Fesili 3: Kaia e Talia ei ne te Atua ke Logo‵mae au?

A TE tamana o IAN se tagata inu kava malosi. E ui eiloa ne tupu aka a Ian i mea faka-te-foitino kolā ne manakogina ne ia, ne seki ai se tino ne saga atu ki ana lagonaga, ko te mea telā ko leva ne fia maua ne ia mai i tena tamana. “Ne seki ai soku alofa malosi ki a ia, ona loa ko tena inu mo ana mea e fai atu ki toku mātua,” ko pati a Ian. I te taimi ne matua ei a Ian, ne kamata a ia o fakafesili a te iai o te Atua. “‘Kafai e isi se Atua, kaia e talia ei ne ia ke logo‵mae a tino?’”

Kaia e ‵tau ei o ‵sili atu te fesili tenā? Kafai foki e seai ne fakalavelave i tou olaga, e mafai eiloa koe o ita māfai e lavea ne koe a tino e seai ne olotou mea ‵se ne fai, e logo‵mae. E ui i ei, a te fesili e uiga ki logo‵maega e gasolo o tāua malosi ki a koe māfai ne oko ki a koe se tulaga faigata io me ne masaki io me mate se tino pele, e pelā moIan.

Ne a pati a nisi tino me se a te tali? E tali‵tonu a nisi tino me e talia ne te Atua a logo‵maega ko te mea ke akoako tatou ke loto mau‵lalo kae a‵lofa. E mafau‵fau a nisi tino me i tino e logo‵mae ona ko agasala ne fai ne latou i taimi ko ‵teka.

Se a te mea e fakauiga ki ei a tali konā? A te Atua e faigata o alofa me e se atafai mai ki a tatou. A te Atua e sauā.

Se a te mea e akoako mai i te Tusi Tapu? E fakaasi faka‵lei mai i te Tusi Tapu me e se ‵tau o ‵losi atu ki te Atua mō logo‵maega o tino. “Kafai e tofotofogina se tino, ke mo a ma fai mai a ia penei: “Au ko tofotofo ne te Atua.” Me e se mafai o tofotofogina te Atua ki mea ma‵sei io me e tofotofo ne ia se tino,” (Iakopo 1:13) A te manatu me e ‵tau o ‵losi atu ki te Atua mō logo‵maega o tino e se fetaui mo te auala e fakamatala mai i ei a uiga totino o te Atua i te Tusi Tapu. E pefea la?

A te alofa se tasi o uiga sili o te Atua. (1 Ioane 4:8) Ke faka‵mafa te manatu tenā, e fakaata mai a te Atua i te Tusi Tapu e pelā me se mātua. “E mafai ne se fafine o puli tena pepe, kae se alofa ki te tamaliki ne fanau mai ne ia? Kafai foki la e isi se matua e mafai o fakapuli ne ia tena tamaliki, ka ko au e se mafai o fakapuli ne au koutou.” (Isaia 49:15) E mafaufau koe me e mafai ne se mātua alofa o fakapakia a tena tamaliki? A te mātua atafai e taumafai o fakaseai a logo‵maega o tena tamaliki. E penā foki te Atua, e se fai ne ia ke logo‵mae a tino e seai ne mea ‵se ne fai.​—Kenese 18:25.

Kafai foki e atafai mai te Atua, e logo‵mae eiloa a tino e seai ne mea ‵se ne fai. Kāti ko mafaufau aka koe, ‘Kafai e atafai mai te Atua ki a tatou kae malosi katoatoa, kaia e se fakaseai ei ne ia a māfuaga o logo‵maega?’

E isi ne pogai ‵lei e talia ei ne te Atua ke tumau a logo‵maega i te vaitaimi nei. Ke mafaufau ki se mea fua e tasi: E masani o māfua mai i tino a logo‵maega o nisi tino. E tokouke a tino fia ‵mafi kae pule fakasaua e se ma‵nako ke ‵fuli olotou olaga. Tela la, ke tapale kea‵tea ne te Atua a te māfuaga o logo‵maega, e ‵tau o fakaseai ne ia a vaegā tino penā.

I te fakamatalamaiga o te pogai ne seki fakaseai ei ne te Atua a tino konā ne fai mea ‵se, ne tusi mai te apositolo ko Petelu: “E se tuai a Ieova e uiga ki ana folafolaga, e pelā mo te kilokiloga a nisi tino me e tuai, kae ko ia e kufaki ona ko koutou me e se manako a ia ke fakaseai atu se tino e tokotasi kae e manako ke sala‵mo a tino katoa.” (2 Petelu 3:9) A te kufaki o Ieova te Atua se fakaasiga o tena alofa mo te alofa fakamagalo.

Ko pili fua o gasuesue a Ieova. A ia ka “toe taui atu a fakasauaga ki a latou kolā e fakasaua atu” ki tino e seai ne mea ‵se ne fai. A latou kolā e faka‵mae atu ki nisi tino i auala se tonu ka “maua ne latou te fakasalaga ko te fakaseaiga ki te se-gata-mai.”​—2 Tesalonia 1:​6-9.

Ke maua a fakamatalaga e uke atu ki te pogai e talia ei ne te Atua a logo‵maega mo te mea telā ka fai ne ia e uiga ki ei, ke onoono ki te mataupu e 11 o te tusi Ne a Mea e Akoakoa ‵Tonu Mai i te Tusi Tapu? Ko maua foki o maua i te www.jw.org

[Ata i te itulau e 9]

Ne a Pati a Iesu e Uiga ki Logo‵maega?

Ne seki ‵losi atu a Iesu ki te Atua mō logo‵maega kolā ko sikomia a ia i ei. I lō te fai penā, ne fai ne ia a mea kolā e fakasolo mai.

Ne fakaasi mai ne Iesu me e se fakasala ne te Atua a tino e seai ne mea ‵se ne fai mai te faiga ke logo‵mae latou. Ne faka‵lei ne Iesu a tino ma‵saki, tino ‵pili, mo tino kivi. (Mataio 15:30) A vavega kolā ne fai ne ia e akoako mai ki a tatou a mea tāua e lua: Te mea muamua, ne fakaaoga ne Iesu a te malosi o te Atua ke fakaseai a logo‵maega, kae sē fakamāfua aka. Te lua o mea, ne faka‵lei ne Iesu a tino ona ko tena alofa. I te taimi ne matea ei ne ia a tino e logo‵mae, “ko oko eiloa i te alofa o Iesu” ki a latou. (Mataio 20:​29-34, Tusi Tapu i te ‵Gana Tuvalu) Ne fakaata katoatoa mai i a Iesu a lagonaga o tena Tamana e uiga ki logo‵maega. Tela la, mai i pati mo faiga a Iesu, ko iloa ei ne tatou me e fanoanoa te Atua i te ‵mae telā e lavea ne Ia kae ko manako a Ia o fai se fakatapūga ki ei.​—Ioane 14:​7, 9.

Ne fakaasi mai ne Iesu a te pogai tonu o logo‵maega e uke o tino​—ko Satani te Tiapolo. Muna a Iesu: “A ia se tino tatino i te kamataga.” (Ioane 8:44) Ne fakaasi mai foki ne Iesu i a Satani te Tiapolo “ko te pule o te lalolagi tenei” kae ko ia telā e “takitaki ‵se ne ia te lalolagi nofoaki kātoa.”​—Ioane 12:31; Fakaasiga 12:9.

Ne tuku mai ne Iesu ki a tatou a te fakamoemoega me ka fakaseai atu a logo‵maega katoa i se taimi. Ne akoako ne ia ana soko ke ‵talo atu penei: “Te motou Tamana telā i te lagi, . . . Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mataio 6:​9, 10) Kafai ko oko mai te Malo o te Atua, ka sē toe ai ne logo‵maega i te lalolagi, e pelā eiloa mo lagi.

I te fakaasiga telā ne tuku atu ne ia ki te apositolo ko Ioane, ne fakamatala mai i ei ne Iesu a te vaegā olaga telā ka maua ne latou kolā e ola mai lalo i te Malo o te Atua. I te taimi tenā, a te Atua “ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”​—Fakaasiga 1:1; 21:​3, 4.