E faigata ki tino e tokouke i aso takitasi ke maua a mea e tausi ei te ola. Se mea fakafanoanoa, me e mafai o silia atu te faigata o te tulaga tenā ona ko te mea ko ‵fonu te lalolagi i fakalavelave. Kaia?
A fakalavelave ko ‵tupu i fa‵kai kese‵kese e fai ei ke momea aka te ‵togi ‵mafa o te olaga—e aofia i ei a meakai mo fale ‵nofo.
E mafai o momea aka te tokouke o tino e seai ne galuega io me ko ‵toli ifo olotou peofuga.
E mafai o fakamasei io me fakaseai atu ne fakalavelave o te natula a pisinisi, fale, io me ko nisi kope o tino, kae faimalo ei latou ke ola i se olaga mativa.
Mea e ‵Tau o Iloa ne Koe
Ko te fakaaoga faka‵lei o au tupe, ko te mafai ne koe o fa‵ki māfai ko tupu se matugā fakalavelave.
E se mafai o tumau te aoga o puipuiga e maua mai tupe; peofuga, tupe ‵teu, mo kope e mafai o ‵galo atu te lotou tāua.
E uke a mea e se mafai o ‵togi ki tupe, e pelā mo te fiafia mo te fealofani i te kāiga.
Mea e Mafai ne Koe o Fai Nei
E fai mai te Tusi Tapu: “Kafai ko maua a ‵tou meakai mo ‵tou gatu, ka lotoma‵lie eiloa tatou i ei.”—1 Timoteo 6:8.
A te lotomalie e aofia i ei a te fakamu‵tana o mea e ma‵nako tatou ki ei kae ke lotomalie ki mea e ‵tau maua mō ‵tou tausi i aso takitasi. E tāua ‵ki te mea tenei māfai ko se uke ‵tou tupe.
Ke lotomalie, kāti e ‵tau o ‵fuli tou vaegā olaga. Kafai e se ola koe e ‵tusa mo te uke o au tupe e maua, ka fai fua ke gasolo aka o faigata te olaga i mea tau tupe.