1 | Puipui Tou Ola ‵Lei

TE POGAI E TĀUA EI

E mafai o pokotia masei i auala kese‵kese e uke a te ola ‵lei o tino māfai ko tupu se matugā fakalavelave lasi.

• A puapuaga ko oti ne fai ne latou a tino ke loto mafatia, kae ko te loto mafatia i se taimi leva, e mafai o tuku faka‵sau atu i ei latou ki masaki.

• E mafai ne fakalavelave ‵tupu o fai ke uke a galuega e ‵tau o fai i fa‵kaimasaki kae e mafai ei o se lava a mea i ei ke tausi atu ki tino ma‵saki.

• E mafai o pokotia a tino i mea tau tupe māfai ko ‵tupu a fakalavelave ‵lasi, telā ko se mafai ne latou o ‵togi a mea e manakogina e pelā mo mea‵kai aoga io me ko vailakau mō olotou ma‵saki.

Mea e ‵Tau o Iloa ne Koe

• A ma‵saki ma‵losi mo masaki tau te mafaufau e mafai o pokotia i ei au faka‵tauga kolā e mafai o fai ei koe ke se saga tonu atu ki mea kolā e aoga ki tou ola ‵lei. E mafai o fai i ei koe ke fakamasakisaki malosi atu.

• Kafai e se saga faka‵lei ki ei, e mafai o momea aka te sē ‵lei o tou masaki kae e mafai o tu tou ola i se tulaga fakamataku.

• Ko tou malosi ‵lei, ko tou toka ‵lei foki ke mafai o fai a fakaikuga ‵lei māfai ko ‵tupu a fakalavelave.

• Faitalia a tulaga faiga‵ta i mea tau tupe, e mafai o fai ne koe a nisi mea ke puipui tou ola ‵lei.

Mea e Mafai ne Koe o Fai Nei

A te tino poto e mafaufau ki mea fakama‵taku kae fai ‵toe mea e mafai ke puipui a ia mai i ei. E mafai o aoga te manatu tenei ki te ola ‵lei. Kafai koe e ‵tu ‵ma, ka se masakisaki ‵soko koe io me e maua ne masaki ma‵sei. E ‵lei atu ke puipui mai i se mea i lō te taumafai ke faka‵lei aka.

“Kafai e ‵tu ‵ma faeloa tatou i te tausiga o ‵tou foitino mo ‵tou fale, e mafai o ‵sao i ei a tupe e uke kolā e mafai o fakamāumāu ki te asi ki tokita mo vailakau fakatokita.”—Andreas.a