Ko Tanielu i Loto i te Lua o Leona

OI AUE! E foliga mai me ko fepaki Tanielu mo se fakalavelave lasi. Kae e se fakapa‵kia atu a leona ki a ia! E iloa ne koe me kaia? Ko oi ne tuku atu ne ia a Tanielu ki konei fakatasi mo leona e uke i ei? Ke onoono aka tatou.

A te tupu o Papelonia i te taimi tenā ko te tagata e igoa ki a Taliu. Ne fiafia malosi tou tagata ki a Tanielu ona ko Tanielu se tagata alofa kae poto. Ne filifili ne Taliu a Tanielu ke fai mo pule maluga i tena malo. Ne fai ne te mea tenei a nisi tāgata i te malo ke loto ma‵sei ki a Tanielu, telā ne fai ei ne latou a te mea tenei.

Ne olo atu latou ki a Taliu kae ne fai atu: ‘Ko oti ne lotoma‵lie matou, e te Tupu, me e ‵tau o fai ne koe se tulafono mō aso e 30, e se ‵tau o isi se tino e tapuaki atu ki se isi atua io me se tino kae na ko koe, e te Tupu. Kafai e se fakalogo se tino, e ‵tau o ‵pei a ia ki loto i te koga e ‵nofo ei a leona.’ Ne seki iloa ne Taliu a te pogai ne ma‵nako ei a tāgata konei o fai a te tulafono tenei. Kae ne mafaufau a ia me se manatu ‵lei, telā ne tusi ei ne ia ki lalo a te tulafono. I konā loa, ko se mafai o toe ‵fuli a te tulafono.

I te taimi ne iloa ei ne Tanielu a te tulafono tenei, ne fanatu a ia ki te fale, kae ne ‵talo, e pelā eiloa mo tena masani. Ne iloa ne tāgata ma‵sei me ka se mafai ne Tanielu o fakagata aka tena ‵talo atu ki a Ieova. Ne fia‵fia latou, me ne foliga mai me ka magoi te lotou aofaga ke ‵po aka a Tanielu.

I te taimi ne iloa ei ne Taliu a te pogai ne ma‵nako ei a tāgata konei o fai a te tulafono tenei, ne fanoanoa malosi a ia. Kae ko se mafai o ‵fuli ne ia a te tulafono, telā ne ‵tau ei mo ia o fai a te fakatonuga mō Tanielu ke ‵pei ki loto i te lua o leona. Kae ne fai atu a te tupu ki a Tanielu: ‘Au e fakamoemoe me i tou Atua, telā e tavini koe ki ei, ka fakasao ne ia koe.’

Ne fanoanoa ‵ki a Taliu telā ne seki mafai ei o moe a ia i te po tenā. I te taeaoakaga ne tele atu a ia ki te lua o leona. E mafai o lavea ne koe a ia i konei. Ne kalaga atu a ia: ‘Tanielu, te tavini a te Atua ola! E mata, ne mafai ne te Atua telā e tavini koe ki ei o fakasao koe mai leona?’

‘Ne uga mai ne te Atua tena agelu,’ ne tali atu a Tanielu, ‘kae ‵pono ne ia a gutu o leona ko te mea ke se fakapa‵kia mai latou ki a au.’

Ne fiafia malosi a te tupu. Ne fakatonu atu a ia ke aumai a Tanielu ki tua mo te lua. Telā ne fai ei ne ia a tāgata ma‵sei kolā ne taumafai o fakaseai a Tanielu ke ‵pei ki lalo i leona. A koi tuai foki eiloa o oko atu latou ki te takele o te lua, ne puke atu a leona ki a latou kae fati‵fati olotou ivi katoa.

Telā ne tusi atu ei a te tupu ko Taliu ki tino katoa i tena malo: ‘E fakatonu atu au me e ‵tau mo tino katoa o fakaaloalo ki te Atua o Tanielu. E fai ne ia a vavega fakaofoofogia. Ne seki kai ne leona a Tanielu me ne fakasao ne te Atua a ia.’