Te Tāua ke Maua a Tali

Kaia e tāua ei ke iloa atu me e isi se Mafuaga? Kafai ne talitonu koe ki fakamaoniga me e isi se Atua malosi katoatoa, kāti ka manako koe ke iloilo aka a fakamaoniga me i te Tusi Tapu ne fakaosofia ne ia. Kae kafai e talitonu koe ki pati i te Tusi Tapu, ko mafai ei o maua ne koe a mea aoga i auala konei.

Ka fai ei ke fiafia malosi koe ki tou olaga

E FAI MAI TE TUSI TAPU: “I mea ‵lei ne fai ne [te Atua] mai te tuku atu ki a koutou a vaiua mai te lagi mo tau o aso aoga, e fakamalie ne ia koutou ki meakai kae faka‵fonu otou loto ki te fiafia.”—Galuega 14:17.

TENA UIGA: A mea katoa o te natula e maua ne koe i te lalolagi tenei se meaalofa mai te Mafuaga. Ka gasolo o lasi atu tou loto fakafetai ki meaalofa konei māfai ko iloa ne koe te lasi o te atafai o te Tino ne tuku atu ne ia a mea konā ki a koe.

Ka maua i ei a manatu aoga ‵tonu mō te olaga i aso takitasi

E FAI MAI TE TUSI TAPU: “Ko malamalama ei koe i te mea telā e amiotonu, te fakamasinoga tonu kae sao, ko te auala kātoa o te mea telā e ‵lei.”—Faataoto 2:9.

TENA UIGA: E pelā me ko tou Mafuaga, e iloa ne te Atua a mea e manakogina ke maua ne koe te fiafia. Kafai e sukesuke ki te Tusi Tapu, e mafai o maua ne koe a akoakoga kolā ka aoga ki a koe i aso nei.

Ka maua i ei ne koe a tali ki au fesili

E FAI MAI TE TUSI TAPU: “Ka maua ne koe te iloaga o te Atua.”—Faataoto 2:5.

TENA UIGA: A te iloa atu me e isi eiloa se Mafuaga, e mafai o fesoasoani atu ke maua ne koe a tali ki fesili tāua e pelā mo te: Se a te aoga o te olaga? Kaia ko uke ‵ki ei a logo‵maega? Ne a mea e ‵tupu māfai ko ‵mate tatou? E mafai o maua ne koe a tali fakamalie loto i te Tusi Tapu.

E maua i ei se fakamoemoega mō aso mai mua

E FAI MAI TE TUSI TAPU: “‘Me iloa ‵lei ne au a mafaufauga e mafaufau ne au e uiga ki a koutou,’ ko te folafolaga a Ieova, ‘ko mafaufauga o te filemu, kae e se ko fakalavelave, ke tuku atu ki a koutou a aso mai mua mo se fakamoemoega.’”—Ielemia 29:11.

TENA UIGA: Ne tauto mai te Atua me i aso mai mua ka fakaseai ne ia a amioga ma‵sei, logo‵maega, ke oko foki ki te mate. Kafai e talitonu koe ki folafolaga a te Atua, ka fesoasoani atu a tou fakamoemoega ki aso mai mua, ke mafai o fakafesagai atu koe mo te loto malosi ki fakalavelave i aso takitasi.

Mea aoga ne maua ne nisi tino ona ko te tali‵tonu me e isi se Mafuaga

“E ofo faeloa au māfai e kilo atu ki te auala e fesoasoani mai te Atua i feitu kese‵kese o te olaga. E pelā mo te akoako mai ke iloa a toe mea tāua ke fakamuamua i te olaga, ke iloa o ola fealofani mo tino, mo te auala ke fai taugasoa mo te Atua.”—Cyndi, Amelika.

“A toku talitonu ki te Mafuaga e fai ei ke lotomalie kae fiafia au ki toku olaga. E fakamalosi aka ei toku mafaufau ona ko te uke o mea ‵gali kolā e ‵tau o tauloto ne au e uiga ki a ia, ana mea ne faite, mo tena Muna.”—Elise, Falani.

“A te fakagaluega o mea kolā e akoako mai ne te Mafuaga i te Tusi Tapu, e fai ei au ke fiafia malosi atu. E fesoasoani mai ki a au ke se mataonoono, saga tonu atu, kae ke lotomalie ki mea ko maua. Ne fesoasoani mai foki ke momea aka toku fai mo fai se tamana tai ‵lei atu.”—Peter, Netherlands.

“I aso mua, ne fakavae toku olaga ki te kai, moe, mo te taumafai ke oko ki te galuega i te taimi tonu. Ne logo‵mae malosi au i te loto mafatia! Nei la, ko kilo atu au ki te olaga e pelā me se meaalofa tafasili i te gali—se mea fakafiafia telā e ‵tau o fakatāua malosi ne tatou.”—Liz, Estonia.

“Au se tino e manavase sāle. Kae ne mafai ne au o kufaki ona ko te iloa atu me ko pili o fakaseai atu a amioga ma‵sei, faifaiga sē fakamaoni, mo logo‵maega.”—Adrien, Falani.