Ko Maua ne Isaako se Avaga ‵Lei

E ILOA ne koe me ko oi a te fafine i te ata tenei? A tena igoa ko Lepeka. Kae ko te tagata telā e fanatu tou fafine o fakafetaui ki ei ko Isaako. Ka fai tou fafine mo fai tena avaga. Ne tupu pefea a te mea tenei?

Ia, ne manako a te tamana o Isaako ko Apelaamo ke maua se avaga ‵lei mō tena tama tagata. Ne seki manako a ia ke avaga a Isaako ki se fafine e tokotasi i Kanana, me ne tapuaki atu a tino konā ki atua ‵se. Telā ne fakatonu atu ei a Apelaamo ki tena tavini kae ne fai atu penei: ‘Au e manako ke foki atu koe ki te koga e ‵nofo ei oku kāiga i Halana kae puke mai se avaga ma taku tama ko Isaako.’

I konā loa ne puke ne te tavini a Apelaamo a kamela e sefulu kae ne faimalaga atu i te malaga loa tenā. I te taimi ko pili atu ei a ia ki te koga ne ‵nofo ei a kāiga o Apelaamo, ne tu a ia i tafa o se vaikeli. A te taimi tenā ko te afiafi, ko te taimi telā ka ‵mai ei a fāfine o te fa‵kai o asu a vai mai te vaikeli. Tela la, ne fai atu ne te tavini a Apelaamo se ‵talo ki a Ieova: ‘Ke fai a te fafine telā e fāinu ne ia au mo aku kamela mo fai te tino telā e filifili ne koe mo fai te avaga a Isaako.’

E seki leva kae ne vau a Lepeka o asu vai. I te taimi ne fakamolemole atu ei a te tavini ke inu a ia, ne tuku atu ne tou fafine se mea inu ki a ia. I te otiga ne fanatu tou fafine o toe asu mai ne vai ke lava mō fāinu a kamela katoa. Ne faigata a te mea tenā me ne uke ‵ki a vai e inu ki ei a kamela.

I te otiga ne fai ne Lepeka a te mea tenei, ne fesili atu ei a te tavini a Apelaamo me ko oi te igoa o tena tamana. Ne fesili atu foki a ia me e mafai o nofo a ia i te lotou fale i te po tenā. Muna a tou fafine: ‘Toku tamana ko Petueli, kae e lava a koga ‵nofo i te fale ke ‵nofo fakatasi tatou.’ Ne iloa ne te tavini a Apelaamo me i a Petueli ko te tama a te taina o Apelaamo ko Nakoli. Telā ne totuli ifo tou tagata kae fakafetai atu ki a Ieova mō tena takitakiga ke oko atu a ia ki kāiga o Apelaamo.

I te po tenā ne fai atu ne te tavini a Apelaamo ki a Petueli mo te tuagane o Lepeka ko Lapana a te pogai ne vau ei a ia. Ne lotoma‵lie tasi laua me e mafai o olo laua mo Lepeka kae avaga a ia mo Isaako. Ne a pati a Lepeka i te taimi ne fesili atu ei ki a ia? Muna a tou fafine, ‘Ao,’ ne manako a ia o fano. Tela la, i te suā aso ne ‵sopo latou ki luga i kamela kae ne kamata te malaga loa ki Kanana.

A te taimi ne oko atu ei latou, ko te afiafi. Ne lavea ne Lepeka se tagata e sasale i te malae. Ko Isaako. Ne fiafia tou tagata ke lavea ne ia a Lepeka. Ne fatoā mate atu tena mātua ko Sala i tausaga fua e tolu mai mua i ei, kae koi fanoanoa eiloa a ia e uiga ki te mea tenā. Kae i konā loa ne kamata o alofa malosi a Isaako ki a Lepeka, kae ne toe fiafia tou tagata.