Luta mo Naomi

I TE Tusi Tapu e mafai o maua ne koe i ei se tusi telā e fakaigoa ki a Luta. A te tusi tenā se tala e uiga ki se kāiga telā ne ola i te taimi ne isi ei ne fāmasino o Isalaelu. A Luta se tamāfine mai te fenua o Moapi; ne seki fai a ia mo fai se tino mai te fenua o te Atua ko Isalaelu. Kae i te taimi ne tauloto ei a Luta ki mea e uiga ki te Atua tonu ko Ieova, ne gasolo aka a ia o alofa malosi ki a Ieova. A Naomi se lōmatua telā ne fesoasoani atu ki a Luta ke tauloto ki mea e uiga ki a Ieova.

A Naomi se fafine Isalaelu. Ne olo tou fafine mo tena avaga mo ana tama tāgata e tokolua ki te fenua o Moapi i te taimi ne mu‵tana ei a mea‵kai i Isalaelu. Kae i te aso e tasi ne mate ei a te avaga a Naomi. Fakamuli ifo ne a‵vaga a tama tāgata a Naomi ki fāfine Moapi e tokolua e fakaigoa ki a Luta mo Olepa. Kae mai tua ifo o te 10 tausaga, ne ‵mate ei a tama tāgata a Naomi. E pefea te fanoa‵noa o Naomi mo fāfine e tokolua konei! Ne a mea ne fai ne Naomi i ei?

I te aso e tasi ne fakaiku aka ne Naomi ke fai ne ia se malaga loa ke toe foki atu ki ana tino. Ne ma‵nako a Luta mo Olepa o ‵nofo fakatasi mo ia, telā ne olo tasi ei latou. Kae mai tua malie ifo o te lotou malaga i te auala, ne ‵fuli atu a Naomi ki te avā fāfine kae ne fai atu: ‘‵Foki ki oulua fale kae ‵nofo fakatasi mo oulua mātua.’

Ne sogi fakamāvae atu a Naomi ki te tokolua fāfine konā. I konā ne kamata o ‵tagi laua me ne a‵lofa malosi laua ki a Naomi. Ne fai atu laua: ‘Ikai! Maua e olo fakatasi mo koe ki ou tino.’ Kae ne tali atu a Naomi: ‘E ‵tau mo koulua o toe ‵foki, aku tama. E ‵lei atu mō koulua ke ‵foki ki oulua fale.’ Telā ne kamata ei a Olepa o foki atu ki tena fale. Kae ne seki fano a Luta.

Ne ‵fuli atu a Naomi ki tou fafine kae ne fai atu: ‘Ko oti ne fano a Olepa. Ke fano foki koe ke olo tasi koulua ki te lua fenua.’ Kae ne tali atu a Luta: ‘Sa taumafai o fai ke tiakina ne au a koe! Talia mai au ke olo fakatasi taua. A te koga e fano koe ki ei, au e fano ki ei, te koga e nofo koe i ei, e nofo foki au i ei. Ou tino ka fai foki mo oku tino, mo tou Atua ka fai foki mo oku Atua. Ko te koga e mate koe i ei ka mate foki au i ei, kae tenā foki te koga e tanu ei au.’ I te taimi ne fai atu ei ne Luta a pati konei, ne seki toe taumafai a Naomi o fai tou fafine ke foki ki tena kāiga.

Fakamuli loa, ne oko atu a fāfine e tokolua konā ki Isalaelu. Ne fakatokatoka laua ke ‵nofo i konā. Ne kamata fakavave a Luta o galue i fatoaga, ona ko te taimi tenā ko te taimi ‵kati kalite. E isi se tagata e igoa ki a Poasa ne talia ne ia tou fafine ke taetae fuaga kalite i tena fatoaga. E iloa ne koe me ko oi te mātua o Poasa? Ko Lahapa mai te fa‵kai o Ieliko.

I te aso e tasi ne fai atu a Poasa ki a Luta: ‘Ko oti ne lagona ne au a mea katoa e uiga ki a koe, mo te auala ne alofa atu ei koe ki a Naomi. E iloa ne au me ne tiakina ne koe a tou tamana mo tou mātua mo tou fenua kae ne vau koe ki konei ke ‵nofo i tino kolā ne seki masani muamua koe ki ei. Ke fakamanuia atu a Ieova ki a koe!’

Ne tali atu a Luta: ‘Ko oko eiloa i tou alofa mai ki a au. Ko oti ne fai ne koe au ke ‵lei oku lagonaga mai te atafai mai o au pati ki a au.’ Ne fiafia malosi a Poasa ki a Luta, kae e seki leva kae ne avaga laua. E pefea te fiafia o Naomi i te mea tenā! Kae ne sili atu a te fiafia o Naomi i te taimi ne maua ei ne Luta mo Poasa a te lā tama tagata muamua eiloa, e igoa ki a Opeta. Fakamuli ifo, ne fai a Opeta mo fai te tupuna o Tavita, kae ka tauloto fakamuli tatou ki mea e uke e uiga ki a ia.