Mataupu e 3

Ne Fanau Mai te Tino Telā e Fakatoka ne Ia te Auala

KO PILI o fanau ne Elisapeta tena pepe. Kae ne ‵nofo fakatasi a Malia mo ia i masina e tolu konā ko ‵teka atu. Kae tenā loa te taimi e ‵tau ei o fakatofa atu a Malia kae toe faimalaga atu i te koga ‵mao ki tena fale i Nasaleta. E toe ono masina kae ka maua mai foki ne ia tena pepe.

Ne fatoā ‵seke a Malia o fano, kae ne fanau a Elisapeta. E pefea te fiafia i te taimi ko manuia ei te fanaumaiga kae e ma‵losi a Elisapeta mo tena pepe! I te taimi ne fakaasi atu ei ne Elisapeta a tena tamā pepe ki ana tuakoi mo ana kāiga, ne fia‵fia fakatasi a latou katoa mo ia.

I te valu o aso mai tua ifo o tena fanaumaiga, e ‵tusa loa mo te tulafono a te Atua, e ‵tau o pilitome se tamaliki tagata i Isalaelu. I konā loa ne āsi atu ei a taugasoa mo kāiga. Ne fai mai latou me e ‵tau o fakaigoa te tamaliki tagata ki tena tamana, ko Sakalia. Kae ne faipati atu a Elisapeta. Ana muna: “Ikai! A tena igoa ko Ioane.” Masaua la, me e tenā loa te igoa ne fai atu ne te agelu ko Kapilielu me e ‵tau o tuku atu ki te tamaliki.

Kae ne ita mai lā tau gasoa, olotou muna: “E seai se tino o tou kāiga e tokotasi e igoa penā.” I konā loa, mai te fakaaogāga o tāga, ne fesili atu latou ki tena tamana me ko oi te igoa e manako a ia ki ei mō te tamaliki. Ne fai atu a Sakalia ke aumai se ma tusitusi, kae ne ofo a tino katoa, me ne tusi mai a ia penei: “A tena igoa ko Ioane.”

I konā loa ne toe mafai ei o faipati a Sakalia me ne tupu se vavega. Kāti e masaua ne koe me e se mafai ne ia o faipati i te taimi ne seki talitonu ei a ia ki te faka‵pulaga a te agelu me i a Elisapeta ka maua ne ia se tamaliki. Kae i te taimi ne faipati atu ei a Sakalia, ne ofo masei a tino katoa kolā ne tuakoi mo latou kae ne fai ifo ki a latou eiloa penei: “Kae ka pefea nei a uiga o te tamaliki tenei?”

I konā loa ne ‵fonu a Sakalia i te agaga tapu, kae ne tavae atu penei: “E tavae ne tatou a Ieova te Atua o Isalaelu! Me ne vau o fesoasoani kae fakasaoloto ana tino. Ne fakatu aka ne ia te fakaola mō tatou, mai i te kāiga o tena tavini ko Tavita.” A te tonuga loa, a te “fakaola” tenā, ko te Aliki ko Iesu, telā ka fanau fakamuli mai. Muna a Sakalia me e alatu i te tino tenā ka talia ei ne te Atua ke “fakasaoloto foki tatou ke tavini atu ki a ia mo te sē ma‵taku.”

I konā loa ne ‵valo atu penei a Sakalia e uiga ki tena tama, ko Ioane: “Kae ko koe e taku tama, ka fakaigoa ki te pelofeta a te Atua Tafasili i te Maluga; ka mua koe i a Ieova o fakatoka te  alatu mō ia. O folafola atu ki ana tino me ka fakaolagina  latou, i te fakamagaloga o agasala a latou. E alatu i te alofa ‵nau o te ‵tou Atua, kae ka fakatu aka ne ia se mainaga ke oko mai ki a tatou. O fakamaina atu ei latou kolā e ‵nofo i te pouliga mo te ata o te mate, kae ke takitaki ‵tou vae ki te auala o te filemu.”

I te taimi tenā ko oti ne oko atu a Malia ki Nasaleta, kae kāti seki avaga a ia. Ne a mea ka ‵tupu ki a ia māfai ko iloa ne tino i a ia ko faitama? Luka 1:56-80; Levitiko 12:2, 3.

▪ E pefea te va o te ma‵tua o Ioane mo Iesu?

▪ Ne a mea ne ‵tupu ki a Ioane i te valu o aso mai tua ifo o tena fanaumaiga?

▪ Ne saga atu pefea te Atua ki ana tino?

▪ Se a te galuega telā ne ‵valo mai me ka fai ne Ioane?