Ko Tamate a Iesu

KILO atu ki te mea matagā tenā ko tupu! Ko tamate a Iesu. Ko oti ne tuku atu ne latou a ia ki luga i te pou. Ko ‵tuki atu a fao ki ana lima mo ana vae. Kaia e manako ei so se tino ke fai ne ia a te mea tenei ki a Iesu?

A te pogai ko te takalia‵lia o nisi tino ki a Iesu. E iloa ne koe me ko oi latou? E tokotasi mai i a latou ko te agelu masei ko Satani te Tiapolo. A ia ko te tino telā ne fai ne ia a Atamu mo Eva ke se faka‵logo ki a Ieova. Kae ko Satani ko te tino telā ne fai ne ia a fili o Iesu ke fai ne latou a te amioga solitulafono kae matagā tenei.

Ke oko foki ki te taimi mai mua o te ‵tukiga o Iesu ki luga i te pou, ne fai ne ana fili a faifaiga ma‵sei ki a ia. Masaua a te auala ne olo atu ei latou ki te fatoaga o Ketesemane kae ave keatea ne latou a ia? Ko oi a fili konā? E tonu, a latou ko takitaki lotu. Ia, ke onoono aka tatou me se a te mea ne tupu mai tua ifo i ei.

I te taimi ne puke ei a Iesu ne takitaki lotu, ne ‵tele kea‵tea ana apositolo. Ne tiaki ne latou a Iesu ke nofo tokotasi mo ana fili, me ne ma‵taku latou. Kae ne seki olo ‵mao atu a te avā apositolo ko Petelu mo Ioane. Ne tau‵tali atu laua ke onoono aka me se a te mea ka tupu ki a Iesu.

Ne ave ne faitaulaga a Iesu ki te tagata matua ko Anasa, telā ne fai muamua mo fai te faitaulaga sili. Ne seki ‵nofo leva atu i konā a te vaitino. A te suā koga ne ave ne latou a Iesu ki ei ko te fale o Kaiafa, telā ne fai mo fai a te faitaulaga sili i te taimi tenā. E tokouke a takitaki lotu ko oti ne maopoopo i tena fale.

I konei i te fale o Kaiafa ne fai ei ne latou se fono fakamasino. Ne aumai a tino ki loto ke fai atu a pati ‵loi e uiga ki a Iesu. Ne fai atu a takitaki lotu katoa: ‘E ‵tau o tamate a Iesu.’ Telā ne puaki atu ei latou ki ana mata, kae ne fusu ne latou a ia.

A koi ‵tupu a mea katoa konā, ne nofo a Petelu i te titi o te fale. Se po ‵moko, kae ne fa‵ka i ei ne tino se afi. A koi fakavelavela latou i tafa o te afi, ne kilo atu se tavini fafine ki a Petelu, kae fai atu: ‘Ne nofo foki a te tagata tenei mo Iesu.’

‘Ikai, au seki nofo mo ia!’ ne tali atu a Petelu.

E fakatolu taimi ne fai atu ei a tino ki a Petelu me ne ‵nofo fakatasi laua mo Iesu. I taimi takitasi ne fai atu ei a Petelu me e se tonu. I te tolu o taimi ne fai atu ei ne Petelu a te mea tenei, ne ‵fuli mai a Iesu kae ne kilo atu ki a ia. Ne fanoanoa malosi a Petelu i te takuatuga o pati ‵loi konā, telā ne fano kea‵tea ei a ia o tagi.

I te kamataga o fanaka a te la i te taeao o te Aso Lima, ne ave ne faitaulaga a Iesu ki te lotou koga fono, ko te maneapa o te kau Sanetulini. I konā ne fai‵pati ei latou ki te mea ka fai ne latou ki a ia. Ne ave ne latou a ia ki a Ponotio Pilato, te pule o te fenua kātoa o Iutaia.

‘A te tagata tenei se tagata masei,’ ne fai atu a faitaulaga ki a Pilato. ‘E ‵tau o tamate a ia.’ Mai tua o te faiga o fesili ki a Iesu, ne fai atu ei a Pilato: ‘I taku fakatau, seki fai ne ia se mea ‵se.’ Telā ne uga ei ne Pilato a Iesu ki a Helota Anitipa. A Helota ko te pule o Kalilaia, kae ne nofo atu a ia i te taimi tenā i Ielusalema. Ne seki maua aka foki ne Helota me ne fai ne Iesu se mea ‵se, telā ne toe uga atu ne ia a ia ki a Pilato.

Ne manako Pilato o fakasaoloto a Iesu. Kae ne ma‵nako a fili o Iesu ke fakasaoloto a te suā pagota i lō Iesu. A te tagata tenei se tino ‵faomea ko Palapa. Ko tai tutonu i te taimi ne aumai ei ne Pilato a Iesu ki tua. Ne fai atu a ia ki tino: ‘Kiloke! Te otou tupu!’ Kae ne ka‵laga atu a faitaulaga pule: ‘Ave kea‵tea a ia! Tamate a ia! Tamate a ia!’ Telā ne fakasaoloto ei ne Pilato a Palapa, kae ne ave ne latou a Iesu kea‵tea o tamate.

Mai tua malie ifo o te fakatutonu i te Aso Lima, ne ‵tuki ei a Iesu ki luga i pou. E se mafai o matea ne koe latou i te ata, kae i feitu takitasi o Iesu ne tamate foki a tino solitulafono i luga i pou. Mai mua malie atu i te matega o Iesu, ne fai atu ei se tino solitulafono e tokotasi ki a ia: ‘Masaua mai au māfai e oko atu koe ki tou Malo.’ Kae ne tali atu a Iesu: ‘Au e tauto atu ki a koe me ka fakatasi taua i te Palataiso.’

Se tautoga gali tenā, i ne? E iloa ne koe me se a te palataiso ne faipati a Iesu ki ei? Ne tu i fea a te palataiso telā ne faite ne te Atua i te kamataga? E tonu, i te lalolagi. Kae kafai ko pule mai a Iesu pelā me se tupu i te lagi, ka toe fakafoki mai ne ia a te tagata tenei ki te ola ke fiafia ki te Palataiso fou i te lalolagi. E fia‵fia tatou e uiga ki te mea tenā, i ne?