11 Galue Malosi

TENA UIGA

A tino kolā e ga‵lue malosi e se ‵kalo kea‵tea mai i te faiga o galuega. Kae e fia‵fia loa latou o ga‵lue malosi o tausi atu ki olotou manakoga totino mo te fesoasoani atu foki ki nisi tino—faitalia foki loa me ne galuega fatauvā.

TE POGAI E TĀUA I EI

A te olaga e ‵fonu i tiute e uke, faitalia me fiafia a koe ki ei io me ikai. I te lalolagi tenei e tokouke a tino e se fia‵fia ki te manatu ke ga‵lue malosi latou, kae kafai e loto finafinau koe o fai galuega ka maua eiloa ne koe se olaga fiafia.—Failauga 3:13.

“Ne tauloto eiloa ne au me kafai e galue malosi a koe, ka maua eiloa ne koe a te fiafia mo te lotomalie. A te lagonaga o te lotomalie ne fakamalosi mai ke fiafia au o galue malosi. A te loto finafinau o koe o fai a galuega, e fesoasoani atu ke ‵lei a tou ata i kilokiloga a nisi tino.”—Reyon.

FAKATAKITAKIGA MAI TE TUSI TAPU: “E isi se aoga o so se vaegā galuega ‵mafa.”—Faataoto 14:23.

MEA E MAFAI O FAI NE KOE

Ke ati aka se kilokiloga ‵lei e uiga ki te faiga o galuega mai te tau‵tali ki manatu konei e fakaasi atu.

Ke loto fiafia koe o tauloto ki te auala e fai faka‵lei ne koe a mea. Faitalia me ne a au galuega e fai i te fale, faiga o au mea akoga i te fale, io me se galuega ‵togi, ke fai faka‵lei a galuega ke maea. Kafai ko mafai ne koe o fai te galuega, ko ‵sala atu ei ki auala ke ‵toe faka‵lei a te faiga o te galuega i se auala magoi kae vave. Ko te lasi o tou atamai, ko te lasi foki o tou fiafia o fai a tau galuega tenā.

FAKATAKITAKIGA MAI TE TUSI TAPU: “Kai lavea aka eiloa ne koe se tagata atamai i tena galuega? Ka tu atu eiloa a ia i mua o tupu; Ka se tu a ia i mua o tāgata valevale.”—Faataoto 22:29.

Ke ‵kilo atu tatou ki te ata kātoa. Toeitiiti ko fakanofonofoga katoa, kafai e tausi faka‵lei atu koe ki ou tiute ka aoga ki nisi tino. E pelā me se fakaakoakoga, kafai e galue malosi koe i te faiga o au galuega, ka fakamāmā ne koe a galuega a nisi tino i loto i te kāiga.

FAKATAKITAKIGA MAI TE TUSI TAPU: “E sili atu te fiafia o te tino telā e tuku atu ana mea i lō te maua ne ia.”—Galuega 20:35.

Ke uke atu au mea e fai. I lō te fai fua ne koe se tamā tusaga i te galuega ne fai ne koe, taumafai ke fai ne koe a mea e uke atu. I te auala tenei, e pule atu a koe ki tou olaga—mai te fai ne koe a mea e uke atu, e se ona ko te faimālō atu ke fai ne koe, kae ne fiafia eiloa koe ke fai ne koe.—Mataio 5:41.

FAKATAKITAKIGA MAI TE TUSI TAPU: “Kae e se manako au o fai so se mea e aunoa mo se taliaga mai i a koe, ko te mea ke fai ne koe te mea ‵lei tenā mo te lotomalie kae e se ko te faimālō.”—Filemoni 14.

Ke paleni ‵lei. A tino galue malosi e se paie, io me e fakamuamua faeloa olotou ga‵luega i lō so se mea aka. E ma‵nakogina ke paleni, kae maua foki a te fia‵fia mai i te ga‵lue malosi o latou kae ke lava foki te taimi ke malōlō ei.

FAKATAKITAKIGA MAI TE TUSI TAPU: “E ‵lei atu ke ‵fonu te lima e tasi i te malōlō i lō te ‵fonu o te avā lima i te faiga o galuega ‵mafa mo te afuliga o te matagi.”—Failauga 4:6.