Ko Papatiso Iesu ne Ioane

KILO atu ki te lupe telā e fanaifo ki te ulu o te tagata. A te tagata tenā ko Iesu. Ko 30 ana tausaga. Kae ko te tagata e ‵tu mai mo ia ko Ioane. Ko oti ne tau‵loto ne tatou a mea e uiga ki a ia. E masaua ne koe te taimi ne āsi atu ei a Malia ki tena kāiga ko Elisapeta, kae ne tafukefuke a te pepe i loto i a Elisapeta ona ko te fiafia? A te pepe seki fanau tenā ko Ioane. Kae ne a mea e fai nei ne Ioane mo Iesu?

Ne fatoā oti ne ufi ne Ioane a Iesu ki lalo i te vai i te vaitafe ko te Iolitana. Tenei eiloa te auala e papatiso ei se tino. Muamua, e ufi a ia ki lalo i te vai, kae e toe avaka a ia ki luga. Ona ko te mea e fai sāle te mea tenei ne Ioane ki tino, ne fakaigoa ei a ia ki a Ioane te Papatiso. Kae kaia ne papatiso ei ne Ioane a Iesu?

Ia, ne fai penā ne Ioane me ne fanatu a Iesu o fakamolemole atu ke papatiso aka a ia. Ne papatiso ne Ioane a tino kolā ko ma‵nako o fakaasi atu me ko sala‵mō latou ki mea ma‵sei ne fai ne latou. Kae e mata, e isi se mea masei ne fai ne Iesu ne ‵tau ei o salamō a ia? Ikai, ne seki fai penā a Iesu, me i a ia ko te Tama eiloa a te Atua mai te lagi. Tela la, ne ‵kese ‵ki a te pogai ne fakamolemole atu ei a ia ki a Ioane ke papatiso a ia. Ke onoono aka tatou me se a te pogai tenā.

A koi tuai o fanatu a Iesu ki a Ioane i konei, ne fai a ia mo fai se kamuta. A te kamuta se tino telā e faite ne ia a mea mai laupapa, e pelā mo taipola mo nofoga. A te avaga a Malia ko Iosefa se kamuta, kae ne fakaakoako ne ia a Iesu ke galue foki penā. Kae ne seki uga mai ne Ieova tena Tama ki te lalolagi ke fai mo fai se kamuta. Ne isi sena galuega fakapito ke fai ne ia, kae ne oko mai a te taimi mō Iesu ke kamata o fai ne ia te galuega tenā. Tela la, ke fakaasi atu me ko vau a ia ke kamata o fai te loto o tena Tamana, ne fakamolemole atu a Iesu ki a Ioane ke papatiso a ia. E mata, ne fiafia te Atua ki te mea tenei?

Ao, ne fiafia a ia, me i te taimi ne fanaka ei Iesu mai te vai, ne faipati mai ei se leo mai te lagi penei: ‘Tenei eiloa taku Tama, telā e fiafia au ki ei.’ Ne foliga mai foki me ne matala mai a te lagi kae ne fanaifo a te lupe tenei ki luga i a Iesu. Kae e se se lupe tonu. E foliga fua penā. Ko te agaga tapu eiloa tenā o te Atua.

I te otiga ne papatiso a ia, e uke ‵ki a mea ne ‵tau o mafaufau a Iesu ki ei. Tela la ne fanatu a ia ki se koga lavaki mō aso e 40. I konā ne fanatu ei a Satani ki a ia. E fakatolu taimi ne taumafai ei a Satani o fai a Iesu ke fai ne ia se mea telā e ‵teke atu ki tulafono a te Atua. Kae ne seki fai eiloa ne Iesu.

Mai tua ifo i konā, ne foki atu a Iesu kae ne fetaui mo nisi tāgata kolā ko tino muamua ne fai mo fai ne ana taugasoa, io me ne ana soko. Nisi igoa o latou ko Anitelea, Petelu (e fakaigoa foki ki a Simona), Filipo mo Natanielu (e fakaigoa foki ki a Patolomaio). Ne olo atu a Iesu mo ana soko fou konei ki Kalilaia. I Kalilaia ne ‵nofo atu latou i te fa‵kai o Natanielu ko Kana. I konā ne fanatu ei a Iesu ki se ‵kaiga lasi mō se fakaipoipoga, kae ne fai ne ia i ei tena vavega muamua. E iloa ne koe me se a te mea tenā? Ne ‵fuli ne ia a vai ke liu uaina.