Ko Paulo i Loma

KILO atu ki seni i luga i a Paulo, kae onoono atu ki te sotia Loma telā e leoleo ne ia a ia. A Paulo se pagota i Loma. Ko faka‵tali a ia ke fakaiku aka ne te Kaisala o Loma a te mea ka fai ki a ia. A koi nofo fakapagota a ia, ne talia ke āsi atu a tino ki a ia.

Ko tolu aso mai tua ifo o te okoatuga a Paulo ki Loma ne ave tena fekau ki nisi takitaki Iutaia ke o‵mai o āsi atu ki a ia. A te ikuga, e tokouke a tino Iutaia i Loma ne o‵mai. Ne talai atu a Paulo ki a latou e uiga ki a Iesu mo te Malo o te Atua. Nisi tino o latou ne tali‵tonu kae ne fai mo fai ne Kelisiano, kae ne seki tali‵tonu a nisi tino.

Ne talai atu foki a Paulo ki sotia kese‵kese kolā ne tofi aka ke leoleo a ia. Mō tausaga e lua kolā ne nofo fakapagota ei a ia i konei, ne talai atu a Paulo ki tino katoa kolā e mafai ne ia o talai atu ki ei. Ona ko tena talaiatuga, ke oko eiloa ki te kāiga o Kaisala ne lagona ne latou a te tala ‵lei o te Malo, kae ne fai a nisi tino i a latou mo fai ne Kelisiano.

Kae ko oi a te tino asiasi tenei, telā e tusitusi i te taipola? E mafai o mate mai ne koe? Ao, ko Timoteo. Ko oti foki ne ‵pei atu a Timoteo ki te falepuipui ona ko te talaiatuga e uiga ki te Malo, kae ko toe saoloto a ia. Kae ne vau a ia ki konei ke fesoasoani atu ki a Paulo. E iloa ne koe me ne a mea e tusitusi ne Timoteo? Ke onoono aka tatou.

E mata, e masaua ne koe a fa‵kai ko Filipi mo Efeso i te Tala e 110? Ne fesoasoani atu a Paulo ke kamata a fakapotopotoga Kelisiano i fa‵kai konā. I te taimi ko falepuipuigina ei a ia, ne tusi atu ne Paulo a tusi ki Kelisiano konā. E maua a tusi konā i loto i te Tusi Tapu, kae e fakaigoa ki a Efeso mo Filipi. Ne fai atu ne Paulo i te taimi tenā ki a Timoteo a mea kolā e ‵tau o tusi atu ki taugasoa Kelisiano i Filipi.

Ne atafai tonu atu a tino i Filipi ki a Paulo. Ne avatu ne latou se meaalofa ki a ia i te taimi ne falepuipui ei a ia, kae tela la ne fakafetai atu a Paulo ki a latou e uiga mo te mea tenā. A Epafeloti ko te tagata telā ne aumai ne ia te meaalofa. Kae ne masaki malosi a ia kae toeitiiti ko mate. Oti aka ne toe ‵lei a ia kae ne toka ke foki atu ki tena fenua. Tela la, ne avatu ne ia a te tusi tenei mai i a Paulo mo Timoteo i tena fokiatuga ki Filipi.

A koi nofo atu a ia i te falepuipui, ne toe tusi atu ne Paulo a tusi e lua kolā e maua ne tatou i te Tusi Tapu. E tasi ko te tusi ki Kelisiano i te fa‵kai ko Kolose. E iloa ne koe me e fakaigoa ki te ā? Ko Kolose eiloa. A te suā tusi se tusi totino ki se taugasoa pili e igoa ki a Filemoni telā ne nofo atu foki i Kolose. A te tusi se tusi e uiga ki te tavini a Filemoni ko Onosemo.

Ne tele kea‵tea a Onosemo mai i a Filemoni kae ne fanatu ki Loma. Ne logo Onosemo i se tino me ne nofo fakapagota a Paulo i konā. Ne fanatu a ia o āsi ki ei, kae ne talai atu a Paulo ki a Onosemo. E seki leva kae ne fai foki a Onosemo mo fai se Kelisiano. Ne salamō a Onosemo i te taimi tenā me ne tele keatea a ia. Tela la, e iloa ne koe me ne a mea ne tusi atu ne Paulo i tena tusi tenei ki a Filemoni?

Ne fakamolemole atu a Paulo ki a Filemoni ke fakamagalo a Onosemo. ‘Ko toe uga atu ne au a ia ki a koe,’ ne tusi atu a Paulo. ‘Kae nei la ko se fai fua a ia mo fai sau tavini. Ko fai foki a ia mo fai se taina Kelisiano ‵lei.’ I te taimi ne foki atu ei a Onosemo ki Kolose, ne avatu ne ia a tusi konei e lua, e tasi ki tino i Kolose kae e tasi ki a Filemoni. E mafai o fakaataata ne tatou a te lasi o te fiafia o Filemoni i te taimi ne iloa aka ei ne ia me ko fai tena tavini mo fai se Kelisiano.

I te taimi ne tusi atu ei a Paulo ki tino i Filipi mo Filemoni, ne isi sena tala fakafiafia. ‘Ko uga atu ne au a Timoteo ki a koutou,’ ne fai atu a Paulo ki tino Filipi. ‘Kae ka āsi atu foki au ki a koutou i te taimi pili mai mua nei.’ Kae ne tusi atu a ia ki a Filemoni: ‘Fakatoka se koga mō oku nofo i konā.’

I te taimi ne fakasaoloto ei a Paulo, ne āsi atu a ia ki ana taina mo tuagane Kelisiano i koga e uke. Kae ne toe fai fakamuli a Paulo mo fai se pagota i Loma. I te taimi tenā ne iloa ei ne ia me ka tamate a ia. Tela la, ne tusi atu a ia ki a Timoteo kae fakamolemole atu ki ei ke fanatu fakavave ki a ia. ‘Ko oti ne fakamaoni au ki te Atua,’ ne tusi atu a Paulo, ‘kae ka taui mai ne te Atua au.’ I ne nāi tausaga mai tua ifo o te tamatega o Paulo, ne toe fakamaseigina a Ielusalema, kae ko te kau Loma telā ne fakamasei ne latou a Ielusalema i te taimi tenā.

Kae e uke atu a nisi mea i loto i te Tusi Tapu. Ne fakaaogā ne Ieova te Atua a te apositolo ko Ioane ke tusi ne ia a toe tusi i ei, e aofia i ei a te tusi ko te Fakaasiga. E fakaasi mai ne te tusi tenei i loto i te Tusi Tapu a mea e uiga ki aso mai mua. Ke na tau‵loto aka nei tatou ki mea kolā e faka‵tali mai i aso mai mua nei.