Ne Tofotofo ne te Atua a te Fakatuanaki o Apelaamo

E MAFAI o matea ne koe me ne a mea e fai ne Apelaamo i konei? E isi sena naifi, kae e foliga mai me ka tamate ne ia tena tama. Kaia ka fai ei ne ia a te mea tenā? Muamua la, ke onoono aka tatou ki te auala ne maua ei ne Apelaamo mo Sala te lā tamaliki tagata.

Masaua, me ne tauto atu te Atua ki a laua me ka maua ne laua se tama tagata. Kae ne foliga mai me se mafai o tupu te mea tenā, me ko tō ma‵tua Apelaamo mo Sala. Kae ne talitonu Apelaamo me e mafai eiloa ne te Atua o fai a mea kolā e foliga mai me e se mafai o fai. Tela la, se a te mea ne tupu?

Mai tua ifo o te faiga ne te Atua o tena tautoga, ne teka atu se tausaga kātoa e tasi. Kae i te taimi ko kātoa ei te 100 tausaga o Apelaamo kae ko 90 a tausaga o Sala, ne maua ne laua se pepe tagata telā ne fakaigoa ki a Isaako. Ne fakataunu eiloa ne te Atua tena tautoga!

Kae i te taimi ko matua ei a Isaako, ne tofotofo ne Ieova a te fakatuanaki o Apelaamo. Ne kalaga atu a ia penei: ‘Apelaamo!’ Kae ne tali atu a Apelaamo: ‘Tenei au!’ Kae ne fai atu penei te Atua: ‘Puke tau tama, ko tau tama eiloa e tokotasi, ko Isaako, kae olo atu ki se mauga telā ka fakaasi atu ne au. I konā ke tamate tau tama kae ofo mai a ia pelā me se taulaga.’

E pefea te fakafanoanoa atu o pati konā ki a Apelaamo, me ne alofa malosi a Apelaamo ki tena tama tagata. Kae masaua, me ko oti ne tauto atu te Atua me ka ‵nofo a tama‵liki a Apelaamo i te fenua o Kanana. Kae ka mafai pefea o tupu a te mea tenā māfai ko mate a Isaako? Ne seki malamalama a Apelaamo, kae koi tumau eiloa tena fakalogo ki te Atua.

I te taimi ne oko atu ei a ia ki te mauga, ne saisai ne ia a Isaako kae ne tuku atu tou tagata ki luga i te fatafaitaulaga telā ne faite ne ia. Ne puke aka ne ia te naifi o tamate tena tama. Kae i te taimi foki eiloa tenā ne kalaga atu ei a te agelu a te Atua: ‘Apelaamo, Apelaamo!’ Kae ne tali atu a Apelaamo: ‘Tenei au!’

‘Sa fakapakia a te tamaliki io me fai so se mea ki a ia,’ ne fai mai te Atua. ‘Nei ko iloa ne au me e fakatuanaki mai koe ki a au, ona ko te mea ne seki taofi aka ne koe tau tama, tau tama eiloa e tokotasi, mai i a au.’

Ko tafaga la te lasi o te fakatuanaki o Apelaamo ki te Atua! Ne talitonu a ia me e seai se mea e se mafai o fai ne Ieova, kae e mafai ne Ieova o toe fakatu aka a Isaako mai te mate. Kae e se ko te loto tonu eiloa o te Atua ke tamate a Isaako ne Apelaamo. Tela la, ne fai ne te Atua se mamoe ke lavelave i te vao lakau telā e pili mai, kae ne fai atu a ia ki a Apelaamo ke tuku atu te mea tenā mo fai se taulaga i lō tena tama.