Mataupu 1

Fekau Mai te Lagi

E FAI pelā me i te Tusi Tapu kātoa se fekau mai te lagi, me ne tuku mai ne te ‵tou Tamana faka-te-lagi ke akoako ei tatou. Kae e isi se avā fekau fakapito kolā ne tuku mai ne te agelu telā “e tu atu i mua o te Atua,” kae ko tai kātoa nei te 2,000 tausaga ko teka. A tena igoa ko Kapilielu. Ke onoono aka tatou ki mea kolā ne ‵tupu i te taimi ne fai ei te avā āsiga tāua konā ki te lalolagi.

A te tausaga tenā ko te 3 T.L.M. Ne nofo te faitaulaga a Ieova ko Sakalia i atumauga o Iutaia, kae kāti e se ‵mao foki mai Ielusalema. Ko matua a ia, penā foki tena avaga, ko Elisapeta. Kae e seai ne lā tama‵liki. Ne galue a Sakalia e ‵tusa eiloa mo te fakasologa o galuega a faitaulaga i te Faletapu o te Atua i Ielusalema. Kae ne sae fakapoi mai a Kapilielu i te feitu faka­atamai o te fatafaitaulaga telā e ‵sunu ei a mea fakama‵nogi.

Ko oko eiloa i te mataku o Sakalia. Kae ne fai atu a Kapili­elu ki a ia ke sa manavase, ana muna: “Sa mataku e Sakalia. Ko oti ne lagona ne te Atua tau tinoga, ka ko tau avaga ko Elisa­peta ka fanau ne ia se tamaliki tagata ma koe, ke fakaigoa ne koe ki a Ioane.” Ne toe fai atu a Kapilielu me i a Ioane “e tāua i mua o Ieova” kae “ka fakafoki mai ne ia te tokoukega o tino Isalaelu ki a Ieova.”

Kae e se mafai o talitonu a Sakalia ki ei. E foliga mai me e se mafai lele eiloa ne laua mo Elisapeta o fai se lā tamaliki ona ko te mea ko tō ma‵tua laua. Tela la, ne fai atu Kapilielu penei: “Kiloke, ona ko tou sē talitonu, a koe ka gūgū; ka se toe faipati eiloa koe ke oko ki te aso e fakataunu ei te ‵tonuga o taku feagaiga ki a koe.”

A koi fai te mea tenā, ako tino kolā ne ‵tu i tua ne kamata o fesili ifo me kaia e nofo leva ei a Sakalia i te faletapu. I te taimi ne sae mai ei a ia ki tua, e se mafai ne ia o faipati kae e mafai fua ne ia o fai a tāga ki ana lima, kae ko iloa ei ne latou me ne tupu se mea fakaofoofogia.

I te taimi ne oti ei a galuega a Sakalia i te faletapu, ne toe foki atu a ia ki tena fale. Mai tua malie ifo i ei ne seki leva kae ne taunu tonu mai te mea tenā​—ko faitama a Elisapeta! Kae koi faka‵tali a ia ke fanau mai tena tama, ne nofo Elisapeta i tena fale kae ne seki fakasae aka eiloa ki tino i masina e lima.

Fakamuli ifo ne toe sae mai foki a Kapilielu. Kae ne faipati atu a ia ki a ai? Ki se tamāfine taka ko Malia mai te fa‵kai ko Nasaleta. Se a te fekau telā ne avatu ne ia i te taimi tenā? Fakalogo mai! Ne fai atu penei a Kapilielu ki a Malia: “A te Atua ko oti ne fakamanuia atu ki a koe. Kiloke, a koe ka faitama, ka fanau ne koe se tama tagata, kae ka fakaigoa ne koe a ia, ko Iesu.” Ne toe fai atu penei a Kapilielu: “E sili a ia, kae ka fakaigoa foki ko te Tama a te Atua Tafasili i te Maluga. . . . Ka fai a ia mo tupu tumau i te fanauga a Iakopo, ko tena malo foki e seai se gatamaiga.”

E mafai o tali‵tonu tatou me ne manatu aka a Kapilielu i a ia e taulia ke tuku atu a fekau konā. Kae kafai e fai‵tau tatou ki nisi mea e uiga ki a Ioane mo Iesu, ka maina tatou i ei me kaia e tāua ei a fekau konā mai te lagi. 2 Timoteo 3:16; Luka 1:5-33.

▪ Ne a fekau tāua e lua kolā ne aumai mai te lagi?

▪ Ko oi ne aumai ne ia a fekau konā, kae ne avatu ki a ai?

▪ Kaia ne faigata ei ke tali‵tonu ki fekau konā?