Ke Fakatumau te Kilokiloga Faka-te-tusi Tapu ki te Ola ‵Lei

“E ‵tau mo koe o alofa ki te Aliki tou Atua . . . mo tou mafaufau kātoa, mo tou malosi kātoa.”—MALEKO 12:30.

1. Se a te fuafuaga muamua a te Atua mō tino?

NE SEKI aofia a ma‵saki mo te ‵mate o tino i te fuafuaga muamua eiloa a Ieova te Atua. Ne tuku atu a Atamu mo Eva ki te fatoaga o Etena, io me ko te palataiso o fiafiaga, ke “galue te laukele i ei kae tausi faka‵lei” ki ei ki te se-gata-mai, kae e se ki se 70 io me se 80 tausaga fua. (Kenese 2:8, 15; Salamo 90:10) Moi ne tumau te tauavaga muamua konā i te fakamaoni ki a Ieova kae fakaasi atu te lā a‵lofa mai te faka‵logo ki tena pulega, penei e se ma‵saki, vāivāi kae ‵mate laua.

2, 3. (a) Ne a ikuga o te olaga matua? (e) Ko oi ne māfua mai i ei te mate, kae ka fakamalepe aka pefea a mea ne iku mai ei?

² E fakamatala faka‵lei mai i te Failauga mataupu e 12 a “aso ka toeaina ei” a tino sē ‵lei katoatoa. (Faitau te Failauga 12:1-7.) E fakaasi mai i ei me i olotou “laulu ka sinā.” A “vae ma‵losi ka gasolo o vāivāi.” A “mata ka se ‵kite faka‵lei.” Kae ona ko te mea ko se uke malosi a nifo ko se mafai ei o ‘lamulamu faka‵lei a meakai.’

³ A mea katoa konā ne seki aofia i te fuafuaga muamua a te Atua mō tino. E se gata i ei, a te mate telā ne togi mai ne Atamu se “galuega a te Tiapolo” telā ka fakamalepe ne te Tama a te Atua e auala i tena Malo Faka-Mesia. Ne tusi mai te apositolo ko Ioane: “Ne vau te Tama a te Atua mō te pogai eiloa tenei, o fakamalepe a te galuega a te Tiapolo.”—1 Ioane 3:8.

Te Manavase ‵Tau se Mea Masani

4. Kaia e ‵tau ei te manava‵se o tavini a Ieova ki te ola ‵lei o latou i te feitu faka-te-foitino, kae se a te mea e iloa faka‵lei ne latou?

⁴ I te taimi nei, e fe‵paki a nisi tavini a Ieova mo fakalavelave e pelā mo masaki mo te tulaga matua kolā e pokotia sāle ei a tino agasala katoa. A te manavase ‵tau ki vaegā tulaga penei o te ola se mea masani kae e aogā foki. E mata, e se fia tavini atu tatou ki a Ieova ‘mo ‵tou malosi katoatoa’? (Maleko 12:30) E tiga eiloa e taumafai tatou ke tumau i te malosi i te feitu faka-te-foitino, e ‵tau o iloa ne tatou me e mu‵tana fua ‵tou mea e mafai o fai ke se gasolo tatou o ma‵tua io me ke se ma‵saki eiloa.

5. Se a te akoakoga e mafai o maua ne tatou mai te auala ne fakafesagai atu ei a tavini fakamaoni a te Atua ki masaki?

⁵ E ‵tau o fakafesagai atu a tavini fakamaoni e tokouke a Ieova ki fakalavelave tau te ola ‵lei. Ne aofia i ei a Epafeloti. (Filipi 2:25-27) Ne ‵mae sāle te tinae o Timoteo, se taugasoa fakamaoni o te apositolo ko Paulo, kae ne fakamalosi atu Paulo ke “inu foki ki ne mo uaina.” (1 Timoteo 5:23) Ne fepaki foki a Paulo mo “te logo‵mae o te foitino,” kāti ko ana mata io me se isi masaki aka telā e seai ne faka‵leiga ki ei i te taimi tenā. (2 Kolinito 12:7; Kalatia 4:15; 6:11) Ne fakamolemole malosi atu a Paulo ki a Ieova e uiga ki “te logo‵mae o te foitino” tenei. (Faitau te 2 Kolinito 12:8-10.) Ne seki faka‵lei fakavavega ne te Atua a Paulo mai i “te logo‵mae o te foitino.” Kae ne fakamalosi ne te Atua a ia ke tumau i te kufaki. Ne lavea atu i ei a te malosi o Ieova i te vāivāiga o Paulo. E mata, e isi se akoakoga tāua mō tatou i te tala tenei?

‵Kalo Keatea Mai te Sona Manavase ki te Ola ‵Lei

6, 7. Kaia e ‵tau ei ‵kalo keatea tatou mai te sōna manavase ki te ola ‵lei o tatou?

⁶ E pelā mo te mea e iloa atu, e talia ne Molimau a Ieova a togafiti fakatokita mo nisi togafiti aka. E masani o maua i te ‵tou mekesini ko te Awake! a mataupu e uiga ki nisi masaki. Kae tiga eiloa e se ‵lago atu tatou ki se togafiti fua e tasi, e fakaasi atu eiloa ne tatou te loto fakafetai mō te fesoasoani o tino ‵poto i ma‵saki. E tonu, e iloa ne tatou me e seki mafai nei o maua a te ola ‵lei katoatoa. Tela la, e iloa ne tatou me se mea sē ‵lei ke fakatāua malosi ne tatou a te ‵tou ola ‵lei io me ko te manavase faeloa ki ei. E ‵tau o ‵kese ‵tou kilokiloga mo tino kolā e “seai . . . se fakamoemoega,” kae mafau‵fau me tenei fua te olaga kae ‵sala atu ki so se togafiti ke faka‵lei aka ei olotou ma‵saki. (Efeso 2:2, 12) E fakaiku aka ne tatou ke mo a eiloa e galo i a tatou te taliaga a Ieova i ‵tou taumafaiga ke faka‵sao ‵tou ola i te olaga tenei, me e tali‵tonu tatou me kafai e tumau tatou i te fakamaoni ki te Atua, ka “maua ne [tatou] te ola telā ko te ola tonu,” ko te ola se-gata-mai i te fakanofonofoga fou telā ne folafola mai ne Ia.—1 Timoteo 6:12, 19; 2 Petelu 3:13.

⁷ E ‵kalo keatea tatou mai te sona manavase ki ‵tou ola ‵lei ona ko te suā pogai. A te sona manavase penā e mafai o iku atu ki te manatu fakapito. Ne fakailoa atu Paulo ke fakaeteete i te mea fakamataku tenei i ana pati fakamalosi ki tino i Filipi ke “kilo‵kilo ki mea e ‵lei ei nisi tino, kae se ko mea fua e ‵lei ei [latou].” (Filipi 2:4) Se mea ‵tau ke tausi faka‵lei ki a tatou eiloa, kae ko te fiafia telā e fakaasi atu ne tatou ki ‵tou taina mo tino kolā e talai atu ne tatou ki ei a “te Tala ‵Lei tenei e uiga ki te Malo,” ka fai ei ke se fakalave‵lave tatou i te tausiga fua o tatou i te feitu faka-te-foitino.—Mataio 24:14.

8. Se a te mea e mafai o iku atu tatou ki ei ona ko te sona manavase ki ‵tou ola ‵lei?

⁸ A te mea fakamataku me e mafai o fai ne te manavase o se Kelisiano ki tena ola ‵lei ke fakatulaga lua ne ia a mea o te Malo. A te saga malosi atu ki te mea tenā e mafai foki o takitaki ei tatou ke faimālō atu ki nisi tino a ‵tou manatu totino e uiga ki te aoga o vaega togafiti kese‵kese. I te feitu tenei, ke mafaufau ki te fakatakitakiga e maua i pati a Paulo: “Ko te mea ke iloa ne koutou o filifili a te mea e sili atu i te ‵lei; ke mafai ei koutou o saoloto mai mea ma‵sei katoa, pelā foki te takumaseigina i te Aso o Keliso.”—Filipi 1:10.

Se a te Mea e Sili Atu i te Tāua?

9. Se a te mea tāua e tasi e se ‵tau o manatu ma‵ma ki ei, kae kaia?

⁹ Kafai e iloa ne tatou a mea kolā e sili atu i te tāua, ka ga‵lue malosi tatou o fesoasoani ki nisi tino i te feitu faka-te-agaga. E mafai o fai te mea tenā mai te talai mo te akoako atu o te Muna a te Atua. A te galuega fakafiafia tenei e aoga ki a tatou mo tino kolā e akoako ne tatou. (Faataoto 17:22; 1 Timoteo 4:15, 16) E maua sāle i ‵tou mekesini ko Te Faleleoleo Maluga mo te Awake! a mataupu e uiga ki ma‵saki o ‵tou taina mo tuagane faka-te-agaga. I nisi taimi e fakamatala mai i ei a auala ne kufaki ei latou taki tokotasi io me ko taimi kolā ne seki mafaufau ‵mafa latou ki ei ona ko te mea e taumafai latou o fesoasoani atu ki nisi tino ke iloa ne latou a Ieova mo ana fuafuaga ‵gali.a

10. Kaia e tāua ei ke filifili faka‵lei a togafiti e fakaaoga ne tatou?

¹⁰ Kafai ko masaki se Kelisiano matua ‵lei, e ‵tau mo ia “o amo tena amoga” i te faiga o tena tiute ki te filifiliga o te togafiti telā ka fakaaogā. (Kalatia 6:5) Kae e ‵tau o masaua ne tatou me e tāua ‵ki ki a Ieova a te togafiti telā e filifili ne tatou. E pelā eiloa mo te fakamalosi aka o tatou ne te ‵tou āva ki fakatakitakiga i te Tusi Tapu ke “se ‵kai . . . ki toto,” e ‵tau o fakamalosi aka foki tatou ne ‵tou amanaia malosi ki te Muna a te Atua ke ‵kalo keatea mai te fakaaogaga o togafiti kolā e mafai o fakalogo‵mae ei tatou i te feitu faka-te-agaga io me mafai o pokotia ei ‵tou fesokotakiga mo Ieova. (Galuega 15:20) A nisi togafiti kolā e fakaaoga sāle e tai ‵pau eiloa mo faifaiga faivailakau. Ne ‵teke atu a Ieova ki aposetate Isalaelu kolā ne fakaaoga ne latou a “faifaiga faivailakau.” Ne fai atu a ia: “E seai se aoga e aumai ei otou taulaga. Au ko takalialia i te manogi o taulaga ‵sunu a koutou. Ko se toe fiafia au ki otou ‵Kaiga Fiafia o Masina Tu, otou Sapati, ke oko eiloa ki otou maopoopoga faka-te-lotu, ko se aoga a mea konā ona ko otou agasala [io me ko “faifaiga faivailakau,” NW].” (Isaia 1:13) A te taimi e masaki ei e se ko te taimi ke fai ei ne tatou se mea ke fakalavelave mai ki ‵tou ‵talo kae fakamasei foki ei ‵tou fesokotakiga mo te Atua.—Tagiga a Ielemia 3:44.

E Tāua ‵ki te “Mafaufau ‵Lei”

11, 12. E aofia pefea a te “mafaufau ‵lei” i te filifiliga o togafiti mō ‵tou ma‵saki?

¹¹ Kafai e ma‵saki tatou, e se ‵tau o fakamoe‵moe ke faka‵lei fakavavega ne Ieova tatou, kae e mafai o ‵talo atu ke maua te poto i te filifiliga o te ‵toe togafiti ‵lei. E ‵tau o fakavae ‵tou filifiliga ki fakatakitakiga mai te Tusi Tapu mo te mafaufau ‵lei. Kafai e tai lasi loa te masaki, kāti se mea ‵lei ke fanatu koe ke āsi ne tokita kese‵kese, e ‵tusa loa mo te manatu i te Faataoto 15:22, telā e fai mai: “Taumafai ke maua ne koe ne manatu fakatonutonu e uke, kae ka manuia koe; kafai e se saga koe o ‵sala ne manatu fakatonutonu, ko tena uiga e se mafai o manuia tou taumafai.” Ne fakamalosi atu te apositolo ko Paulo ki taina tali‵tonu “ke ola i te loto pulea [“te mafaufau ‵lei,” NW], te mea tonu, mo te olaga faka Atua i te lalolagi nei.”—Tito 2:12.

¹² E ‵pau eiloa te tulaga o tino e tokouke mo se fafine masaki i aso o Iesu. E fai‵tau tatou penei i te Maleko 5:25, 26: “E isi se fafine i konā e ‵tafe tena sua i tausaga e sefulu lua, e uke a mea ne fi‵ta ei a ia i tokita, palele ana koloa ne fakamaumau, kae seai eiloa se ‵lei ne maua ne ia, ka ko na gasolo ake ei o masei.” Ne faka‵lei ne Iesu te fafine tenā kae ne saga atu ki ei mo te alofa. (Maleko 5:27-34) Ona ko te manako malosi ke ‵lei latou, ko oti ne tofotofogina a nisi Kelisiano ke fakaaoga a togafiti kolā e ‵teke atu ei ki akoakoga fakavae o te tapuakiga tonu.

13, 14. (a) E mafai pefea o fakaaoga ne Satani a togafiti kolā e filifili ne tatou ke fakamasei ei ‵tou fakamaoni? (e) Kaia e ‵tau ei o ‵kalo katoatoa keatea tatou mai so se faifaiga faivailakau?

¹³ Ka fakaaoga ne Satani so se auala ke takitaki ‵se tatou mai te tapuakiga tonu. E pelā eiloa mo te fakaaogaga ne ia o faifaiga finalalolagi mo te fia maumea ke fakavāivāi ei nisi tino, e taumafai foki a ia o fakamasei te fakamaoni o nisi tino mai te faiga ke fakaaoga ne latou a togafiti kolā e mafai o aofia i ei a faifaiga faivailakau. E ‵talo tatou ki a Ieova ke faka‵sao tatou mai “te tino masei” mo “amioga ma‵sei katoa.” Tela la, e se ‵tau o talia ke ‵nofo atu tatou mai lalo i te pulega a Satani e auala i te fakaaogaga o so se faifaiga faivailakau.—Mataio 6:13, Tusitapu Tauloto; Tito 2:14.

¹⁴ Ne fakatapu ne Ieova a tino Isalaelu ma fakaaoga a poto fakataulaitu. (Teutelonome 18:10-12) Ne aofia ne Paulo a te “fai vailakau” i “manako faka te foitino.” (Kalatia 5:19, 20) E se gata i ei, a “tino fai vailakau” ka seai se lotou avanoaga i te fakanofonofoga fou a Ieova. (Fakaasiga 21:8) Tela la, e manino ‵lei me i so se mea e aofia i faifaiga faivailakau se mea fakatakalialia ki a Ieova.

‘Fakaasi Atu Otou Uiga Faigofie’

15, 16. Kaia e ‵tau ei o maua ne tatou te poto i te faifaiga o filifiliga mō te ola ‵lei, kae se a te polopolokiga poto ne tuku mai ne te potukau pule i te senitenali muamua?

¹⁵ E ‵tusa mo mea ko oti ne sau‵tala ki ei, kafai e fakalotolotolua tatou ki se vaegā togafiti, se mea poto ke ‵teke atu tatou ki ei. E tonu, a te sē mafai ne tatou o fakamatala faka‵lei atu te auala e fakagalue ei se togafiti, e se fakauiga i ei me e aofia faeloa a faifaiga faivailakau i ei. Ke tumau i se kilokiloga faka-te-Tusi Tapu ki te ola ‵lei, e manakogina ei ne tatou te poto mai te Atua mo te faiga o faka‵tauga ‵lei. E maua ne tatou te fakamalosiga tenei i te Faataoto mataupu e 3: “Talitonu ki [a Ieova] mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu. . . . Taofi mau ki tou poto mo tou atamai. . . . Ka avatu ne te poto ki a koe a te ola.”—Faataoto 3:5, 6, 21, 22.

¹⁶ I ‵tou taumafaiga ke tumau i te ola ‵lei, e ‵tau o fakaeteete tatou ke mo a e galo i a tatou te taliaga a te Atua māfai ko fakafesagai atu ki se masaki io me ko te tulaga matua. E pelā mo nisi mea aka, a te tausiga o te ola ‵lei, e ‵tau o ‘fakaasi atu ne tatou ‵tou uiga faigofie’ mai te ola e ‵tusa mo fakatakitakiga i te Tusi Tapu. (Filipi 4:5) I se tusi tāua e tasi, ne fakatonu atu a te potukau pule i te senitenali muamua ki Kelisiano ke ‵kalo keatea mai te ifo ki tupua, te ‵kai ki toto mo te finalalolagi. Ne aofia i te tusi tenā te fakamaoniga tenei: “Kafai e se fai ne koutou a mea konā, ka ‵lei otou olaga.” (Galuega 15:28, 29) I te auala fea?

Te Tausiga ‵Lei mo te Fakamoemoega ki te Ola ‵Lei Katoatoa

17. Ne aogā pefea ki a tatou i te feitu faka-te-foitino a te tau‵tali atu ki fakatakitakiga i te Tusi Tapu?

¹⁷ Se mea ‵lei ke fesili ifo ki a tatou eiloa, ‘E mata, e loto fakafetai au ki mea aogā ko maua ne au ona ko toku tautali fakamaoni atu ki fakatakitakiga i te Tusi Tapu e uiga ki te toto mo te finalalolagi?’ Ke mafaufau foki ki mea aoga ko maua ne tatou ona ko ‵tou taumafaiga ke “faka‵ma la tatou mai feitu kolā e fakamasei ne latou te foitino mo te agaga.” (2 Kolinito 7:1) E puipui tatou mai masaki valevale ona ko te ‵tou tau‵tali atu ki tulaga o te Tusi Tapu e uiga ki te tu ‵ma. E manuia foki tatou i te feitu faka-te-agaga mo te feitu faka-te-foitino ona ko te mea e ‵kalo keatea tatou mai te fakaaogaga o te paka mo vailakau tapu. Ke mafaufau foki ki te aoga ki te foitino a te kai mo te inu faka‵tau. (Faitau te Faataoto 23:20; Tito 2:2, 3.) E tiga eiloa e aoga foki a te malōlō malie mo te faiga o mea fakamalosilosi foitino, ne manuia eiloa tatou i te feitu faka-te-foitino mo te feitu faka-te-agaga ona ko te talia ne tatou o fakatakitakiga mai te Tusi Tapu.

18. Se a te mea e ‵tau o manava‵se malosi tatou ki ei, kae se a te valoaga e uiga ki te ola ‵lei telā e olioli tatou ke na fakataunu?

¹⁸ E sili i mea katoa, e ‵tau o tausi faka‵lei tatou ki ‵tou ola ‵lei i te feitu faka-te-agaga kae fakamalosi aka ‵tou fesokotakiga tāua mo ‵tou Tamana i te lagi, ko te Pogai o ‵tou “ola i aso nei mo te ola ka oko mai” i te lalolagi fou telā ne folafola mai ne ia. (1 Timoteo 4:8; Salamo 36:9) I te lalolagi fou a te Atua, ka maua i ei ne tatou te faka‵leiga katoatoa i te feitu faka-te-agaga mo te feitu faka-te-foitino e auala i te fakamagaloga o agasala telā e fakavae ki te taulaga togiola a Iesu. Ka takitaki tatou ne te Tamā Mamoe a te Atua, ko Iesu Keliso, ki “vai puna o te ola,” kae ka ‵solo ne te Atua a loimata katoa mai ‵tou mata. (Fakaasiga 7:14-17; 22:1, 2) I konā foki eiloa, ka lavea atu ei ne tatou te fakataunuga o te valoaga fakaofoofogia tenei: “Ka seai eiloa se tino i luga i te ‵tou fenua e tagi i a ia e masaki.”—Isaia 33:24.

19. I te tausi atu ki ‵tou ola ‵lei, se a te mea e tali‵tonu tatou ki ei?

¹⁹ E tali‵tonu tatou me ko pili te ‵tou faka‵saoga, kae ‵nofo fakatali‵tali tatou ki te aso ka fakaseai ei ne Ieova a ma‵saki mo te mate. I te vaitaimi tenei, e tali‵tonu tatou me i te ‵tou Tamana alofa ka fesoasoani mai ke kufaki tatou i masaki mo logo‵maega ona ko ‘tena atafai mai ki a tatou.’ (1 Petelu 5:7) Tela la, ke na tausi faka‵lei eiloa ne tatou ‵tou ola ‵lei kae tau‵tali atu faeloa ki fakatakitakiga kolā e maua i te Muna a te Atua!

[Fakamatalaga mai lalo]

Ke Toe Mafau‵fau ki ei

• Ko oi ne mafua mai i ei a masaki, kae ko oi ka fakamalepe ne ia a ikuga o te agasala?

• E tiga eiloa se mea ‵tau ke manava‵se tatou ki ‵tou ola ‵lei, se a te mea e ‵tau o ‵kalo keatea mai i ei?

• Kaia e tāua ei ki a Ieova a te togafiti telā e filifili ne tatou?

• E uiga ki ‵tou ola ‵lei, kaia e aoga ei a te tautali atu ki fakatakitakiga i te Tusi Tapu?

[Fakamatalaga o te Ata i te itulau e 20]

Ne seki faite a tino ke fe‵paki mo masaki mo te olaga matua

[Fakamatalaga o te Ata i te itulau e 22]

Faitalia a masaki, e fia‵fia eiloa a tino o Ieova i te faiga o te galuega talai