Mataupu e 2

Ne Fakaaloalo ki a Ia a Koi Tuai o Fanau Mai

KO OTI ne fai atu te agelu ko Kapilielu ki te tamāfine ko Malia me ka fanau mai ne ia se tamaliki tagata telā ka fai mo fai te tupu tumau, kae ne fesili atu penei a Malia: “Au se tamāfine fua seki avaga, kae ka mafai pefea o tupu te mea tenei?”

Ne fakamatala atu ne Kapilielu penei: “Ka oko atu ki a koe te agaga tapu, ka nofo foki i a koe te ‵mana o te Atua. Ona ko te feitu tenei, ka fakaigoa te tamaliki ‵malu tenei, ko te Tama a te Atua.”

Ke fesoasoani atu ki a Malia ke talitonu ki tena fekau, ne toe fai atu a Kapilielu penei: “Kae kiloke, masaua tou tino ko Elisapeta. Ko iloa ‵lei me e se afu, ko matua foki, kae i te taimi nei ko faitama, ko ono ona masina. Me e seai se mea e se mafai ne te Atua o fai.”

Ne talia ne Malia te pati a Kapilielu. Kae se a tena tali? Ana muna: “Ko au ko te tavini a Ieova. Ke oko eiloa te mea tenā ki a au, e pelā mo au pati.”

Mai tua malie ifo o te taimi ne fano keatea ei a Kapilielu, ne fakatoka a Malia o fano o āsi ki a Elisapeta, telā e ‵nofo fakatasi mo tena avaga, ko Sakalia, i te koga maugā o Iutaia. Mai te fale o Malia i Nasaleta, kāti e tolu io me e fa aso te leva e ‵tau ei o fai te malaga tenā.

Fakamuli ifo i te okoatuga a Malia ki te fale o Sakalia, ne ulu atu a ia ki ei kae ne fakatālofa atu. I konā loa ne ulufia a Elisapeta ne te agaga tapu, kae ne fai atu a ia penei ki a Malia: “Ke manuia koe i fāfine katoa! Ke manuia foki te tamaliki telā ka fanau ne koe. Kaia ko ala ei o tupu se mea sili penei ki a au, i te mātua o toku Aliki ko vau o asiasi mai ki a au? I te lagonaga ne au o tau fakātalofa, kae gasue mo te fiafia a te tamaliki i loto i toku tinae.”

I te lagonaga o te mea tenā, ne tali atu a Malia ona ko te loto fakafetai: “Ko tavae atu toku loto ki a Ieova, ko fiafia foki toku agaga ki te Atua toku Fakaola. I te mea ne manatua ne ia au ko tena tavini sē aogā! Kae kiloke, mai i te itula nei o fano ki mua, ka fakamanuia mai a kautama katoa ki a au. Ona ko mea ‵lasi ne fai ne te Atua Malosi mō oku.” Kae e tiga eiloa te taulia o tou fafine, ne tavae katoatoa atu a Malia ki te Atua. “A tena igoa foki e tapu,” ko ana muna, “e alofa foki a ia ki a latou katoa kolā e ma‵taku ki a ia i kautama katoa.”

Ne toe ‵viki atu a Malia ki te Atua i se pese fakapelofeta telā ne fakaosofia, ana muna: “Ne ‵fola tena lima malosi. Kae ne fakamaofa ne ia a tino fakamatamata mo olotou aofaga. Kae ne tuku ifo foki ne ia ki lalo a tino sili mai i olotou nofogaaliki. Kae siki ake ki luga a tino ma‵lalo. Ne fagai ne ia a tino fia‵kai ki mea ‵lei. Kae afuli a tino mau‵mea ke olo ma‵tiva. E tausi ki tena feagaiga ne fai mō tupuga o tatou; ne vau foki o fesoasoani ki tena tavini ko Isalaelu. Kae ne masaua foki ne ia o alofa ki a Apelaamo mo ana fanau katoa, ke oko ki te se-gata-mai!”

Ne ‵nofo fakatasi a Malia mo Elisapeta i se tolu masina, kae kāti se taumate ne fesoasoani malosi atu a ia ki a Elisapeta i vaiaso fakaoti konā a koi tuai o fanau a ia. Se mea ‵lei ‵ki ke ‵nofo fakatasi te avā fāfine fakamaoni konā, kolā ne fai‵tama ona ko te fesoasoani o te Atua, i te taimi manuia tenā o lā olaga!

Ne matea ne koe me ne fakaaloalo atu ki a Iesu a koi tuai o fanau mai a ia? Ne taku ne Elisapeta a ia ko “Toku Aliki,” kae ne gasue mo te fia‵fia tena tama i te taimi ne sae muamua mai ei a Malia. Kae e isi aka foki a nisi tino kolā ne seki fakaaloalo fakamuli atu ki a Malia mo tena tama telā ka fanau mai, e pelā mo te mea ka matea atu ne tatou. Luka 1:26-56.

▪ Ne a pati ne fai ne Kapilielu ke fesoasoani atu ki a Malia ke maina me ka faitama pefea a ia?

▪ Ne fakaaloalogina pefea a Iesu a koi tuai o fanau mai?

▪ Ne a pati a Malia i se pese fakapelofeta ke tavae atu i ei ki te Atua?

▪ Ne pefea te leva ne ‵nofo fakatasi ei a Malia mo Elisapeta, kae kaia ne ‵lei ei ke ‵nofo fakatasi a Malia mo Elisapeta i te vaitaimi tenā?