Te Tulaga o Malia i Fuafuaga a te Atua

I TE faiga o te galuega a Iesu, ne pakalaga mai se fafine mai te vaitino, penei: “Amutia te tinae telā ne fanau mai ei koe, mo ū kolā ne ū ei koe.” Moi ne manako a Iesu ke tapuaki atu a tino ki tena mātua, tenei eiloa te avanoaga gali ke fakamalosi aka ne ia te mea tenā. I lō te fai penā, ne tali atu a ia: “Ikai, e sili atu te manuia o tino kolā e faka‵logo ki te muna a te Atua, kae tausi ki ei.”​—⁠Luka 11:​27, 28.

Ne seki tuku atu ne Iesu ne tauliaga fakapito ki tena mātua; io me ne fai atu ki ana soko ke fai penā. E fetaui pefea te mea tenei mo te tapuakiga telā e fai ne nisi tino ki a Malia? Ke onoono nei tatou ki nisi akoakoga lauiloa e uiga ki te mātua o Iesu mai te kilokiloga a te Tusi Tapu ki ei.

“Ke Fakamanuia Atu te Atua,” “Amutia Koe i Fafine Katoa”

Ne fakaasi atu ne te agelu ko Kapilielu ki a Malia tena tulaga i fuafuaga a te Atua. I te taimi tenā, ne fakafetaui atu a ia ki tou fafine, penei: “Ke i a koe te filemu! A te Aliki e fakatasi mo koe, me ko oti ne fakamanuia atu ki a koe!” (Luka 1:​28) A te suā fuliga ki pati fakafetaui konā, e fai penei: “Ke fakamanuia atu te Atua.” Mai tua ifo i ei, ne fakafetaui atu a Elisapeta ki a Malia, i ana pati penei: “Amutia koe i fafine katoa! Ke amutia foki te tamaliki telā ka fanau ne koe.” (Luka 1:​42) E mata, e se fakaasi mai i fuaiupu konei me e ‵tau eiloa o isi se vaega o te tapuakiga e avatu ki a Malia?

Ikai, e se penā loa. E tiga eiloa e aofia a pati konei i te ‵talo a te kau Katolika kolā e fai atu ki a Malia, e seai se fakaasiga i te Tusi Tapu e fai mai i ei me e ‵tau o ‵talo atu ki tou fafine. Ne fakaasi atu fua ne Kapilielu mo Elisapeta te amanaia o laua ki te tu ‵kese o te tulaga o Malia e pelā me ko te tino ke fanau mai ne ia te Mesia, kae e seai se mea e fakaasi mai i te Tusi Tapu ke ‵talo atu ki tou fafine. Tela la, i lō te ‵talo atu ki a Malia, ne fakasino atu a Iesu ki ana soko ke ‵talo ki tena Tamana, i te taimi ne fakamolemole atu ei latou ke fakaakoako mai ke iloa ne latou o ‵talo. E tonu, e kamata eiloa penei a te ‵talo lauiloa a Iesu: “Te motou Tamana telā i te lagi.”​—⁠Mataio 6:⁠9.

Se Pule e Tokotasi

E fai mai te suā akoakoga lauiloa e uiga ki a Malia me ko fai nei a ia e pelā me ko “te Tupu Fafine o te lagi.” E seai loa se tofi penā e fakaasi mai i te Tusi Tapu me ‵tau o maua ne tou fafine. E fakaasi mai fua i ei, me e isi sena tulaga fakapito i te fakatokaga faka-te-lagi a te Atua. Se a te tulaga tenā?

Ne fai mai a Iesu me ka isi ne ana soko fakamaoni ka pule fakatasi mo ia i tena Malo. (Luka 22:​28-​30) Ka tuku atu ne Iesu ki tino filifilia konā a te tauliaga ke tavini atu pelā me ne “faitaulaga e tavini atu ki te ‵tou Atua, kae ka pule latou [ki] te lalolagi.” (Fakaasiga 5:​10) E fakaasi faka‵lei mai i te Tusi Tapu me e aofia a Malia i tino kolā ne tuku atu ki a latou te tulaga taulia tenei. Kaia e fai atu ei tatou penei?

Kāti e masaua ne koe, me mai tua ifo o te mate o Iesu, ne “‵talo sāle” a Malia fakatasi mo soko o Iesu mo ana taina. Ne maopoopo fakatasi se toko 120 tino mō te pogai tenei, kae ne aofia i ei a nisi “fafine.” (Galuega 1:​12-​15) I te taimi ne fai ei te “Aso Penitekoso,” ko pati i te Tusi Tapu, “ne maopoopo katoa ki te koga e tasi a tino tali‵tonu” kae ne ‵ligi atu te agaga tapu o te Atua ki luga i a latou, telā mafai ei ne latou o fai‵pati ki ‵gana kese‵kese.​—⁠Galuega 2:​1-4.

A te aofia o Malia i tino kolā ne fakamanuiagina i te feitu tenei e fakaasi mai i ei me i tou fafine mo nisi fafine kolā ne maua ne latou te agaga tapu ne filifili ke aofia i te Malo faka-te-lagi o Iesu. Tela la, e tali‵tonu eiloa tatou me ko ‵nofo fakatasi a Malia mo Iesu i tena ‵malu faka-te-lagi. (Loma 8:​14-​17) Ke mafaufau ki nisi tauliaga kolā ka maua ne tou fafine fakatasi mo nisi tino pule i te fakataunuga o fuafuaga a te Atua.

Te Tufaatuga o Fakamanuiaga ‵Gali

E fai mai te tusi ko Fakaasiga me ka faka‵tu aka te toko 144,000 ki te lagi ke tavini fakatasi atu mo Iesu e pelā me ne faitaulaga, famasino mo tupu. (Fakaasiga 14:​1, 4; 20:​4, 6) E pelā me ne faitaulaga ka fakagalue fakatasi ne latou a mea aoga o te taulaga a Iesu telā ne ofo atu mō tino faka‵logo katoa, kae momea aka ne latou a tino ki se tulaga ‵lei katoatoa i te feitu faka-te-agaga, mea tau amioga e pelā foki mo te feitu faka-te-foitino. (Fakaasiga 21:​1-4) Mafaga o tauliaga gali ke lavea ne tino fakamaoni katoa a te taimi gali tenā!a

Koi aoga eiloa nei a Malia i te fakataunuga o fuafuaga a Ieova. A tena loto maulalo, fakatuanaki, tena fakalogo mo tena galue malosi e pelā me se mātua, ke oko foki eiloa ki tena loto kufaki mai lalo i tofotofoga e tāua ‵ki eiloa ke fakaakoako ki ei. E ‵tau foki eiloa o amanaia malosi tatou ki a ia me ne fanau mai ne ia te Mesia kae aofia foki i te fakaokomaiga o fakamanuiaga ki tino.

Kae ko te toe akoakoga tāua e tauloto ne tatou mai i a Malia, me e tavini atu fua a ia fakatasi mo nisi tavini fakamaoni a te Atua ki a Ieova, kae e se ki se isi atua aka. E ka‵laga fakatasi mai a Malia mo nisi tino kolā e pule fakatasi mo Keliso i te lagi, penei: “Ke i a ia telā e nofo i te nofogaaliki [Ieova te Atua], e pela foki mo te Tama Mamoe [Iesu Keliso], te vikiga, te tavaega, te ‵malu mo te malosi, ke oko eiloa ki te se gata mai ki te se gata mai eiloa!”​—⁠Fakaasiga 5:​13; 19:⁠10.

[Fakamatalaga mai lalo]

Mai i te Tusi Tapu? telā ne ‵lomi ne Molimau a Ieova.

[Ko manatu tāua i te itulau e 10]

E tāua eiloa ke fakaakoako tatou ki te loto maulalo, te fakatuanaki, mo te fakalogo o Malia