Se Tagata Loto Toa

A KOI kamata o gasolo aka a te aofaki o tino i te lalolagi, ako te tokoukega o latou ne fai ne latou a mea ma‵sei e pelā mo Kaino. Kae e tokotasi a te tagata ne ‵kese. Ko te tagata tenei e igoa ki a Enoka. A Enoka se tagata loto toa. A tino katoa kolā ne ‵nofo atu i ana tafa ne fai ne latou a mea ma‵sei, kae ne tumau eiloa a Enoka i te tavini atu ki te Atua.

E iloa ne koe me kaia ne fai ei ne tino i aso konā a mea ma‵sei e uke ‵ki? Ia, mafaufau la, Ko oi ne fai ne ia a Atamu mo Eva ke se faka‵logo ki te Atua kae ke ‵kai ki te fuagālakau telā ne fai atu te Atua ke se kai ne laua? E tonu, se agelu masei. E fakaigoa ne te Tusi Tapu a ia ko Satani. Kae e taumafai a ia ke fai ne ia a tino katoa ke ma‵sei.

I te aso e tasi ne fakaaogā ne Ieova te Atua a Enoka ke fai atu ki tino se mea telā e se fia lagona ne latou. Ko te mea tenei: ‘E isi se aso ka fakaseai ei ne te Atua a tino ma‵sei katoa.’ Kāti ne kaitaūa malosi a tino i te lagonaga o te mea tenei. Kāti ne taumafai foki eiloa latou o tamate a Enoka. Tela la, ne ‵tau o maua ne Enoka te loto toa ke fai atu ki tino e uiga ki te mea telā ka fai ne te Atua.

Ne seki talia ne te Atua ke ola a Enoka i se taimi leva ‵ki i va o tino ma‵sei konā. Ne ola a Enoka mō tausaga fua e 365. Kaia e fai atu ei tatou me ko “tausaga fua e 365”? Ona ko tāgata i aso konā ne sili atu te lotou ma‵losi i lō aso nei kae ne ola leva foki latou. E tonu, a te tama a Enoka ko Metusela ne ola ke oko eiloa ki te 969 ana tausaga!

Ia, mai tua o te matega a Enoka, ne gasolo aka eiloa o ma‵sei atu a tino. E fai mai a te Tusi Tapu me ‘i mea katoa ne mafau‵fau latou ki ei ne mea ma‵sei i taimi katoa,’ kae telā ‘ne ‵fonu ei a te lalolagi i amioga fakasauā.’

E iloa ne koe a te pogai e tasi me kaia ne ‵fonu ei a te lalolagi i fakalavelave e uke i aso konā? E fai penā ona ko te mea ne maua ne Satani se auala fou ke fai ei a tino ke fai ne latou a mea ma‵sei. Ka tauloto tatou e uiga ki te mea tenei i te suā mataupu.