Ko Faka‵ma ne Iesu te Faletapu

KO OKO eiloa i te mata kaitaua o Iesu i konei, i ne? E iloa ne koe me kaia ko kaitaua malosi ei tou tagata? Ona ko tāgata konei i te faletapu o te Atua i Ielusalema ko se faka‵tau eiloa i te kaima‵nako. E taumafai latou ke maua a tupe e uke mai tino kolā e o‵mai ki konei ke tapuaki atu ki te Atua.

E mata, e lavea ne koe a tamā pulumakau mo mamoe mo lupe katoa konā? Ia, e ‵togi atu ne tāgata a manu konei i loto i te faletapu. E iloa ne koe me kaia? Ona ko te mea e ‵tau o maua ne te kau Isalaelu a manu vaefa mo manu eva ke fai a taulaga ki te Atua.

Ne fai mai a te tulafono a te Atua me kafai ne fai ne se tino Isalaelu se mea ‵se, e ‵tau o fai ne ia se taulaga ki te Atua. Kae e isi aka foki ne nisi taimi, e ‵tau ei o fai ne te kau Isalaelu a taulaga. Kae tefea te koga e mafai ei o maua ne se tino Isalaelu a manu eva mo manu vaefa ke ofo atu ki te Atua?

Ko oti ne maua ne nisi tino Isalaelu olotou manu eva mo manu vaefa. Tela la, ne mafai ne latou o ofo atu a mea konā. Kae e tokouke a tino Isalaelu e seai ne olotou manu vaefa io me ne manu eva. Kae ko nisi tino e ‵nofo ‵mao atu mai Ielusalema telā ko se mafai ei ne latou o aumai se manu ki te faletapu. Ona ko te mea tenei ne o‵mai ei a tino ki konei kae ne ‵togi ne latou a manu vaefa io me ne manu eva kolā e ‵tau o maua ne tino konā. Kae ne faka‵lasi aka a ‵togi o manu ne tāgata konei. Ne fakaloi‵loi ne latou a tino. E se gata i ei, e se ‵tau mo latou o ‵togi atu a manu konā i loto eiloa i te faletapu o te Atua.

Tenā te pogai ne kaitaua ei a Iesu. Tela la, ne ‵fuli ne ia ki lalo a taipola a tāgata ‵fuli tupe kae ne laku atu keatea olotou tupe siliva. Ne fai foki ne ia se ‵kini mai lōpu kae ne afuli ki tua a manu katoa mai te faletapu. Ne fakatonu atu a ia ki tāgata kolā e ‵togi atu a lupe: ‘Ave ki tua a mea konā mai konei! Sa fai te fale o toku Tamana mo fai se koga fai pisinisi.’

Ne ‵nofo atu a nisi soko o Iesu fakatasi mo ia i konei i te faletapu i Ielusalema. Ne ofo latou i mea ne lavea ne latou e fai ne Iesu. I konā eiloa, ne masaua ne latou a te tusi siki i te Tusi Tapu telā e fai mai e uiga ki te Tama a te Atua: ‘A te alofa ki te fale o te Atua ka ‵ka i loto i a ia e pelā me se afi.’

A koi nofo a Iesu i Ielusalema kae kau atu ki te Paseka, ne fai ne ia a vavega e uke. Mai tua ifo i konā, ne tiakina ne Iesu a Iutaia kae ne kamata tena malaga o toe foki atu ki Kalilaia. Kae i tena auala, ne fanatu a ia i te kogā koga ko Samalia. Ke onoono aka tatou me se a te mea ne tupu i konā.