Ko Foki Atu a Iesu ki te Lagi

I TE ‵tekaatuga o aso, ne fakasae atu a Iesu ki ana soko i taimi e uke. I te taimi e tasi ne lavea a ia ne ana soko kāti e toko 500. I taimi kolā ne fakasae atu ei a ia ki a latou, e iloa ne koe me se a te mea ne faipati atu ne Iesu ki a latou? Ko te Malo o te Atua. Ne uga mai ne te Atua a Iesu ki te lalolagi ke akoako atu a mea e uiga ki te Malo. Kae ne tumau eiloa a ia i te faiga o te mea tenei ke oko foki eiloa ki te taimi mai tua ifo o tena fakatuakaga mai te mate.

E masaua ne koe me se a te Malo o te Atua? E tonu, a te Malo se pulega tonu a te Atua i te lagi, kae ko Iesu ko te Tino telā ne filifili ne te Atua ke fai mo tupu. E pelā mo mea ko oti ne tau‵loto ne tatou, ne fakaasi mai ne Iesu me ka fai a ia mo fai se tupu gali ‵ki mai te fagaiga o tino fia‵kai, te faka‵leiga o tino ma‵saki, kae ke oko foki eiloa ki te faka‵tuga o tino ‵mate ki te ola!

Tela la, kafai ko pule mai a Iesu pelā me se tupu i te lagi mō tausaga e afe, ka fai pefea te olaga i te lalolagi? E tonu, ka fuli te lalolagi kātoa ke fai mo fai se palataiso gali. Ka se toe ai ne taua, io me ne amioga solitulafono, io me ne masaki, ke oko foki eiloa ki te mate. E iloa ne tatou me e tonu a te mea tenei ona ko te mea ne faite ne te Atua a te lalolagi ke fai pelā me se palataiso ke fia‵fia a tino ki ei. Tenā eiloa te pogai ne faite ei ne ia a te fatoaga ko Etena i te kamataga. Kae ka fakamautinoa aka ne Iesu me i te mea telā e manako te Atua ke fai, ka fakataunu eiloa.

Ne oko atu ki te taimi ne ‵tau ei o foki atu a Iesu ki te lagi. Ne fakaasi atu ne Iesu a ia eiloa ki ana soko i aso e 40. Tela la, ko mautinoa eiloa i a latou me ko toe ola mai a ia. Kae koi tuai o tiakina ne ia ana soko ne fai atu ei a ia ki a latou: ‘‵Nofo i Ielusalema ke oko ki te taimi e maua ei ne koutou a te agaga tapu.’ A te agaga tapu ko te malosi galue o te Atua, e pelā me se matagi e agi, telā ka fesoasoani atu ki ana soko ke fai ne latou a te loto o te Atua. I te otiga, ne fai atu a Iesu: ‘E ‵tau o talai atu ne koutou a mea e uiga ki a au ki toe koga ‵mao o te lalolagi.’

Mai tua ifo o te faiatuga ne Iesu o te mea tenei, ne tupu ei se mea fakaofoofogia. Ne kamata o fanaka a ia ki te lagi, e pelā mo te mea e mafai o lavea atu ne koe i konei. Telā ne ‵pono ei a ia ne se kaumana mai olotou mata, kae ne seki toe lavea ne soko a Iesu. Ne fanatu a Iesu ki te lagi, kae ne kamata o pule mai a ia ki ana soko i te lalolagi mai i te koga tenā.