Ne Faipati se Asini

KAI lagona aka eiloa ne koe se asini telā ne faipati? ‘Ikai,’ kāti ka fai mai koe. ‘E se fai‵pati a manu.’ Kae e fai mai a te Tusi Tapu e uiga ki se asini telā ne faipati. Ke onoono aka tatou me ne tupu pefea a te mea tenei.

Ko pili aka eiloa o toka a te kau Isalaelu ke olo atu ki te fenua o Kanana. A Palako, te tupu o Moapi, ne mataku i te kau Isalaelu. Telā ne avatu ei tena fekau ki se tagata poto e igoa ki a Palaamo ke vau o fetū a te kau Isalaelu. Ne tauto atu a Palako me ka tuku atu ne ia ki a Palaamo a tupe e uke, telā ne sopo ei a Palaamo ki tena asini kae ne fanatu i tena auala ki a Palako.

Ne seki manako a Ieova ke fetū ne Palaamo Ana tino. Telā ne uga atu ei ne ia se agelu fakatasi mo se pelu loa ke tu i te auala o taofi a Palaamo. Ne seki mafai o lavea ne Palaamo a te agelu, kae ne lavea ne tena asini. Telā ne taumafai ei a te asini o ‵fuli kea‵tea mai te agelu, kae fakamuli loa ne takato ki lalo i te auala. Ne kaitaua malosi a Palaamo, kae ne kini ne ia tena asini ki se lakau.

Telā ne fai ei ne Ieova ke lagona ne Palaamo tena asini e faipati ki a ia. ‘Ne a aku mea ne fai atu ki a koe ko ‵tau ei o kini ne koe au?’ ne fesili atu a te asini.

‘Ko oti ne fai ne koe au pelā me se tino valea,’ ko muna a Palaamo. ‘Moi isi saku pelu penei ko oti ne tamate ne au a koe!’

‘E fai sāle eiloa au penei ki a koe?’ ne fesili atu a te asini.

‘Ikai,’ ne tali atu a Palaamo.

Telā ne fai ei ne Ieova ke lavea ne Palaamo a te agelu mo te pelu e tu i te auala. Ne fai atu a te agelu: ‘Kaia ne kini ei ne koe tau asini? Au ne vau o ‵pono tou auala, me e se ‵tau mo koe o fano o fetū a te kau Isalaelu. Moi ne seki ‵fuli kea‵tea a te asini mai i a au, ka ‵suki ne au a koe ke mate, kae ka se fakapakia ne au tau asini.’

Ne fai atu a Palaamo: ‘Au ko agasala. Ne seki iloa ne au me ne tu koe i te auala.’ Ne tuku atu ne te agelu a Palaamo ke fano, kae ne fano eiloa a Palaamo ki a Palako. Ne tumau eiloa tena taumafai o fetū a te kau Isalaelu, kae i lō te fai penā, ne fai ne Ieova ke fakamanuia fakatolu ne ia te kau Isalaelu.