Te Lakau ‵Ka

NE FANATU a Mose ki te mauga o Olepa ke maua ne mouku mō ana mamoe. I konā ne lavea ei ne ia se lakau e ‵ka, kae e se ‵paku!

Ne mafaufau a Mose, ‘E fakaofoofogia a te mea tenei. Ka fakapilipili atu au ke lavea faka‵lei ne au.’ I te taimi ne fai ei a ia penā, ne faipati mai se leo mai te lakau, penei: ‘Sa fakapilipili mai. Tapale kea‵tea ou taka, me i a koe e tu i luga i te laukele tapu.’ Ko te Atua tenā e faipati e auala i se agelu, telā ne ufi ei ne Mose ana mata.

Telā ne fai atu ei te Atua penei: ‘Ko oti ne lavea ne au a te logo‵mae o oku tino i Aikupito. Tela la, ka fakasaoloto ne au latou, kae ko koe ko te tino ka uga atu ne au ke takitaki mai oku tino kea‵tea mai Aikupito.’ Ne fai pelā me ka aumai ne Ieova ana tino ki te fenua gali o Kanana.

Kae ne fai atu penei a Mose: ‘Au se tagata fua e seai se aogā. E mafai pefea o fai ne au a te mea tenei? Kae e a māfai ko fano au. Ka fai mai a tino Isalaelu ki a au, “Ko oi ne uga mai ne ia koe?” Ne a la aku pati ka fai?’

Ne tali mai te Atua, ‘Konei au pati e ‵tau o fai atu. “A IEOVA te Atua o Apelaamo, te Atua o Isaako mo te Atua o Iakopo ne uga mai ne ia au ki a koutou.”’ Kae ne fakaopoopo mai penei a Ieova: ‘Tenei eiloa toku igoa ki te se-gata-mai.’

‘Kae e a māfai e se tali‵tonu latou i te taimi e fai atu ei au me ne uga atu au ne koe,’ ne tali mai a Mose.

‘Se a te mea tenā i tou lima?’ ne fesili atu te Atua.

Ne tali atu a Mose: ‘Se tokotoko.’

‘‵Pei ki lalo i te laukele,’ ne fai atu a te Atua. Kae i te taimi ne ‵pei ei ne Mose, ne ‵fuli a te tokotoko ki se gata. Telā ne toe fakaasi atu ei ne Ieova ki a Mose a te suā vavega: ‘Tuku tou lima ki loto i tou gatu.’ Ne fai ne Mose penā, kae i te taimi ne tuku ei tena lima ki tua, ne ‵kena eiloa pelā me se kiona! Ne foliga mai tena lima pelā me ko maua ne te masaki masei e igoa ki te lepela. ‵Soko atu ki ei ne tuku atu ne Ieova ki a Mose a te ‵mana ke fai a te tolu o vavega. I te otiga ne fai atu ei a ia: ‘Kafai e fai ne koe a vavega konei ka tali‵tonu a te kau Isalaelu me ne uga atu ne au a koe.’

Mai tua ifo i konā ne fanatu a Mose ki te fale kae ne fai atu ki a Ietelo penei: ‘Fakamolemole tuku mai au ke foki atu ki oku kāiga i Aikupito ke onoono aka me e pefea latou.’ Telā ne fakatofa atu ei a Ietelo ki a Mose, kae ne kamata ne Mose tena malaga ki Aikupito.