Ko Vau Iesu e Pelā mo te Tupu

I SE taimi toetoe mai tua ifo o te faka‵leiga o tino tokolua kolā ne ‵kivi kae akai mea, ne oko atu a Iesu ki se tamā fa‵kai telā e pili atu ki Ielusalema. Ne fai atu a ia ki ana soko e tokolua: ‘Olo atu ki loto i te fa‵kai kae ka maua ne koulua i ei se asini foliki. ‵Tala kae aumai ki a au.’

I te taimi ne avatu ei te asini ki a ia, ne sagasaga a Iesu i luga i ei. Ne tele atu a ia ki Ielusalema telā e tu pili mai fua ki te koga tenā. I te taimi ko pili atu ei a ia ki te fa‵kai, ne o‵mai se vaitino tokouke o fakafetaui atu ki a ia. A te tokoukega o latou ne tapale olotou peleue kae fola i te auala. Nisi tino ne ‵kati ne latou a kaula mai te lakau ko te pama. Ne fola foki ne latou a mea konei i te auala, kae ne ka‵laga atu latou penei: ‘Ke fakamanuia ne te Atua a te tupu telā e vau i te igoa o Ieova!’

I aso taumua i Isalaelu ne ‵tele atu a tupu ‵fou i luga i se asini foliki ke fakaasi atu ei latou ki tino. Tenei eiloa a te mea ne fai ne Iesu. Kae ne fakaasi atu ne tino konei me e ma‵nako latou ke fai a Iesu mo fai te lotou tupu. Kae e se ko tino katoa ne ma‵nako ki a ia. E mafai o lavea ne tatou a te mea tenei mai mea kolā ne ‵tupu i te taimi ne fanatu ei a Iesu ki te faletapu.

I te faletapu ne faka‵lei ne Iesu a tino kolā ne ‵kivi kae ‵pili. I te taimi ne lavea ei ne tamā tama‵liki a te mea tenei, ne ka‵laga atu latou o tavae a Iesu. Kae ne kaitaūa i ei a faitaulaga, kae ne fai atu latou ki a Iesu: ‘E lagona ne koe a pati kolā e fai mai ne tama‵liki?’

‘Ao, e lagona ne au,’ ne tali atu a Iesu. ‘E seki fai‵tau eiloa koutou ki te Tusi Tapu telā e fai mai penei: “Mai gutu o tamā tama‵liki ka aumai ei ne te Atua a tavaega?”’ Tela la, ne tumau eiloa a tama‵liki i te tavae atu ki te tupu a te Atua.

E ma‵nako tatou ke fai pelā mo tama‵liki konā, i ne? Kāti e taumafai a nisi tino ke taofi tatou mai te fai‵pati atu e uiga ki te Malo o te Atua. Kae ka tumau eiloa tatou i te fai atu ki nisi tino e uiga ki mea fakaofoofogia kolā ka fai ne Iesu mō tino.

I te taimi ne nofo ei a Iesu i te lalolagi, ne seki oko ki te taimi tonu ke kamata ei a ia o pule mai e pelā me ko te tupu. Ka oko mai māfea a te taimi tenā? Ne ma‵nako a soko o Iesu ke iloa ne latou. Ka fai‵tau tatou e uiga ki te mea tenei i te suā mataupu.