Mataupu e 12

Te Papatisoga o Iesu

KĀTI i te ono masina mai tua ifo o te kamataga o te galuega talai a Ioane, ne fanatu ei a Iesu ki a ia i te Iolitana, kae ko 30 ana tausaga. Se a te pogai? Ke āsi atu fua ki a ia? Ne fia iloa fua ne Iesu me e pefea te galuega a Ioane? Ikai, ne fakamolemole atu a Iesu ki a Ioane ke papatiso a ia.

Ne ‵teke fakavave atu a Ioane penei: “E ‵tau au o papatiso ne koe, kae nei ko vau koe ki a au?” Ne iloa ne Ioane me i tena fakataina ko Iesu ko te Tama fakapito a te Atua. Me ne gasuesue a Ioane mo te fiafia i te tinae o tena mātua i te taimi ne āsi atu ei a Malia telā ko faitama a koi tuai o fanau mai a Iesu! Kāti e se taumate ne taku atu fakamuli ne te mātua o Ioane ko Elisapeta a te mea tenā ki a ia. Kae ne taku atu foki ne ia ki a ia a te tala ki te faka‵pulaga a te agelu e uiga ki te fanaumaiga o Iesu mo te ‵saeakaga o agelu ki tausi mamoe i te po ne fanau mai ei a Iesu.

Tela la, ne masani ‵lei a Ioane mo Iesu. Kae ne iloa ‵lei ne Ioane me i tena papatisoga e se se papatisoga mō Iesu. Se mea mō latou kolā ko sala‵mo ki olotou agasala kae e seai ne agasala a Iesu. Kae e tiga eiloa te sē fiafia o Ioane, ne fakatonu atu a Iesu penei: “Ke fai aka mua penei i te taimi nei. Me tenei te faiga ka fai ei ne taua a mea katoa kolā e manako ki ei te Atua.”

Kaia e ‵lei ei ke papatiso a Iesu? Me i te papatisoga o Iesu e seki fakauiga ki te salamo ki agasala, kae ne tu atu a ia ke fakaasi atu me e toka a ia ke fai te loto o tena Tamana. Ne galue a Iesu pelā me se kamuta, kae i te taimi tenā ne fanatu ei a ia ke kamata tena galuega telā ne uga mai ei a ia ne Ieova te Atua ki te lalolagi nei ke fai ne ia. Se a tau faka‵tau, ne fakamoemoe a Ioane ke tupu se mea fakaofoofogia i te taimi ne papatiso ei ne ia a Iesu?

Ia ko ‵lei, ne lipoti fakamuli mai a Ioane penei: “Ka ko ia telā ne uga mai ne ia au o papatiso sāle ki te vai ne fai mai, ‘Ko te tino telā e lavea ne koe e fanaifo ki ei te agaga, kae nofo foki i luga i a ia; ko ia la tenā ka papatiso ne ia a tino ki te agaga tapu.’” Tela la, ne fakamoemoe a Ioane ke fanaifo te agaga o te Atua ki luga i se tino telā ka papatiso ne ia. Kāti se taumate, ne seki ofo malosi a ia i te taimi ne fanaka ei a Iesu mai i te vai, kae ne matea atu ne Ioane me ‘ko fanaifo te agaga tapu e pelā me se lupe mai i te lagi kae ne nofo i luga i a ia.’

Kae e isi aka foki a nisi mea ne ‵tupu i te papatisoga o Iesu. ‘Kae ne matala mai te lagi’ ki a ia. Se a te uiga o te mea tenā? Kāti e fakauiga pelā me i te taimi ne papatiso ei a ia, ne toe masaua ne ia a tena olaga mua i te lagi. Tela la, i konā loa ne ­masaua ei ne ia a tena olaga e pelā me se Tama faka-te-agaga a Ieova te Atua, e aofia i ei a mea katoa kolā ne fai atu ne te Atua ki a ia i te lagi a koi tuai o liutino a ia.

E se gata fua i konā, kae i te taimi o tena papatisoga, ne folafola mai penei se leo mai te lagi: “Tenei eiloa taku Tama fagasele telā e talia ne au.” I oi te leo tenā? Ko te leo o Iesu? Ikai! Ko te leo eiloa o te Atua. E fakaasi manino mai i ei me i a Iesu ko te Tama a te Atua kae e se ko te Atua e pelā mo pati a nisi tino.

Kae ne fai a Iesu mo fai te Tama faka-te-foitino a te Atua, e pelā eiloa mo te tagata muamua ko Atamu. Ne tusi mai penei te soko ko Luka, i te taimi ko oti ne fakamatala atu ei ne ia te papatisoga o Iesu: “Ne kamata te galuega a Iesu, kāti ko tolusefulu ana tausaga, ne ma‵natu a tino me ko ia ko te tama a Iosefa, te tama a Heli, . . . te tama a Tavita, . . . te tama a Apelaamo, . . . te tama a Noa, . . . te tama a Atamu, te tama a te Atua.”

E pelā eiloa mo Atamu ne fai mo fai se tama faka-te-foitino “a te Atua,” ne penā foki loa a Iesu. A Iesu ko te ‵toe tagata sili mai i tāgata katoa ne ola, kae e manino eiloa te manatu tenā māfai e suke‵suke ­tatou ki te olaga o Iesu. Kae i tena papatisoga, ne ulu atu ei a Iesu ki se fesokotakiga fou mo te Atua, me ne fai foki a ia mo fai se Tama faka-te-agaga a te Atua. I konā loa ne toe kalaga atu ei te Atua ki a ia ke foki atu ki te lagi mai i tena sasale atu i te auala telā ka ‵taki atu i ei ki te tukuatuga o tena ola faka-te-foitino ki te se-gata-mai mo fai te taulaga mō tino kolā e ‵tau o fakasala. Mataio 3:13-17; Luka 3:21-38; 1:34-36, 44; 2:10-14; Ioane 1:32-34; Epelu 10:5-9.

▪ Kaia ne masani ei a Iesu mo Ioane?

▪ Me e seai ne ana agasala, kaia ne ­papatiso ei a Iesu?

▪ Ona ko mea kolā ne iloa ne Ioane e uiga ki a Iesu, kaia kāti seki ofo ei a ia i te taimi ne fanaifo ei te agaga o te Atua ki luga i a Iesu?