Ko Tuku Atu ne Ieova Ana Tulafono

KĀTI i se lua masina mai tua ifo o te tiakinaga ne latou o Aikupito, ne oko atu a te kau Isalaelu ki te Mauga o Sinai, telā ne taku foki ko Olepa. Tenei eiloa te koga ne faipati atu ei a Ieova ki a Mose mai loto i te lakau ‵ka. Ne ‵nofo atu a tino i konā i se vaitaimi.

A koi faka‵tali a tino i lalo, ne kake aka a Mose ki luga i te mauga. I luga i te tāulu o te mauga, ne fai atu a Ieova ki a Mose me e manako a Ia ke faka‵logo a te kau Isalaelu ki a Ia kae ke fai latou mo Ana tino fakapito. I te taimi ne fanaifo ei a Mose ki lalo, ne fakamatala atu ne ia ki te kau Isalaelu a mea kolā ko oti ne fai atu ne Ieova. Kae ne fai atu a tino me ka faka‵logo eiloa latou ki a Ieova, me e ma‵nako latou ke fai latou mo ana tino.

I konā ne fai ei ne Ieova se mea fakaofoofogia. Ne fai ne ia ke ‵fonu te tāulu o te mauga i te au, kae ke ‵pa malosi a fa‵tili. Ne faipati mai foki a ia ki ana tino penei: ‘Au ko Ieova te Atua telā ne aumai ne ia koutou kea‵tea mai Aikupito.’ Telā ne fakatonu atu ei a ia penei: ‘E se ‵tau mo koutou o tapuaki atu ki se isi atua kae na ko au.’

Ne toe tuku atu ne Ieova ki te kau Isalaelu a nisi fakatonuga io me ko tulafono e iva. Ne ma‵taku malosi a tino. Ne fai atu latou ki a Mose: ‘Ke faipati mai koe ki a matou, me i a matou ko ma‵taku me kafai e faipati mai a te Atua ki a matou ko matou ka ‵mate.’

Fakamuli ifo ne fai atu a Ieova ki a Mose: ‘Vau ki a au i luga i te mauga. Ka tuku atu ne au ki a koe a papa fatu e lua kolā ko oti ne tusi ne au ki luga i ei a tulafono kolā e manako au ke tausi ne tino.’ Telā ne toe fanaka a Mose ki luga i te mauga. Ne nofo a ia i konā i ao mo po e 40.

Ne uke ‵ki a tulafono a te Atua mō ana tino. Ne tusi ne Mose ki lalo a tulafono konei. Ne tuku atu foki ne te Atua ki a Mose a papa fatu e lua. I mea konei, ne tusi eiloa ne te Atua a tulafono e 10 kolā ne faipati atu ne ia ki ana tino katoa. E fakaigoa a mea konei ko Tulafono e Sefulu.

A Tulafono e Sefulu ne tulafono tāua ‵ki. Kae ne tāua foki a nisi tulafono katoa kolā ne tuku atu ne te Atua ki te kau Isalaelu. E tasi o tulafono i tulafono konei e fai penei: ‘E ‵tau mo koe o alofa ki a Ieova tou Atua mo tou loto kātoa, tou mafaufau kātoa, tou ola kātoa mo tou malosi kātoa.’ Kae ko te suā mea: ‘E ‵tau mo koe o alofa ki tou tuakoi e pelā mo koe ki a koe eiloa.’ A te Tama a te Atua, ko Iesu Keliso, ne fai mai me konei eiloa a toe tulafono tafasili i te tāua kolā ne tuku atu ne Ieova ki ana tino Isalaelu. Ka tau‵loto fakamuli tatou ki mea e uke atu e uiga ki te Tama a te Atua mo ana akoakoga.