Ko Fakasaoloto Mai i te Falepuipui

KILO atu ki te agelu i konei e taofi ne ia ke matala a te mataloa o te falepuipui. A tāgata kolā e fakasaoloto ne ia ko apositolo a Iesu. Ke onoono aka tatou ki te pogai ne ‵pei atu ei laua ki te falepuipui.

E toetoe fua te taimi talu mai te taimi ne ‵ligi atu ei a te agaga tapu ki soko o Iesu. Kae tenei a te mea ne tupu: Ne olo atu a Petelu mo Ioane ki te faletapu i Ielusalema i se afiafi e tasi. I konā, i tafa o te mataloa, e nofo mai i ei se tagata telā ne ‵pili ana vae i tena olaga kātoa. Ne sau sāle ne tino a ia ki konā i aso katoa ko te mea ke mafai ne ia o akai atu ki tupe mai tino kolā e olo atu ki loto i te faletapu. I te taimi ne lavea ei ne ia a Petelu mo Ioane, ne akai atu tou tagata ki a laua ke tuku atu se mea ki a ia. Ne a mea ne fai ne apositolo?

Ne ‵tu laua kae ‵kilo atu ki te tagata mativa. ‘E seai ne aku tupe,’ ne fai atu a Petelu, ‘kae ka tuku atu ne au ki a koe a mea kolā e maua ne au. I te igoa o Iesu, ke na tu ki luga kae sasale!’ Ne kapa atu Petelu ki te lima fakaatamai o te tagata, kae i konā foki eiloa ne tafuke a ia ki luga kae kamata o sasale. I te taimi ne lavea ei ne tino a te mea tenei, ne ofo kae fia‵fia malosi latou ona ko te vavega fakaofoofogia tenei.

‘E auala i te malosi o te Atua, telā ne fakatu aka ei a Iesu mai te mate, ne fai ei ne maua a te vavega tenei,’ ko muna a Petelu. A koi fai‵pati atu laua mo Ioane, ne oko mai a nisi takitaki lotu. Ko oko eiloa i te lotou kaitaūa me ne fai atu ne Petelu mo Ioane ki tino me ko oti ne fakatu aka a Iesu mai te mate. Telā, ne puke ne latou laua kae ‵pei atu ki loto i te falepuipui.

I te suā aso ne fai ne takitaki lotu se fono lasi. Ne aumai ki loto a Petelu mo Ioane, mo te tagata telā ne faka‵lei ne laua. Ne fesili atu a takitaki lotu: ‘I ōi te ‵mana ne fai ei ne koulua a te vavega tenei?’

Ne fai atu a Petelu ki a latou me ne fai eiloa e auala i te ‵mana o te Atua, telā ne fakatu aka ne ia a Iesu mai te mate. Ne seki iloa ne faitaulaga me se a te lotou mea ka fai, me e se mafai ne latou o taku faka‵se a te vavega fakaofoofogia telā ne tupu tonu eiloa. Tela la, ne fakatonu atu ne latou a apositolo ke se toe fai‵pati e uiga ki a Iesu, kae ne tuku atu laua ke olo.

I te ‵tekaatuga o aso ne tumau eiloa a apositolo i te talai atu e uiga ki a Iesu mo te faka‵leiga o tino ma‵saki. Ne salalau atu a tala e uiga ki vavega konei. Kae ke oko foki eiloa ki te vaitino mai fa‵kai i tafa o Ielusalema ne aumai olotou tino ma‵saki ke faka‵lei aka ne apositolo. Ne fai ne te mea tenei ke loto ma‵sei a takitaki lotu, telā ne puke ei ne latou a apositolo kae ‵pei atu ki te falepuipui. Kae ne seki ‵nofo leva atu laua i konā.

I te po ne ‵tala ei ne te agelu a te Atua a te mataloa o te falepuipui, e pelā mo te mea e mafai o lavea ne koe i konei. Ne fai atu a te agelu: ‘Olo kae tu i te faletapu, kae tumau eiloa i te fai‵pati atu ki tino.’ I te suā taeao, i te taimi ne uga atu ei ne takitaki lotu a tāgata ki te falepuipui ke puke mai a apositolo, ko ‵galo laua. Fakamuli ifo ne maua atu ne tāgata konā a laua e akoako atu i te faletapu kae ne aumai ei laua ki te maneapa o te kau Sanetulini.

‘Ne fakatonu malosi atu matou ki a koulua ke se toe akoako atu a mea e uiga ki a Iesu,’ ne fai atu a takitaki lotu. ‘Kae ko oti ne faka‵fonu ne koutou a Ielusalema ki otou akoakoga.’ Telā ne tali atu ei a apositolo: ‘E ‵tau mo matou o faka‵logo ki te Atua e pelā me ko te pule i lō te faka‵logo ki tāgata.’ Tela la, ne tumau eiloa laua i te akoako atu o te “tala ‵lei.” E fai laua mo fai se fakaakoakoga ‵lei mō tatou ke tau‵tali ki ei, i ne?