Apelaamo Se Tagata Alofa

Ko se ‵kafi ne Apelaamo o fa‵ki tena fanoanoa. Ko mate atu a tena avaga pele ko Sala. E ‵fonu eiloa te ulu o te toeaina i te fia afe o mafaufauga i te taimi ne fai atu ei ana toe pati fakamāvae. I te taimi ne gasolo aka ei o lasi te fanoanoa i tena loto, ne tagi ei a ia. (Kenese 23:1, 2) A loimata konei e sē se fakailoga o te vāivāi telā e ‵tau o mā i ei kae se fakatalitonuga o se uiga ‵lei e tasi o Apelaamo—ko tena alofa.

SE A TE ALOFA? A te alofa se lagonaga telā e oko mai ki te tino io me e lavea atu i te lasi o te atafai. A te tino e alofa e lavea fua i ana faifaiga e fai ki tino kolā e alofa a ia ki ei, ke oko foki loa ki te tulaga telā ko manakogina i ei ke tuku atu ne ia a ia eiloa.

NE FAKAASI MAI PEFEA NE APELAAMO A TE ALOFA? Ne fakaasi mai ne Apelaamo me ne alofa a ia ki tena kāiga. E seai se fakalotolotolua me i a Apelaamo se tagata e fakalavelave ‵ki eiloa. Kae ui ei, e saga atu faeloa a ia ki lagonaga mo manakoga faka-te-agaga o tena kāiga. A te tonuga loa, ne lavea ne Ieova a Apelaamo e pelā me se ulu o te kāiga telā e fai ne ia te takitakiga i te faiga o te tapuakiga. (Kenese 18:19) E se gata i ei, ne fakaasi mai foki ne Ieova a te alofa o Apelaamo. I te faipati atu ki a Apelaamo, ne fakasino atu a Ia ki a Isaako e pelā me ko “tau tama eiloa e tokotasi . . . telā e pele i tou loto.”—Kenese 22:2.

E mafai foki o lagona ne tatou a te alofa o Apelaamo i ana faifaiga ne fai i te taimi ne mate ei tena avaga pele ko Sala. Ne tagi fanoanoa eiloa Apelaamo i luga i tou fafine. E tiga eiloa a ia se tinā tagata eiloa kae malosi, ne seki mā a ia o fakaasi tena fanoanoa. Ne fakaasi mai ne Apelaamo se fakaakoakoga gali o te malosi mo te mataalofa.

Ne fakaasi mai ne Apelaamo me ne alofa a ia ki tena Atua. Ne fakaasi mai i tena olaga kātoa a te vaegā alofa tenā. E pefea la? Kāti e fakamasaua mai ki a tatou a pati a te Tusi Tapu i te 1 Ioane 5:3: “Me e tenei te uiga o te alofa ki te Atua, ko te fakalogo ki ana fakatonuga.” Mai luga i te fakamatalaga tenā, ne tu ‵kese eiloa te fakaakoakoga a Apelaamo e uiga ki te alofa ki te Atua.

I taimi katoa e tuku atu ei ne Ieova se fakatonuga ki a Apelaamo, se mea vave eiloa o fakalogo a Apelaamo. (Kenese 12:4; 17:22, 23; 21:12-14; 22:1-3) Faitalia me ne faigofie io me faigata te fakalogo ki te fakatonuga; io me ne iloa ne Apelaamo te pogai ne fai atu ei a Ieova ki a ia ke fakalogo ki ei. Ne fai eiloa a mea konā e pelā me ne tamā mea fua ki a Apelaamo. Kafai e manako atu tena Atua ke fai ne ia se mea, e loto fiafia eiloa a ia o fai. Ne kilo atu Apelaamo ki so se fakatonuga e pelā me se avanoaga ke fakaasi atu ei tena alofa ki a Ieova.

NE A AKOAKOGA E MAUA NE TATOU? E mafai o fakaakoako atu tatou ki a Apelaamo mai te fakaasiatuga o te alofa ki nisi tino, kae maise eiloa a tino o ‵tou kāiga. E sē talia lele ne tatou a mea faiga‵ta o te olaga ke ave ne ia kea‵tea a ‵tou taimi kolā e ‵tau o fakaaoga ki tino kolā e a‵lofa malosi tatou ki ei.

E ‵tau foki o ati aka te alofa tonu ki a Ieova. E mafai o fai a te vaegā alofa tenā e pelā me se malosi i ‵tou olaga. E pelā me se fakaakoakoga, e mafai o fakamalosi aka ne ia tatou ke ‵fuli ‵tou faifaiga, ‵tou pati, mo ‵tou amioga ko te mea ke fakafiafia atu ki te Atua.—1 Petelu 1:14-16.

Se mea tonu me e sē se mea faigofie ke fakalogo faeloa ki tulafono a Ieova. Kae mautinoa eiloa i a tatou me i te Tino telā ne fesoasoani atu ki a Apelaamo—te Tino telā ne taku ne ia tou tagata ko “toku taugasoa”—ka fesoasoani mai eiloa ki a tatou. (Isaia 41:8) E tauto mai tena Muna ko te Tusi Tapu: “Ka fai ne ia ke ‵mautakitaki koutou, kae ke ma‵losi foki.” (1 Petelu 5:10) Ko oko eiloa te fakamalosi loto o te tautoga tenā mai te Taugasoa fakatuagagina o Apelaamo.

[Ata i te itulau e 10]

E Mata, e se Lau ki Tāgata Māfai e Tagi?

Ka tali mai a tino e tokouke, ao. E se taumate ka ‵poi latou māfai e iloa atu me i a Apelaamo se tino e tokotasi mai tāgata fakamaoni kolā e fakamatala mai i te Tusi Tapu e pelā me ne ‵tagi i taimi o fakalavelave. A nisi tino kolā e aofia i ei ko Iosefa, Tavita, te apositolo ko Petelu, toeaina i te fakapotopotoga i Efeso, pelā foki mo Iesu. (Kenese 50:1; 2 Samuelu 18:33; Luka 22:61, 62; Ioane 11:35; Galuega 20:36-38) E manino ‵lei me e se akoako mai i te Tusi Tapu me kafai e tagi se tagata ko sē lau a ia ki tāgata.