Ne Kilo ki Tua te Avaga o Lota

NE ‵NOFO a Lota mo tena kāiga fakatasi mo Apelaamo i te fenua o Kanana. I te aso e tasi ne fai atu ei a Apelaamo ki a Lota: ‘Ko se lava a te manafa i konei mō ‵tou manu katoa. Fakamolemole, ke na vae aka tāua. Kafai e fano koe ki te feitu e tasi, ko fano ei au ki te suā feitu.’

Ne kilokilo atu a Lota ki te fenua. Ne lavea ne ia se vaega gali o te fenua telā ne isi ne vai mo mouku ‵gali mō ana manu. A te koga tenei ko te Vanu o Iolitana. Telā ne avatu ei ne Lota tena kāiga mo ana manu ki konā. Ne ‵nofo fakamuli latou i te fa‵kai ko Sotoma.

Ne ma‵sei ‵ki a tino o Sotoma. Ne kaitaua a Lota i te mea tenei, me i a ia se tagata ‵lei. Ne kaitaua foki te Atua. Fakamuli loa, ne uga atu ne te Atua a agelu e tokolua ke fakailoa atu ki a Lota me ka fakaseai ne ia a Sotoma mo te fa‵kai pili atu ki ei ko Komolo ona ko te ma‵sei o latou.

Ne fai atu penei a agelu konei ki a Lota: ‘Fakavave! Puke tau avaga mo au tama fāfine e tokolua, kae olo atu kea‵tea mai konei!’ Ne tai fakatuatuai malie a Lota mo tena kāiga i te olo atu kea‵tea, kae ne puke atu a agelu ki a latou i olotou lima kae ‵taki atu ki tua mo te fa‵kai. Kae ne fai atu a te agelu e tokotasi: ‘‵Tele ke ‵sao koutou! Sa ‵kilo ki tua. ‵Tele ki mauga, ko te mea ke se tamategina koutou.’

Ne faka‵logo a Lota mo ana tama fāfine kae ne ‵tele atu kea‵tea mai Sotoma. Ne seki ‵tu malie latou, kae ne seki ‵kilo foki latou ki tua. Kae ne seki fakalogo a te avaga o Lota. Ko tai ‵mao malie atu latou mo Sotoma, ne tu tou fafine kae ne kilo atu ki tua. I konā eiloa ne liu pou masima a te avaga o Lota. E mata, e lavea ne koe a ia i te ata?

E mafai o tauloto ne tatou se akoakoga tāua mai te mea tenei. E fakaasi mai ki a tatou me e faka‵sao ne te Atua a latou kolā e faka‵logo ki a ia, kae ko latou kolā e se faka‵logo ki a ia ka ‵galo atu olotou ola.