“Akoako Mai Au Ke Fai Ne Au Tou Loto”

“A koe ko toku Atua; akoako mai au ke fai ne au tou loto.”​—SALAMO 143:10.

MANATU TĀUA E ‵TAU O MASAUA

Ne a mea ne ‵tupu i te olaga o Tavita e fakaasi mai i ei me ne saga tonu atu a ia ki te auala e kilo atu a Ieova ki mea?

Se a te mea ne fesoasoani atu ki a Tavita ke malamalama i te loto o te Atua?

Se a te mea ka fesoasoani mai ke tumau tatou i te taliaga a Ieova?

1, 2. E aoga pefea ki a tatou a te faiga o te loto o te Atua, kae se a te mea e fakamoe‵moe tatou ke tauloto mai te tupu ko Tavita e uiga ki te mea tenei?

E SASALE atu koe i se koga maugā kae ko maga te auala ki auala e lua. Tefea te auala ka fano koe i ei? Kāti ka kake aka koe ki se koga tai maluga ke lavea ‵lei ne koe te auala e ‵tau o fano koe i ei? Kāti ka fesoasoani atu a te kilo mai te koga maluga tenā ke fakaiku aka ne koe a te ‵toe auala ‵lei ke fano koe i ei. A te fakagaluegaga o se fakatakitakiga tai ‵pau e mafai o fesoasoani mai ki a tatou māfai ko fai ne tatou a fakaikuga tāua. A te kilo atu ki mea mai te tulaga maluga o te ‵tou Māfuaga ka fai ei tatou ke ‘sa‵sale i te auala’ telā e talia ne Ieova.​—Isaia 30:21.

² I te ukega o taimi i tena olaga, ne fai ne te tupu o Isalaelu ko Tavita se fakaakoakoga fakaofoofogia i te faiga o te loto o te Atua. Ke onoono aka tatou ki nāi mea ne ‵tupu i te olaga o Tavita kae ke tauloto mai i uiga o se tagata telā ne tuku katoatoa atu tena loto ki a Ieova te Atua.​—1 Tupu 11:4.

NE FAKAMALUGA NE TAVITA A TE IGOA O IEOVA

3, 4. (a) Se a te mea ne fakaoso ei a Tavita ke fakafesagai atu ki a Koliata? (e) Ne kilo atu pefea a Tavita ki te igoa o te Atua?

³ Ke mafaufau ki te taimi ne fakafesagai atu ei a Tavita ki te ‵toa o Filisitia ko Koliata. Se a te mea ne fakamalosi atu ki a Tavita ke taua atu ki se matugā tagata lasi telā e katoatoa ana meatau kae nofo ki te iva mo te āfa futu (2.9 m) te maluga? (1 Samuelu 17:4) E mata, ko te loto malosi o Tavita? E mata, ko tena fakatuanaki ki te Atua? Ne tāua ‵ki a te avā uiga konā ki te lasi o tena loto toa. E ui i ei, ne fakamalosi atu eiloa ki a Tavita a te āva ki a Ieova mo tena igoa ke taua atu ki te matugā tagata lasi ‵ki tenā. Ona ko te kaitaua, ne fesili atu a Tavita: “Ko oi la te Filisitia fapaupau tenā e vau o taumafai o fakaseaoga mai te kautau a te Atua Ola?”​—1 Samuelu 17:26.

⁴ I te fakafesagai atu ki a Koliata, ne fai atu a te tamataene ko Tavita: “A koe e vau mo tau pelu mo tau tao, ka ko au e fanatu i te igoa o te Aliki Malosi, te Atua o te kautau a Isalaelu, telā ne muna masei koe ki ei.” (1 Samuelu 17:45) Mai te fakalagolago ki te Atua tonu, ne tamate ei ne Tavita a te toa o Filisitia ki se fatu fua e tasi ne pana atu ki ei. Ne talitonu a Tavita ki a Ieova kae fakamaluga a tena igoa i tena olaga kātoa kae e se ko te taimi fua tenā. E tonu, ne fakamalosi atu a Tavita ki te kau Isalaelu “ke fakamata‵mata ki te igoa tapu o Ieova.”​—Faitau te 1 Nofoaiga Tupu 16:​8-10, Tusi Paia, Samoa, NW.

5. E fakaasi mai pefea ne tino a te sē āva ki a Ieova i aso nei e pelā mo te mea ne fai ne Koliata?

⁵ E mata, e fakamatamata koe ke fai a Ieova mo fai tou Atua? (Ielemia 9:24) Ne a au mea e fai māfai ou tuakoi, taugasoa ga‵lue, taugasoa i te akoga, io me ko kāiga e fai‵pati sē āva ki a Ieova kae faifa‵kata e uiga ki ana Molimau? E mata, e faipati atu koe mo te loto toa māfai ko fakamasiasigina a te igoa o Ieova kae talitonu me e ‵lago atu a ia ki a koe? E tonu, e isi se “taimi o te nofo ‵mu mo te taimi o te faipati,” kae e se ‵tau o ‵ma tatou i te fai mo fai a Molimau a Ieova mo soko o Iesu. (Failauga 3:​1, 7; Maleko 8:38) E ui eiloa e ‵tau o apo kae ‵poto tatou māfai e fai‵pati atu ki tino kolā e se ‵saga tonu mai, ke mo a e fai tatou e pelā mo te kau Isalaelu kolā “ko oko eiloa i te lotou ma‵taku” i te lagonaga ne latou a pati fakaitaita a Koliata. (1 Samuelu 17:11) I lō te ma‵taku, ke na fai‵pati fakavave atu tatou ke puipui te igoa o Ieova te Atua. E ma‵nako tatou o fesoasoani atu ki tino ke iloa ne latou me ko oi tonu eiloa te Atua ko Ieova. Ke oko atu ki te gataga, e fakaaoga eiloa ne tatou a tena Muna tusia ke fesoasoani atu ki nisi tino ke lavea ne latou a te tāua o te fakapilipili atu ki te Atua.​—Iakopo 4:8.

6. Se a te mea ne manako a Tavita o fakataunu i tena fepakiga mo Koliata, kae se a te mea e ‵tau o ‵saga tonu tatou ki ei?

⁶ A te fepakiga o Tavita mo Koliata e akoako mai i ei ki a tatou a te suā akoakoga tāua. I te taimi ne tele mai ei a Tavita ki te taua, ne fesili atu a ia: “Se a te ‵togi ka maua ne te tagata e tamate ne ia te Filisitia tenā, kae faka‵sao Isalaelu mai te fakamasiasiga lasi tenā?” I te tali atu, ne toe fai atu ne latou olotou pati kolā ne fai atu muamua: A te “tino e mafai o tamate ne ia Koliata e maua sena togi lasi; mo tena tama fafine foki ka avatu ke avaga mo ia.” (1 Samuelu 17:​25-27) Kae ko te mauaga o se taui faka-te-foitino e se ko te mea telā e fakatāua tonu ne Tavita. E maluga atu a te mea telā e fakamoemoe a ia ki ei. Ne manako a Tavita o faka‵malu a te Atua tonu. (Faitau te 1 Samuelu 17:​46, 47.) Kae e a tatou? E mata, e ‵saga fua tatou ke maua se igoa ‵lei mai te fakaputuga o koloa e uke kae fai ke lauiloa tatou i te lalolagi? E mautinoa me e ma‵nako tatou ke fai pelā mo Tavita telā ne usu mai penei: “Ke takutaku fakatasi atu ne tatou te ‵malu o te Aliki; ke tavae foki fakatasi tatou ki tena igoa!” (Salamo 34:3) Tela la, ke tali‵tonu tatou ki te Atua mai te fakamalugaga o tena igoa ke maluga atu i ‵tou igoa totino.​—Mataio 6:9.

7. E mafai pefea o ati aka ne tatou a te fakatuanaki malosi telā e manakogina māfai e fe‵paki tatou mo tino kolā e se fia ‵saga tonu mai?

⁷ A te loto malosi o Tavita o taua atu ki a Koliata ne manakogina i ei a te talitonu katoatoa ki a Ieova. Ne malosi ‵ki eiloa te fakatuanaki o te tamataene ko Tavita. E tasi te auala ne ati aka ei ne tou tagata a tena fakatuanaki ko te fakalagolago ki te Atua i te taimi ne galue ei e pelā me se tausi mamoe. (1 Samuelu 17:​34-37) E manakogina foki ne tatou se fakatuanaki malosi ko te mea ke tumau tatou i te talai atu, maise loa māfai e fe‵paki tatou mo tino kolā e se ‵saga tonu mai. E mafai eiloa o ati aka ne tatou a te vaegā fakatuanaki tenā mai te fakalagolago ki te Atua i ‵tou mea e fai i aso takitasi. Pelā me se fakaakoakoga, e mafai o kamata ne tatou se sau‵talaga e uiga ki muna‵tonu i te Tusi Tapu fakatasi mo tino kolā e saga‵saga fakatasi mo tatou i te taimi e faima‵laga ei tatou. Kae kaia foki la e se fai‵pati atu ei tatou ki tino kolā e fetaui mo tatou i te auala i te taimi e olo atu ei tatou i te galuega mai fale ki fale?​—Galuega 20:​20, 21.

NE FAKA‵TALI A TAVITA KI A IEOVA

8, 9. I ana faifaiga ki te tupu ko Saulo, ne fakaasi atu pefea ne Tavita me ne masaua faeloa ne ia te mea e loto ki ei a Ieova?

⁸ A te suā fakaakoakoga o te loto fiafia o Tavita o talitonu ki a Ieova ne aofia i ei a Saulo​—te tupu muamua o Isalaelu. E tolu taimi ne taumafai ei a Saulo o ‵velo a Tavita ke ‵piki ki te pui, kae ne fakaseke kea‵tea a Tavita i taimi takitasi konā, kae ita ma toe taua atu. I te fakaotiga loa, ne sola kea‵tea a ia mai i a Saulo. (1 Samuelu 18:​7-11; 19:10) Tenā ne filifili ei ne Saulo te 3,000 tāgata mai tino Isalaelu katoa ke olo o ‵sala a Tavita i te koga lavaki. (1 Samuelu 24:2) Fakamuli ifo loa, ne fanatu a Saulo mo te sē iloa ki loto i te ana telā e ‵muni ei a Tavita mo ana tāgata. Ne mafai o fakaaoga ne Tavita a te avanoaga tenei ke tamate a te tupu telā e fakalavelave atu ki tena olaga. I te fakaotiga loa, ko te loto eiloa o te Atua ke sui ne Tavita a Saulo e pelā me ko te tupu o Isalaelu. (1 Samuelu 16:​1, 13) E tonu, moi fai ne fakalogo a Tavita ki ana tāgata, penei ko oti ne tamate a te tupu. Kae ne muna mai a Tavita: “E se tau eiloa o fai ne au se mea ki ei, me i a ia ko te tupu telā ne filifilia ne te Aliki [Ieova]!” (Faitau te 1 Samuelu 24:​4-7.) Koi fai eiloa a Saulo mo tupu filifilia a te Atua. Ne seki manako a Tavita o puke te tulaga fakatupu o Saulo, me e seki tapale a ia ne Ieova. Mai te ‵kati fua o te kapa o te gatu o Saulo, ne fakaasi atu i ei ne Tavita me e seai se fakamoemoega o ia ke fakapakia a Saulo.​—1 Samuelu 24:11.

⁹ Ne toe fakaasi atu ne Tavita a te āva ki te tino filifilia a te Atua i te toe taimi ne lavea ei ne ia te tupu. I te taimi tenā, ne oko atu a Tavita mo Apisai ki te koga e mānava i ei a Saulo kae ne maua atu e to tena moe. E tigā eiloa ne mafaufau a Apisai me kāti ne tuku atu ne te Atua a te fili tenei ke tamate ne Tavita kae ofo atu ke ‵velo ne ia a Saulo ki te ‵tao, ne seki talia ne Tavita a te mea tenei. (1 Samuelu 26:​8-11) Ona ko Tavita ne tumau eiloa i te ‵sala atu ki fakatakitakiga a te Atua, ne seki gutugutulua a ia i tena fakaikuga ke fai a mea e ‵tusa mo te loto o Ieova faitalia a fakamalosiga mai i a Apisai.

10. Se a te tulaga faigata e mafai o fepaki mo tatou taki tokotasi, kae se a te mea ka fesoasoani mai ke ‵mautakitaki tatou?

¹⁰ Kāti e fe‵paki foki tatou mo se tulaga faigata i te taumafai a ‵tou taugasoa o fakamalosi tatou ke fai a mea kolā e mafaufau latou me ‵lei kae sē ‵lago mai ki a tatou i te faiga o te loto o Ieova. E pelā mo Apisai, kāti e fakamalosi mai foki a nisi tino ke fai ne tatou se mea e aunoa mo te mafaufau me se a te loto o te Atua e uiga ki te mea tenā. Ko te mea ke ‵tu ‵mautakitaki tatou, e ‵tau o masaua faka‵lei ne tatou a te kilokiloga a Ieova ki mea konā kae ke ‵piki ‵mau ki ana auala.

11. Se a te mea e tauloto ne koe mai i a Tavita e uiga ki te faiga o te loto o te Atua mo fai te ‵toe mea tāua i tou mafaufau?

¹¹ Ne ‵talo atu a Tavita ki a Ieova: “Akoako mai au ke fai ne au tou loto.” (Faitau te Salamo 143:​5, 8, 10.) I lō te fakalagolago ki ana manatu totino io me talia a fakamalosiga mai te suā tino, ne naunau eiloa te loto o Tavita ke akoako a ia ne te Atua. Ne ‘mafaufau au ki au mea katoa ne fai, ko fakamasaua ne au a galuega katoa a koe [Ieova] ne fai.’ E mafai o malama‵lama tatou i te loto o te Atua mai te sukesuke ki te Tusi Tapu kae mafaufau ‵loto ki tala faka-te-Tusi Tapu e uke e uiga ki faifaiga a Ieova ki tino.

NE MALAMALAMA A TAVITA I TE FAKAGALUEGAGA O FAKATAKITAKIGA

12, 13. Kaia ne ‵ligi ei ki lalo ne Tavita a vai kolā ne aumai ne ana tāgata e tokotolu ki a ia?

¹² A te loto fakafetai o Tavita ki fakatakitakiga kolā ne fakaata mai i te Tulafono mo tena manakoga ke ola e ‵tusa mo fakatakitakiga konā e aoga foki ke fakaakoako ki ei. Ke mafaufau ki te mea ne tupu i te taimi ne fakaasi mai ei ne Tavita a tena manako malosi o “inu mai i te vaikeli i tafa o te mataloa i Peteleema.” Ne taumafai eiloa a tāgata e tokotolu a Tavita o ulu ki loto i te fa‵kai telā ko nofoaki ne te kau Filisitia i te taimi tenā, kae puke mai ne latou ne vai mai i ei. “Ka ko Tavita e seki inu ki ei, kae ne ‵ligi ne ia ki lalo e fai mo taulaga ki te Aliki [Ieova].” Kaia? Ne fakamatala mai a Tavita: “E se mafai ne au o inu te mea tenei! E pelā eiloa me ko inu ne au te toto o tāgata konei ne fakamalosi o asu mai te vai i mata o pelu.”​—1 Nofoaiga Tupu 11:​15-19.

¹³ Ne iloa ne Tavita me ne fai mai i te Tulafono i toto e ‵tau o ‵ligi atu ki a Ieova kae ke sē kai. Ne malamalama foki tou tagata i te pogai e ‵tau ei o fai te mea tenei. Ne iloa ne Tavita me i “te ola o mea ola katoa ko te toto.” Kae tigā te feitu tenā, a te mea tenei se vai, kae e sē se toto. Kaia ne ita ei a Tavita ma inu ki ei? Ne amanaia a ia ki te fakatakitakiga mai tua o te manakoga o te Tulafono. Ki a Tavita, e ‵pau eiloa te tāua o te vai mo toto o tāgata e tokotolu. Tela la, se mea sē ‵lei ke inu a ia ki vai. I lō te inu ki ei, ne fakaiku aka ne ia ke ‵ligi ki lalo i te laukele.​—Levitiko 17:11; Teutelonome 12:​23, 24.

14. Se a te mea ne fesoasoani atu ki a Tavita ke maua a te kilokiloga a Ieova?

¹⁴ Ne taumafai a Tavita ke fai katoatoa ne ia te Tulafono a te Atua i tena olaga. Ne usu mai a ia: “Toku Atua, e fiafia au o fai tou loto! E tausi ne au au akoakoga i toku loto.” (Salamo 40:8) Ne sukesuke a Tavita ki te Tulafono a te Atua kae mafaufau ‵loto ki ei. Ne talitonu a ia ki te poto e maua mai i fakatonuga a Ieova. Ne seki manako fua a Tavita o tautali i tulafono i loto i te Tulafono a Mose kae ne manako foki ki fakatakitakiga kolā e mafai o tauloto ne ia mai i ei. Kafai e suke‵suke tatou ki te Tusi Tapu, e ‵tau o mafaufau ‵loto tatou ki mea kolā e fai‵tau ne tatou. I te auala tenā e mafai ei ne tatou o fai a fakatakitakiga kolā e tauloto ne tatou mo fai se vaega o ‵tou olaga i aso takitasi kae fai a fakaikuga kolā e fakafiafia atu ki a Ieova.

15. I te auala fea ne fakatamala ei a Solomona o fakaasi atu te āva ki te Tulafono a te Atua?

¹⁵ Ne tuku atu ne Ieova ki te tama tagata a Tavita ko Solomona a fakamanuiaga e uke. Kae fakamuli ifo ne fakagata te fakalogo o Solomona ki te Tulafono a te Atua. Ne seki fakalogo tou tagata ki te fakatonuga a Ieova me e se ‵tau mo te tupu o Isalaelu “o tokouke ana avaga.” (Teutelonome 17:17) Ne avaga a Solomona ki fāfine fakaa‵tea e tokouke. I te taimi ko gasolo aka ei a ia o matua, ne fakamalosi atu ana avaga ki a ia ‘ke tautali i Atua fakaa‵tea.’ Faitalia me ne a fakamasakoga ne fakaaoga ne ia ke sē fakalogo ki te Tulafono a te Atua, “ne agasala a ia ki te Aliki [Ieova], ne seki fakamaoni foki a ia ki te Aliki [Ieova], e pelā mo tena tamana ko Tavita.” (1 Tupu 11:​1-6) Ko oko eiloa i te tāua ke faka‵logo tatou ki tulafono mo fakatakitakiga kolā e maua ne tatou mai te Muna a te Atua! Pelā me se fakaakoakoga, e tāua ‵ki a te mea tenei māfai ko mafaufau tatou o a‵vaga.

16. Ne a mea e mafai o tauloto ne tatou mai te tulafono a Ieova ke avaga fua “i te Aliki”?

¹⁶ Kafai e fiafai mai se tino sē talitonu ki a tatou, e mata, e fakaasi atu ne tatou se kilokiloga e ‵pau mo Tavita io me ‵pau mo Solomona? Ne fakatonu atu ki tino tapuaki ‵tonu ke a‵vaga fua “i te Aliki.” (1 Kolinito 7:39) Kafai e filifili se Kelisiano ke avaga a ia, e ‵tau mo ia o avaga ki se taina papatiso. Mai te tulafono tenei, ko mafai ei o malamalama tatou me e se manako a Ieova ke fai famau tatou mo tino sē tali‵tonu. Tela la, e se gata fua i te ita o tatou ma a‵vaga ki te tino sē talitonu kae ka sē talia foki ne tatou ke tumau a te fiafai mai o te tino sē talitonu ki a tatou.

17. Se a te mea e mafai o fesoasoani mai ke mo a e ‵lave tatou i te matāsele o te onoono ki ata ma‵sei?

¹⁷ Ke mafaufau foki me mafai pefea o fesoasoani mai ki a tatou a te fakaakoakoga a Tavita ke ‵teke atu tatou ki te onoono ki ata ma‵sei. Ne ‵sala faeloa a ia ki te takitakiga a te Atua. Ke faitau ki tusi fai‵tau kolā e ‵soko mai, mafaufau ki fakatakitakiga kolā e maua mai i ei, kae taumafai ke malamalama me se a te loto o Ieova e uiga ki te mea tenei. (Faitau te Salamo 119:37; Mataio 5:​28, 29; Kolose 3:5.) A te mafaufau ‵loto ki ana tulaga ma‵luga e fesoasoani mai ke tumau tatou i te saoloto mai te matāsele o te onoono ki ata ma‵sei.

KE MASAUA FAELOA TE KILOKILOGA A TE ATUA I TAIMI KATOA

18, 19. (a) E ui eiloa e se ‵lei katoatoa a Tavita, ne mafai pefea o tumau a ia i te taliaga a te Atua? (e) Se a te mea e fakaiku aka ne koe ke fai?

¹⁸ E ui eiloa ne fai a Tavita mo fakaakoakoga ‵lei i mea e uke, ne fai ne ia ne nai agasala matagā. (2 Samuelu 11:​2-4, 14, 15, 22-27; 1 Nofoaiga Tupu 21:​1, 7) I tena olaga kātoa, ne salamō faeloa a Tavita māfai ne fai ne ia se agasala. Ne sasale a ia i mua o te Atua mo te “fakamaoni.” (1 Tupu 9:4) Kaia e mafai ei o fai atu tatou penā? Me ne taumafai eiloa a Tavita o fai a mea e ‵tusa mo te loto o Ieova.

¹⁹ Faitalia te sē ‵lei katoatoa o tatou, e mafai eiloa o tumau tatou i te taliaga a Ieova. Mai te masaua ne tatou a te mea tenā, ke suke‵suke faka‵lei tatou ki te Muna a te Atua, mafaufau ‵loto ki mea e tauloto ne tatou mai i ei, kae fakagalue fakavave a mea kolā ne tauloto ne tatou. Kafai e fai ne tatou a te mea tenei, ka ‵pau tatou mo te faisalamo telā ne fakamolemole atu mo te loto maulalo ki a Ieova i te ‵talo: “Akoako mai au ke fai ne au tou loto.”

[Ata i te itulau e 10]

Se a te mea ne fai ei ke sē tamate ne Tavita a Saulo i te mauaga ne ia se avanoaga ke fai penā?

[Ata i te itulau e 11]

Se a te mea e tauloto ne tatou mai te ita o Tavita ma inu ki vai kolā ne aumai ne ana tāgata ki a ia?