Te Pogai e ‵Tau ei mo Tavita o Tele Keatea

MAI tua o te tamatega ne Tavita a Koliata, ne avatu a ia ne te pule o te kautau o Isalaelu, ko Apinelu, ki a Saulo. Ne fiafia malosi a Saulo ki te mea ne fai ne Tavita. Ne fai ne ia tou tagata ke pule i tena kautau kae ke nofo i te fale o te tupu.

Fakamuli ifo, i te taimi ne ‵foki atu ei a te kautau mai te tauaga mo te kau Filisitia, ne usu pese atu a fāfine: ‘Ko oti ne tamate ne Saulo a tino e toko afe, kae ko Tavita e toko sefulu afe.’ Ne fai ne te mea tenei ke loto masei a Saulo, me ne tuku atu a te fakaaloaloga e sili atu ki a Tavita i lō Saulo. Kae ko te tama tagata a Saulo ko Ionatana ne seki loto masei. Ne alofa malosi a ia ki a Tavita, kae ne alofa foki a Tavita ki a Ionatana. Tela la, ne fai ne te tokolua konei se tautoga, te suā tino ki te suā tino, me ka tumau eiloa te lā va fakataugasoa.

A Tavita se tino poto ‵ki i te tātā kitala, kae ne fiafia a Saulo ki pese kolā ne tātā ne ia. Kae i te aso e tasi ona ko te loto masei o Saulo, ne fai ei ne ia se mea matagā. A koi tātā a Tavita i te kitala, kae ne puke ne Saulo tena tao, ne velo atu, kae ne fai atu penei: ‘Ka fakapiki ne au a Tavita ki te pui!’ Ne fakaseke a Tavita, kae ne seke te tao. Fakamuli ifo, ne toe seke te tao a Saulo mo Tavita. Tela la, ne iloa ei ne Tavita me e ‵tau mo ia o fakaeteete malosi.

E masaua ne koe a te tautoga a Saulo ne fai? Ne fai mai me ka tuku atu ne ia tena tama fafine mo fai te avaga a te tagata telā e tamate ne ia a Koliata. Ne fai atu fakamuli a Saulo me e mafai o maua ne ia tena tama fafine ko Mekala, kae e ‵tau o tamate muamua ne ia a fili e toko 100 mai te kau Filisitia. Mafaufau la ki te mea tenā! A te tonuga eiloa, ne fakamoemoe a Saulo me ka tamate ne te kau Filisitia a Tavita. Kae ne seki fai latou penā, telā ne tuku atu ei ne Saulo tena tama fafine ke fai mo fai te avaga a Tavita.

I te aso e tasi ne fai atu a Saulo ki a Ionatana mo ana tavini katoa me e manako a ia ke tamate a Tavita. Kae ne fai atu a Ionatana ki tena tamana: ‘Sa fakapakia ne koe a Tavita. Ne seki fai aka eiloa ne ia se mea ‵se ki a koe. I lō te fai penā, a mea katoa ne fai ne ia ne fesoasoani malosi atu ki a koe. Moi ne mate a ia i te taimi ne tamate ei ne ia a Koliata, kae i te taimi ne lavea ei ne koe a te mea tenā, ne fiafia koe.’

Ne fakalogo a Saulo ki tena tama, kae ne tauto atu me ka se fai ne ia se mea masei ki a Tavita. Ne toe aumai a Tavita, kae ne toe tavini atu ki a Saulo i tena fale e pelā mo ana mea ne fai muamua. E tiga eiloa te feitu tenā, i te aso e tasi, kae koi tātā ne Tavita ana pese, ne toe velo atu foki ne Saulo a tena tao ki a Tavita. Ne fakaseke ne Tavita, kae ne poko te tao ki te pui. Tenei eiloa a te tolu o taimi! Ne iloa ei ne Tavita me e ‵tau o tele keatea a ia!

I te po tenā ne fano a Tavita ki tena fale eiloa. Kae ne uga atu ne Saulo a nisi tāgata ke tamate a ia. Ne iloa ne Mekala a te fuafuaga a tena tamana. Tela la, ne fai atu a ia ki tena avaga: ‘Kafai e se fano koe kea‵tea ma po nei, a koe ka mate eiloa ma taeao.’ I te po eiloa tenā ne fesoasoani atu a Mekala ki a Tavita ke sola keatea i se fāmalama. Kāti e ‵tusa mo te fitu tausaga ne ‵muni sāle ei a Tavita i koga kese‵kese ko te mea ke se mafai o maua a ia ne Saulo.