako foki ke talia ne latou te fakatokaga a te Atua e uiga ki te togiola.

10, 11. (a) Ne a avanoaga ka maua ne tino katoa i te lalolagi i loto i te Afe Tausaga? (e) E ‵tau o pokotia pefea tatou i te mea tenei?

¹⁰ Ka maua ne Apelaamo telā ka toetu aka se fakamafanafanaga lasi ‵ki māfai ko ola tonu a ia mai lalo i te pulega o te “fa‵kai” telā ne nofo fakatalitali a ia ki ei. (Epelu 11:10) Kae ka pefea te lasi o te fiafia o te tagata fakamaoni ko Iopu māfai ko iloa ne ia te fakamalosiga telā ne maua ne nisi tavini a Ieova kolā ne fe‵paki mo tofotofoga o te lotou fakamaoni ona ko tena fakamaoni! Kae pefea foki la te fia iloa ne Tanielu a te fakataunuga o valoaga kolā ne tusi ne ia!

¹¹ E tonu, a tino katoa kolā ka ola i te lalolagi amiotonu, faitalia me e auala i te toetuga io me e ‵sao atu i te fakalavelave lasi, ka uke ‵ki olotou mea ka iloa e uiga ki fuafuaga a Ieova mō te lalolagi mo tino i luga i ei. A te fakamoemoega ke ola kae ke ‵viki atu ki a Ieova ki te se-gata-mai, ka fai i ei a te polokalame o akoakoga i te Afe Tausaga e pelā me se mea tafasili i te fakafiafia. Kae sili atu i ei, ko faifaiga e fai ne tatou taki tokotasi ke fetaui mo mea kolā e tusi i pelugā tusi. E mata, ka fakagalue ne tatou a ‵tou mea kolā e tauloto mai i ei? E mata, ka mafaufau ‵mafa kae fakatāua ne tatou a fakamatalaga tafasili i te tāua konā, kolā ka fakamalosi mai ke ‵teke ne tatou a taumafaiga fakaoti a Satani ke ‵futi ne ia tatou keatea mo te munatonu?

12. Se a te mea ka fesoasoani atu ei ki tino taki tokotasi ke ‵kau atu ki te faiga o akoakoga mo te ‵fuliga o te lalolagi ke fai mo fai se palataiso?

¹² E se ‵tau o puli i a tatou a fakamanuiaga ‵gali kolā ka maua mai te fakaaogāga o mea aogā mai te taulaga togiola a Keliso. A tino kolā e faka‵tu aka ka se maua ne masaki e pelā mo mea e ‵tupu i te vaitaimi nei. (Isaia 33:24) Ka ma‵losi ‵lei a foitino o tino katoa i te lalolagi ke ‵kau katoa atu ki te faiga o te galuega lasi o akoakoga mō te fia piliona o tino kolā e toe faka‵tu aka, e uiga ki te auala o te ola. Kae ka ‵kau fakatasi foki latou i te faiga o te ‵toe galuega lasi eiloa ke fai i te lalolagi​—ko te ‵fuliga o te paneta kātoa mo fai se palataiso ke avatu i ei a vikiga ki a Ieova.

13, 14. Kaia e fakasaoloto mai i ei a Satani ke fai tena tofotofoga fakaoti, kae se a te ikuga e mafai o maua ne tatou taki tokotasi?

¹³ Kafai ko fakasaoloto mai a Satani ke fai tena toe tofotofoga, ka toe taumafai o takitaki ‵se ne ia a tino. E ‵tusa mo te Fakaasiga 20:​7-9, a ‘fenua katoa kolā ka fakaloiloigina,’ io me ne potukau o tino, kolā ka ‵to atu ki loto i tofotofoga a Satani ka fakamasinogina kae fakaseai atu: ‘Ka fakaseai latou ne te afi mai te lagi.’ Mō tino i a latou konei kolā ne faka‵tu aka i te Afe Tausaga, a te lotou fakaseaiga e fai mo fai te lotou fakatumaiga ki te fakasalaga io me ki te fakamasinoga. E ‵kese mo latou, a tino kolā e tumau i te fakamaoni mai tua o te lotou faka‵tuakaga, ka maua ne latou te meaalofa ko te ola se-gata-mai. E tonu, e fai te lotou faka‵tuga e pelā me ko te “toe‵tu i te ola.”​—Ioane 5:29.

¹⁴ E fakamafanafana mai pefea ki a tatou a te fakamoemoega e uiga ki te toetu i aso nei? Kae e sili atu i ei, ne a mea e ‵tau o fai ne tatou ko te mea ke maua ne tatou a mea aogā mai i ei i aso mai mua?

Akoakoga ke Tauloto Mai i ei Nei

15. E fai pefea a te talitonu e uiga ki te toetuga e pelā me se fesoasoani i aso nei?

¹⁵ Kāti ne fatoā galo atu sou tino pele i te mate kae ‵tau o fakafesagai atu koe ki mafulifuliga i tou olaga kolā e pogai mai i ei. E fesoasoani mai a te fakamoemoega ki te toetu ke maua te loto filemu mo te malosi telā e se maua ne tino kolā e se iloa ne latou te munatonu. “A matou e ma‵nako ke iloa ne koutou a te mea tonu e uiga ki a latou kolā ko ‵mate,” ko pati fakamafanafana a Paulo ki tino Tesalonia, “ko te mea ke se fanoa‵noa koutou, e pelā mo ne tino ko seai ne olotou fakamoemoega.” (1 Tesalonia 4:13) E mata, e mafai o fakaataata ne koe a koe eiloa e nofo atu i te lalolagi fou kae molimau atu e uiga ki te toetuga o tino ‵mate? Kafai e penā loa, ke na fakamafanafana atu te mea tenā mai te mafaufau ‵loto ki te fakamoemoega telā ka toe fetaui ei koe mo ou tino pele.

16. Ne a lagonaga kāti ka maua ne koe māfai ko toe faka‵tu aka a tino ‵mate?

¹⁶ E mafai eiloa o logo‵mae nei koe i ikuga ma‵sei o te ‵tekeatuga a Atamu, kāti e auala i se masaki malosi. Ke mo a eiloa ma talia ne koe a te loto mafatia tenā, ke fakapuli ei a te fakamoemoega fakafiafia ko te toetu ki te ola i te foitino malosi katoatoa i te lalolagi fou. Tela la, kafai ko toe ‵pula mai ou mata ke lavea atu a foliga fia‵fia o tino kolā ka ‵kau fakatasi mo koe i te fia‵fia ona ko tou fakatumaiga, ka se fakatamala eiloa koe o fakafetai atu ki te Atua mō tena alofa kaimalie.

17, 18. Ne a akoakoga e lua e ‵tau o fakatāua ne tatou?

¹⁷ I te vaitaimi nei, ke mafau‵fau aka tatou ki akoakoga e lua kolā e ‵tau o masaua ne tatou. E tasi mai i ei ko te tāua o te tavini atu ki a Ieova mo te loto kātoa i te taimi nei. I te fakaakoako atu ki te ‵tou Matai, ko Keliso Iesu, e fakaasi atu i te auala e ola ei tatou i loto i mea faiga‵ta, a te ‵tou a‵lofa ki a Ieova mo ‵tou tuakoi. Kafai e fakaseai ne ‵tekemaiga mo fakasauāga a mea e tausi ei ‵tou ola io me ko ‵tou saolotoga, e fakaiku aka ne tatou ke tu ‵mautakitaki tatou i te fakatuanaki faitalia a tofotofoga e fe‵paki mo tatou. Kafai e fakamatakutaku ne tino ‵teke tatou, e fakamafanafana kae fakamalosi mai eiloa a te fakamoemoega e uiga ki te toetu ke tumau tatou i te a‵lofa fakamaoni ki a Ieova mo tena Malo. E tonu, a ‵tou loto finafinau ki te talaiatuga o te Malo mo te faiga o soko e fai i ei ke maua ne tatou a fakamanuiaga se-gata-mai kolā e tausi ne Ieova mō tino amio‵tonu.

¹⁸ A te lua o akoakoga ko te auala e fe‵paki ei tatou mo tofotofoga kolā e māfua mai i ‵tou tulaga sē ‵lei katoatoa. A te ‵tou iloa e uiga ki te fakamoemoega ko te toetu mo te ‵tou loto fakafetai e uiga ki te alofa faivasaga o Ieova e fakamalosi aka ei te ‵tou fakaikuga ke tu ‵mautakitaki tatou i te munatonu. “Sa tuku otou loto ki te lalolagi io me ko so se mea faka te lalolagi,” ko pati polopoloki a te apositolo ko Ioane. “Kafai e a‵lofa koutou ki te lalolagi, ko tona uiga e se a‵lofa koutou ki te Tamana telā e i loto i a koutou. Konei katoa a mea e taku ko mea faka te lalolagi: ko manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino. E seai eiloa se mea o mea konei e māfua mai i te Tamana; e māfua katoa mai i te lalolagi. A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.” (1 Ioane 2:​15-17) Ka se fia ‵saga atu eiloa tatou ki takolekolega mai te lalolagi e auala i te fia maumea i te matea atu tena sē aogā māfai e fakatusa ki te “ola tonu.” (1 Timoteo 6:​17-19) Kafai e fakaosoosogina tatou ke finalalolagi, ka ‵teke malosi atu tatou ki ei. E iloa ne tatou me kafai e ‵mate tatou mai mua o Amaketo, kae ne tumau tatou i te faiga o mea kolā e fakafanoanoa atu ki a Ieova, e mafai eiloa o tuku ne Ieova tatou fakatasi mo tino kolā e seai se lotou fakamoemoega ke toe‵tu mai.

19. Se a te ‵toe tauliaga sili e se ‵tau o puli i a tatou?

¹⁹ Kae sili i mea katoa, e se ‵tau o puli i a tatou a te ‵toe tauliaga sili ko te fakafiafia atu ki te loto o Ieova i te aso nei ke oko eiloa ki te se-gata-mai. (Faataoto 27:11) A te ‵tou fakamaoni ke oko ki te mate io me ke oko ki te gataga o te olaga masei tenei, e fakaasi atu i ei ki a Ieova a te feitu e ‵kau atu tatou ki ei i te kinauga e uiga ki te pulega sili i te lagi mo te lalolagi kātoa. Ma‵faga o mea fakafiafia ke ola i te lalolagi Palataiso mafai e sao atu koe i te fakalavelave lasi io me e toe fakatu aka koe mai te mate!

Te Fakama‵liega o ‵Tou Manakoga

20, 21. Se a te mea ka fesoasoani mai ke tumau tatou i te fakamaoni faitalia me seki maua ne tatou a tali katoa ki ‵tou fesili? Fakamatala mai.

²⁰ E isi ne fesili ne seki mafai o maua ne tali ki ei i te ‵tou sautalaga tenei e uiga ki te toetu. Ka fakatoka pefea ne Ieova a mea e uiga ki tino a‵vaga māfai ko ‵mate latou? (Luka 20:​34, 35) E mata, ka fakatu aka eiloa te tino i te koga telā ne mate i ei? E mata, ka faka‵tu aka a tino ‵mate i tafa o olotou kāiga ‵pili? E uke ‵ki eiloa a nisi fesili e uiga ki te toetuga kolā e seki mafai o maua a tali ki ei. E tiga te feitu tenā, e ‵tau o masaua faeloa ne tatou a pati a Ielemia: “A te Aliki e atafai ki a latou kolā e tali‵tonu ki a ia, tela la, e sili te faka‵tali o tatou mo te kufaki ke fakasao ne ia tatou.” (Tagiga a Ielemia 3:​25, 26) I te taimi tonu o Ieova, ka fakaasi mai ei ne ia a mea katoa ki a tatou. Kaia e tali‵tonu ei tatou ki te mea nei?

²¹ Ke mafaufau ‵loto ki pati o te pese a te faisalamo i te taimi ne usu ei tena pese e uiga ki a Ieova: “E tuku ne koe ki ei a mea e lava mo latou, kae fakamalie ne koe olotou manako.” (Salamo 145:16) I te ‵tou olo aka o ma‵tua, e mafuli‵fuli foki a ‵tou manakoga. A mea kolā ne fakamoe‵moe tatou ke maua a koi tama‵liki tatou ko se ‵pau mo ‵tou manakoga i aso nei. E pokotia a ‵tou kilokiloga ki te olaga i mea kolā e ‵tupu ki a tatou e pelā foki mo ‵tou fakamoemoega. Kae, faitalia a mea ‵lei kolā e ma‵nako tatou ki ei i te lalolagi fou, ka fakamalie eiloa ne Ieova a mea konā.

22. Kaia e maua ei ne tatou a pogai ‵lei ke ‵viki atu ei ki a Ieova?

²² A te mea telā e ‵tau o manava‵se tatou taki tokotasi ki ei ko te tumau i te fakamaoni. “A te mea e ‵tau o fai ne te tino ko tofia ke tavini, ko te fakamaoni ki tena pule.” (1 Kolinito 4:2) E fai tatou e pelā me ne tavini o te tala ‵lei e uiga ki te Malo o te Atua. A te ‵saga tonu atu o tatou o folafola atu a te tala ‵lei ki tino katoa e fetaui mo tatou e fesoasoani mai eiloa ke tumau tatou i te auala ki te ola. Ke mo a ma puli i a tatou a te manatu tenei, a “te malaia io me ko mea ‵tupu fakafuasei e maua ne tino katoa.” (Failauga 9:11) Ke fakamāmā aka a te sōna manavase telā e māfua mai i mea se mautinoa o te olaga, ke puke ‵mautakitaki koe ki te fakamoemoega ko te toetu. Ke talitonu koe me kafai e mate koe mai mua o kamata te Pulega a Keliso i te Afe Tausaga, e mafai o maua ne koe se fakamafanafanaga me ka oko mai eiloa tou fakatapūga. I te taimi tonu o Ieova, ka mafai ei o toe faka‵foki mai ne koe a pati a Iopu ki tena Māfuaga: “Ka kalaga mai koe, kae tali atu au.” Ke na avatu eiloa a vikiga ki a Ieova, telā e manako ke toe fakaola mai ne ia a tino kolā e masaua ne ia!​—Iopu 14:15.

[Fakamatalaga mai lalo]

E Masaua ne Koe?

• Se a te mea e fakavae ki ei a te fakamasinoga o tino i te Afe Tausaga?

• Kaia ka ‘toe‵tu aka ei ki te ola’ a nisi tino kae ‘toe‵tu ki te fakasalaga’ a nisi tino?

• E fakamafanafana mai pefea a te fakamoemoega ko te toetu ki a tatou i aso nei?

• E fesoasoani mai pefea a pati i te Salamo 145:16 ke fakafesagai atu ki fesili e uiga ki te toetu kolā e seki maua a tali ki ei?

[Ata i te itulau e 31]

E fesoasoani mai pefea ki a tatou a te talitonu ki te toetuga i aso nei?