1. E Mata, e ‵Tau o ‵Losi Atu ki te Atua mō ‵Tou Logo‵maega?
Te Pogai e Tāua ke Iloa ne Tatou
E tokouke a tino e se ma‵nako o tapuaki atu ki te Atua me e ‵losi atu latou me ko te Atua e māfua mai i ei olotou logo‵maega.
Ke Mafau‵fau ki ei
E akoako ne takitaki lotu e tokouke i auala kese‵kese me e māfua mai i te Atua a ‵tou logo‵maega. E pelā me se fakaakoakoga, e fai mai ne nisi tino a pati konei:
A fakalavelave o te natula se fakasalaga mai te Atua.
E ‵mate a tama‵liki me e manako te Atua ke uke a agelu i te lagi.
A te Atua e ‵lago atu ki taua—se māfuaga e tasi o logo‵maega e uke.
Kae e mata, se mea tonu me e akoako atu ne takitaki lotu a mea ‵se e uiga ki te Atua? E a māfai e se talia ne te Atua a latou?
KE TAULOTO KI MEA E TAI UKE ATU
Onoono ki te vitio Kaia e ‵Tau ei o Sukesuke ki te Tusi Tapu? i te jw.org.
Pati a te Tusi Tapu
E se māfua mai i te Atua a ‵tou logo‵maega.
Kafai ne māfua mai i a ia, ko se fetaui i ei mo ana uiga kolā e fakaasi mai i te Tusi Tapu. Pelā me se fakaakoakoga:
“E fai ne [te Atua] te fakamasinoga tonu i ana mea katoa e fai . . . E amiotonu kae fai mea tonu a ia.”—TEUTELONOME 32:4.
“E seki mafaufau eiloa a te Atua tonu ke fai ne ia a faifaiga ma‵sei, ke fai ne te Atua Malosi Katoatoa a te mea ‵se!”—IOPU 34:10.
“A te Atua Malosi Katoatoa e se ‵fuli ne ia a te fakamasinoga tonu.”—IOPU 34:12.
E ‵teke ne te Atua a lotu kolā e akoako ‵se ne latou a mea e uiga ki a ia.
E aofia i ei a lotu kolā e akoako ne latou me i te Atua ko te māfuaga o ‵tou logo‵maega, mo lotu kolā e talia ke aofia latou i taua mo amioga fakasaua.
“A pelofeta e fai a valoaga ‵loi i [te igoa o te Atua]. E seki uga atu ne au latou io me fakatonu atu latou io me faipati atu ki a latou. A mea konā e ‵valo ne latou ne fakaasiga ‵loi . . . mo mea ‵loi mai i olotou loto.”—IELEMIA 14:14.
Ne taku fakamasei ne Iesu a faifaiga ‵loi a lotu.
“E se ko tino katoa kolā e fai mai ki a au, ‘Te Aliki, te Aliki,’ ka ulu ki loto i te Malo o te lagi, kae ko ia fua telā e fai ne ia te loto o toku Tamana telā i te lagi. E tokouke a tino ka fai mai ki a au i te aso tenā: ‘Te Aliki, te Aliki, e a, ne seki ‵valo atu matou i tou igoa kae ‵tuli a temoni i tou igoa kae fai a galuega ‵mana i tou igoa?’ Kae ka fakailoa atu ne au ki a latou: ‘E se iloa lele ne au koutou! Olo kea‵tea mai i a au, koutou tino amio ma‵sei!’” —MATAIO 7:21-23.