Auala ke Fesoasoani ki Tino e Fe‵paki mo Fakalavelave Tau te Ola ‵Lei o te Mafaufau

Te Uiga o te Mea Tenā

E mafai o mafau‵fau tatou i a tatou e se toka o fesoasoani ki se taugasoa telā e logo‵mae i se masaki tau te mafaufau. Kae e mafai o fakaasi atu ne tatou te lasi o te ‵tou a‵lofa mai te fesoasoani atu ki se taugasoa ke fakafesagai atu ki se masaki tau te mafaufau. E pefea la?

Te Aoga o te Mea Tenei

“Ke . . . vave o fakalogologo.”—IAKOPO 1:19.

Tasi o toe auala ‵lei ke fesoasoani atu ki sou taugasoa ko te fakalogologo ki a ia māfai e manako a ia o faipati. E se ko tena uiga me ‵tau o tali atu koe ki so se mea e fai mai ne ia. Fai ke iloa ne ia i a koe e fakalogologo ki a ia, kae tumau i te fakaasi atu te alofa atafai. Taumafai ke malamalama koe i ana lagonaga, kae sa fakamasino ne koe a ia. Masaua me mafai o fai ne ia a pati sē ‵tau kae fakamuli ko salamō a ia i ei.—Iopu 6:2, 3.

“Fakamafanafana atu.”—1 TESALONIA 5:14.

Kāti e manava‵se io me fakafesagai atu tou taugasoa ki lagonaga me ko seai sena aoga. Kafai e fakaasi atu ne koe me atafai koe ki a ia, ko fai eiloa koe pelā me se tino fakamafanafana kae fakamalosi, faitalia me e se iloa ne koe me ne a au pati ka fai atu ki ei.

“A te taugasoa tonu e fakaasi atu ne ia te alofa i taimi katoa.”—FAATAOTO 17:17.

Fesoasoani atu ki a latou. I lō te fakaiku aka me iloa ne koe a mea e fai ke fesoasoani atu, fesili atu ki mea e mafai ne koe o fai. Kafai e faigata ki tou taugasoa ke fakamatala atu a mea e manako a ia ki ei, fai atu sou manatu ki se mea e mafai o fai fakatasi ne koulua, e pelā mo te olo o sa‵sale. Io me fai atu ke fano koe ki te sitoa o ‵togi ana mea, ‵teu tena fale, io me ko nisi galuega aka.—Kalatia 6:2.

“Kufaki.”—1 TESALONIA 5:14.

Kāti e se fia faipati sāle a tou taugasoa. Fakamautinoa atu ki a ia me toka koe o fakalogologo māfai e fia faipati a ia. Ona ko tena masaki, e mafai o fai atu ne tou taugasoa a mea kolā e fakalogo‵mae atu ki a koe. E mafai o taofi fakavave ne ia lua palani io me kaitaua vave. Ke kufaki kae ke fakaasi atu te loto malamalama māfai e fesoasoani atu koe ki ei.—Faataoto 18:24.

A Tou Fesoasoani e Mafai o Aoga ki Tou Taugasoa

“E taumafai au o fakamautinoa atu me i a au se taugasoa telā e fakatalitonugina. E tiga loa e seiloa ne au te faka‵leiga ki ana fakalavelave, e taumafai faeloa au o fakalogologo ki ana pati e fai mai. I nisi taimi e manako fua a ia ki se tino ke fakalogologo atu ko te mea ke tai ‵lei ana lagonaga.”—Farrah,a telā e fakafesagai atu tena taugasoa ki vaegā masaki tau te mafaufau pelā mo tena kai, te manava‵se mo te mafatia.

“E isi soku taugasoa ko ia loa ko alofa kae fakamalosi tino. Ne ‵kami ne ia au ki tena fale ke ‵kai mo ia. Ona ko tena alofa mo te gali o te koga tenā, ne faigofie ki a au ke faipati e uiga ki oku lagonaga. Ne fakamalosi mai eiloa te mea tenā ki a au!”—Ha-eun, telā e poko i se vaegā masaki o te mafaufau ko te clinical depression.

“E tāua ‵ki te kufaki. Kafai e fai ne taku avaga se mea telā e kaitaua au i ei, e taumafai au ke masaua me ko pokotiaga o tena masaki. E fesoasoani mai te mea tenei ke mo a ma kaitaua au kae ke alofa malosi ki a ia.”—Jacob, telā e poko tena avaga i se vaega masaki o te mafaufau ko te clinical depression.

“Ne lasi ‵ki te fesoasoani mo fakamalosiga ne maua ne au mai taku avaga. Kafai ko manava‵se malosi au, e se faimālō ne ia au ke fai se mea telā e se manako au o fai. E fakauiga i ei me i nisi taimi ko se fai eiloa ne ia a te mea telā e fiafia a ia ki ei. E fakatāua malosi ne au a tena uiga fia fesoasoani mo te kaimalie.”—Enrico, telā e poko i se vaegā masaki o te mafaufau ki te sōna manava‵se.