Te Auala e Mafai ei ne Tatou o Ola ki te Se-Gata-Mai

E LAVEA ne koe me ne a mea e fai‵tau ki ei a te tamaliki fafine mo ana taugasoa? Ao, ko te tusi eiloa tenei e faitau koe ki ei—Taku Tusi o Tala Mai te Tusi Tapu. Kae e faitau ne latou a te tala eiloa tenei telā e faitau foki koe ki ei—ko “Te Auala e Mafai ei ne Tatou o Ola ki te Se-Gata-Mai.”

E iloa ne koe me ne a mea e tau‵loto ne latou? Muamua, e ‵tau o tau‵loto ne tatou a mea e uiga ki a Ieova mo tena Tama ko Iesu ko te mea ke maua ne tatou te ola se-gata-mai. E fai mai penei a te Tusi Tapu: ‘Tenei te auala ke maua ei te ola se-gata-mai. Ke tau‵loto e uiga ki te Atua tonu e tokotasi, mo te Tama telā ne uga mai ne ia ki te lalolagi, ko Iesu Keliso.’

E mafai pefea o tau‵loto tatou e uiga ki a Ieova te Atua mo tena Tama ko Iesu? E tasi te auala ko te faitauga o te tusi ko Taku Tusi o Tala Mai te Tusi Tapu mai te kamataga ki te fakaotiga. E fai mai i ei a mea e uke e uiga ki a Ieova mo Iesu, i ne? Kae e fai mai foki i ei a mea e uke e uiga ki mea kolā ko oti ne fai ne laua mo mea kolā ka fai ne laua. Kae e ‵tau o uke atu ‵tou mea e fai i lō te faitau fua ki te tusi tenei.

E mata, e lavea ne koe a te suā tusi i te fola? A te tusi tenā ko te Tusi Tapu. Ke fakamolemole koe ki se tino ke faitau atu ki a koe a vaega mai te Tusi Tapu kolā e fakavae ki ei a tala i te tusi tenei. E tuku mai ne te Tusi Tapu a fakamatalaga katoa kolā e ‵tau o maua ne tatou ko te mea ke mafai ne tatou katoa o tavini atu ki a Ieova i te auala tonu kae ke maua te ola se-gata-mai. Tela la, e ‵tau o fai ne tatou a te sukesuke sāle ki te Tusi Tapu mo fai se mea masani telā e fai faeloa ne tatou.

Kae e se lava fua i te tauloto ki mea e uiga ki a Ieova te Atua mo Iesu Keliso. E mafai o maua ne tatou a iloaga e uke ‵ki e uiga ki a laua mo lā akoakoga, kae e se maua a te ola se-gata-mai. E iloa ne koe me ne a nisi mea e manakogina?

E ‵tau foki mo tatou o ola e ‵tusa mo mea kolā e tau‵loto ne tatou. E masaua ne koe a Iuta te Isikaliota? A ia se tino e tokotasi o te toko 12 kolā ne filifili ne Iesu ke fai mo ana apositolo. Ne uke ‵ki a mea ne iloa ne Iuta e uiga ki a Ieova mo Iesu. Kae se a te mea ne tupu ki a ia? Fakamuli ifo ne kamata o uiga kaiū a ia, kae ne fakalata ne ia a Iesu ki ana fili mō tupe siliva e 30. Tela la, ka se maua ne Iuta a te ola se-gata-mai.

E masaua ne koe a Keasi, te tagata telā ne tau‵loto tatou e uiga ki ei i te Tala e 69? Ne manako a ia ke maua nisi gatu mo tupe kolā e se i a ia. Tela la, ne pati loi a ia ko te mea ke maua ne ia a mea konā. Kae ne fakasala a ia ne Ieova. Kae ka fakasala foki ne ia tatou māfai e se faka‵logo tatou ki ana tulafono.

Kae e tokouke a tino ‵lei kolā ne tumau eiloa i te tavini atu mo te fakamaoni ki a Ieova. E ma‵nako tatou ke fai pelā mo latou, i ne? A Samuelu i tena folikiga ne fai mo fai se fakaakoakoga ‵lei ke tau‵tali ki ei. E masaua ne koe, e pelā mo te mea ne lavea ne tatou i te Tala e 55, ko fa io me ko lima fua ana tausaga i te taimi ne kamata ei a ia o tavini atu ki a Ieova i tena faleie tapu. Tela la, faitalia me e pefea tou foliki, e se fai pelā me ko tō foliki koe ke tavini atu ki a Ieova.

E tonu, a te tino telā e ma‵nako tatou katoa ke tau‵tali ki ei ko Iesu Keliso. I te taimi koi foliki ei a ia, e pelā mo te mea e fakaasi mai i te Tala e 87, ne nofo atu a ia i te faletapu o faipati atu ki nisi tino e uiga ki tena Tamana faka-te-lagi. Ke na tau‵tali atu tatou ki tena fakaakoakoga. Ke na fai atu ne tatou ki tino e tokouke kolā e mafai o maua ne tatou a mea e uiga ki te ‵tou Atua fakaofoofogia ko Ieova mo tena Tama, ko Iesu Keliso. Kafai e fai ne tatou a mea konei, ka mafai ei ne tatou o ola ki te se-gata-mai i te palataiso fou a te Atua i te lalolagi nei.