Mea e Tali‵tonu ki ei a Nisi Tino

A tino Lotu Hinitu

e tali‵tonu me i te tino e toe fanau mai fakafia taimi ki se foitino ‵kese. Kae e ‵kilo atu latou ki logo‵maega e pelā me ko te ikuga o faifaiga a se tino ne fai i te olaga nei io me i aso ko ‵teka. E mafai o oko atu se tino ki moksha—telā ko se toe fanau mai fakafia taimi— māfai e se aofia a ia i fakafiafiaga katoa o te olaga.

A tino Lotu Musilimu

e ‵kilo atu ki logo‵maega e pelā me se fakasalaga ona ko te agasala kae se tofotofoga o te fakatuanaki. A puapuaga se fakamasauaga “ke tumau i te loto fakafetai ki te Atua ona ko fakamanuiaga katoa ko maua ne tatou kae ke malamalama me e ‵tau o ‵lago atu tatou ki tino fakaa‵lofa,” ko pati a Dr. Sayyid Syeed, te pelesitene o te Islamic Society of North America.

A tino lotu Iutaia

e ‵lago ki te manatu me i logo‵maega ko ikuga o faifaiga a se tino. E fai mai a nisi tino Iutaia me ka isi se toetuga, kae ka fai i ei a te fakamasinoga tonu ki tino kolā ne logo‵mae tauanoa fua kae e seai ne mea ‵se a latou ne fai. E akoako ne te lotu Iutaia Kabbalistic (mystical) a te akoakoga ko te ‵toe fanau mai, telā e maua i ei ne se tino a avanoaga e uke ke toe salamō ki ana mea ‵se ne fai.

A tino lotu Puta

e tali‵tonu foki me i te tino e toe fanau mai fakafia taimi. E fai mai latou me ka tumau loa te logo‵mae o te tino ke oko ki te taimi e gata i ei ana faifaiga, lagonaga mo manakoga se ‵lei. Kafai ko maua ne se tagata a te poto, fai ne ia a galuega ‵lei kae taumafai o tausi ke ‵ma ana mafaufauga, ka oko atu a ia ki nirvana—te taimi telā ka fakagata i ei ana logo‵maega katoa.

A tino lotu Confucian

e mafau‵fau me i te ukega o logo‵maega ko te ikuga o “mea ‵se e fai ne tino,” ko pati i te A Dictionary of Comparative Religion. E akoako mai te lotu Confucian me e tiga loa e mafai o fakafeoloolo aka a logo‵maega e auala i te ola i se olaga ‵lei, kae koi uke eiloa a logo‵maega e fakamāfua aka ne “tino faka-te-agaga kolā e ma‵losi fakafia atu i tino. I vaegā tulaga penā, e talia katoatoa ne te tagata a mea kolā ko oti ne fakaiku aka ne tino faka-te-agaga konei ke ‵tupu ki a ia i aso mai mua.”

A nisi talitonuga mua

e mafau‵fau me isi se sokoga o logo‵maega ki mea fakataulaitu. E ‵tusa mo talitonuga konei, e mafai ne agaga o aumai te manuia io me ko te malaia kae e mafai o fakafeoloolo aka a logo‵maega kolā e fakamāfua aka ne latou e auala i nisi faifaiga fakalotu. Tela la, kafai e logo‵mae se tino i masaki, e tali‵tonu latou me i faifaiga fakalotu mo vaiao a tino faivailakau ka mafai o ‵teke atu a agaga.

A Kelisiano

e tali‵tonu me i logo‵maega ne māfua mai loa i te agasala a tino muamua e tokolua kolā ne fakamatala mai i te tusi o te Tusi Tapu ko Kenese. Kae ne fakaopoopo fua ne lotu e uke a olotou manatu totino ki te akoakoga tenā. E pelā me se fakaakoakoga, e fai mai a nisi tino Lotu Katolika me i logo‵maega kolā e fepaki mo se tino e mafai o ‘ofo atu ki te Atua’ ke fakamolemole atu ke fakaaoga ne ia mō te ‵lei o te lotu io me fakaaoga te logo‵maega tenā ke fakasao ei se ola o se tino.