E Fakamaoni a Iopu ki te Atua

E MATA, e alofa koe ki te tagata masaki tenei? A tena igoa ko Iopu, kae ko te fafine tenā ko tena avaga. E iloa ne koe me ne a ana pati e fai atu ki a Iopu? ‘Muna masei atu ki te Atua kae ke mate koe.’ Ke onoono aka tatou me kaia ne fai ei ne ia se vaegā mea masei penā, mo te pogai ne logo‵mae malosi ei a Iopu.

A Iopu se tagata fakamaoni telā ne fakalogo ki a Ieova. Ne nofo a ia i te fenua ko Usa, e se ‵mao mai Kanana. Ne alofa malosi a Ieova ki a Iopu, kae ne isi se tino telā ne takalialia ki a ia. E iloa ne koe me ko oi?

Ko Satani te Tiapolo. Masaua, a Satani ko te agelu masei telā e takalialia ki a Ieova. Ne mafai ne ia o fai Atamu mo Eva ke se faka‵logo ki a Ieova, kae ne mafaufau tou tagata me e mafai ne ia o fai a tino katoa ke se faka‵logo foki ki a Ieova. Kae e mata, ne mafai ne ia o fai penā? Ikai. Mafaufau la ki te fia o tāgata mo fāfine fakamaoni kolā ko oti ne tau‵loto tatou e uiga ki ei. E tokofia e mafai ne koe o taku mai?

Mai tua o te ‵matega o Iakopo mo Iosefa i Aikupito, ne fai a Iopu mo fai te ‵toe tino fakamaoni ki a Ieova i te lalolagi kātoa. Ne manako a Ieova ke iloa ne Satani me e se mafai ne ia o fai a tino katoa ke ma‵sei, telā ne fai atu ei a ia penei: ‘Kilo atu ki a Iopu. E lavea ne koe a te lasi o tena fakamaoni mai ki a au.’

‘E fakamaoni tou tagata,’ ne kinau mai a Satani, ‘me e fakamanuia ne koe a ia kae e maua foki ne ia a mea ‵lei e uke. Kae kafai e ave keatea ne koe a mea konei, ka faifai muna a ia ki a koe.’

Telā ne fai atu ei a Ieova: ‘Fano la. Ave kea‵tea ana mea katoa konā. Fai a mea ma‵sei e manako koe o fai ki a Iopu. Ka matea ne taua me ka faifai muna mai a ia ki a au io me ikai. Kae ke mo a fua ma tamate ne koe a ia.’

Muamua la, ne fai ne Satani a tāgata ke kaisoa ne latou a pulumakau mo kamela a Iopu, kae ne tamate ana mamoe. Oti aka loa, ne tamate ne ia ana tama tāgata mo tama fāfine e toko 10 i se afā. E ‵tao atu ki ei, ne tuku atu ne Satani ki a Iopu a te masaki matagā tenei. Ne logo‵mae malosi a Iopu. Tenā eiloa a te pogai ne fai atu ei a te avaga a Iopu ki a ia: ‘Muna masei atu ki te Atua kae ke mate koe.’ Kae ne seki fai ne Iopu a te mea tenā. Ne o‵mai foki ana taugasoa fakaloiloi e tokotolu kae ne fai atu ki a ia me ne ola a ia i se olaga masei. Kae ne tumau eiloa a Iopu i te fakamaoni.

A te mea tenei ne fai ei ke fiafia malosi a Ieova, kae ne fakamanuia fakamuli ne Ieova a Iopu, e pelā mo te mea e mafai ne koe o matea i te ata. Ne faka‵lei ne ia tou tagata mai tena masaki. Ne toe maua ne Iopu a tama‵liki mata‵gali e toko 10, kae ne fakasilia fakalua te uke o ana pulumakau, mamoe mo kamela i ana mea ne maua i te taimi muamua.

Ka tumau faeloa tou fakamaoni ki a Ieova e pelā mo Iopu? Kafai e penā loa, ka fakamanuia foki ne te Atua a koe. Ka mafai ne koe o ola ki te se-gata-mai i te taimi telā ka fai ei a te lalolagi kātoa ke gali pelā eiloa mo te fatoaga o Etena.