Se Tino Kaisoa i Isalaelu

ONOONO aka ki te mea telā ko tanu ne te tagata tenei i tena faleie! Se gatu ‵loa gali, mo se potu aulo mo nāi siliva. Ne puke ne ia a mea konā mai te fa‵kai o Ieliko. Kae se a te mea ne ‵tau o fai ki mea i Ieliko? E masaua ne koe?

Ne ‵tau o fakamasei a mea katoa konā, kae ko aulo mo siliva ne ‵tau o tuku atu ki te koga tausi mea i te faleie o Ieova. Tela la, ne seki faka‵logo a tino konei ki te Atua. Ne kai‵soa ne latou a mea a te Atua. A te igoa o te tagata ko Akana, kae ko tino kolā e ‵nofo tasi mo ia ko tino o tena kāiga. Ke onoono aka tatou me se a te mea ne tupu.

Ko oti ne kaisoa ne Akana a mea konei, kae ne uga atu ne Iosua a nisi tāgata ke taua atu ki te fa‵kai o Ai. Kae ne takavale latou i te taua. Nisi tāgata o latou ne tamate, kae ko te ‵toega ne ‵tele kea‵tea. Ne fanoanoa malosi i ei a Iosua. Ne takato a ia ki lalo mo ana mata e ‵fuli ki te laukele kae ne ‵talo atu ki a Ieova: ‘Kaia ne talia ei ne koe ke tupu a te mea tenei ki a matou?’

Ne tali atu a Ieova: ‘Tu ki luga! Ko agasala a Isalaelu. Ko oti ne puke ne latou a mea kolā ne fai atu ne au ke fakamasei io me ke tuku atu ki loto i te faleie o Ieova. Ne kaisoa kae ne ‵funa aka foki ne latou se gatu ‵loa kae gali. Ka se fakamanuia ne au koutou ke oko ki te taimi e fakamasei ei a mea konā, mo te tino telā ne puke ne ia a mea konā.’ Ne fai atu a Ieova me ka fakaasi atu ne ia ki a Iosua me ko oi te tagata masei.

Telā ne fakamaopoopo ei ne Iosua a tino katoa, kae ne fakasino atu a Ieova ki te tagata masei ko Akana. Ne fai mai a Akana: ‘Au ko agasala. Ne lavea ne au se gatu ‵loa gali, se potu aulo mo siliva. Ne manako malosi au ki ei, telā ne puke ei ne au a mea konā. E mafai o maua ne koutou a mea konā e tanu i toku faleie.’

I te taimi ne maua ei a mea konā kae ne aumai ki a Iosua, ne fai atu a ia ki a Akana: ‘Kaia ne aumai ei ne koe a fakalavelave ki a matou? Ka aumai nei ne Ieova a fakalavelave ki a koe!’ I konā ne peipei ei ne tino katoa a Akana mo tena kāiga ki fatu ke ‵mate latou. E mata, e se fakaasi mai i ei me e se ‵tau mo tatou o puke a mea kolā e se i a tatou?

Mai tua ifo ne olo atu a te kau Isalaelu o toe taua atu ki Ai. Ne fesoasoani atu a Ieova ki ana tino, kae ne manumalo latou i te taua.